កូរ៉េខាងជើង៖ចិននិងរុស្ស៊ីអាចចេញវេតូជំទាស់សំណើទណ្ឌកម្មអាមេរិកនៅអ.ស.ប.ទេ?
ចុះផ្សាយនៅថ្ងៃ៖
ស្តាប់ - ០៦:១៩
ក្រុមប្រឹក្សាសន្តិសុខអង្គការសហប្រជាជាតិជួបប្រជុំគ្នាថ្ងៃចន្ទនេះ ដើម្បីអនុម័តសំណើសេចក្តីសម្រេចបន្ថែមទណ្ឌកម្មប្រឆាំងកូរ៉េខាងជើង។ ជាសំណើរបស់អាមេរិក ឆ្លើយតបទៅនឹងការសាកល្បងនុយក្លេអ៊ែរលើកទី៦ របស់ក្រុងព្យុងយ៉ាង កាលពីថ្ងៃអាទិត្យ៣កញ្ញា។ អាមេរិកបានកែប្រែខ្លឹមសារបន្ធូរទណ្ឌកម្ម ក្នុងសំណើដែលដាក់ទៅអង្គការសហប្រជាជាតិ ហើយថ្ងៃអាទិត្យម្សិលមិញ បានចែកចាយខ្លឹមសារថ្មីនេះអោយសមាជិកទាំង១៤ផ្សេងទៀត នៅក្រុមប្រឹក្សាសន្តិសុខ ពិនិត្យមើល។
ទោះជាមានការកែប្រែខ្លឹមសារ បន្ធូរទណ្ឌកម្មលើក្រុងព្យុងយ៉ាង ក៏គេពិបាកដឹងថា តើថ្ងៃចន្ទនេះ ចិននិងរុស្ស៊ីអាចចេញវេតូ ជំទាស់សំណើអាមេរិករឺយ៉ាងណាទេ។
អាមេរិកកែប្រែខ្លឹមសារសំណើ បន្ធូរទណ្ឌកម្មលើក្រុងព្យុងយ៉ាង ដើម្បីផ្គាប់ចិត្តចិននិងរុស្ស៊ី
សំណើទណ្ឌកម្មថ្មីដែលអាមេរិកដាក់អោយអង្គការសហប្រជាជាតិបោះឆ្នោតអនុម័តថ្ងៃចន្ទនេះ គឺដើម្បីតបទៅនឹងកូរ៉េខាងជើងដែលបានសាកល្បងនុយក្លេអ៊ែរជាលើកទី៦ កាលពី៨ថ្ងៃមុននេះ តបតនឹងការបាញ់មីស៊ីលរំលងទឹកដីជប៉ុនផងដែរ។ ការសាកល្បងនុយក្លេអ៊ែរលើកទី៦របស់កូរ៉េខាងជើង ធ្វើអោយអាមេរិកខឹងខ្លាំងណាស់ ក៏ចេញគម្រោងសេចក្តីសម្រេចថ្មីទៀត ភ្លាមៗតែម្តង។ គម្រោងបន្ថែមទណ្ឌកម្មលើកក្រោយនេះ គឺធ្ងន់កតែម្តងសម្រាប់ក្រុងព្យុងយ៉ាង ហើយបានធ្វើអោយចិននិងរុស្ស៊ីទាស់ចិត្ត។ ហេតុនេះហើយទើបអាមេរិកកែប្រែខ្លឹមសារឡើងវិញ ដើម្បីបញ្ចុះបញ្ចូលចិននិងរុស្ស៊ី អោយបោះឆ្នោតអនុម័ត នៅថ្ងៃចន្ទនេះ។
ជាត្រួសៗ សំណើអាមេរិកលើកក្រោយនេះ ក្នុងខ្លឹមសារដើម អាមេរិកគ្រោងដាក់ទណ្ឌកម្មហាមនាំចេញប្រេងទៅអោយកូរ៉េខាងជើង ព្យួរការនាំចេញសម្លៀកបំពាក់កូរ៉េខាងជើង បង្កកទ្រព្យសម្បត្តិក្រុមហ៊ុនអាកាសចរណ៍ Air Koryo បង្កកទ្រព្យសម្បត្តិលោកគឹម ជុងអ៊ុន ហាមការធ្វើដំណើររបស់លោកគឺម ជុងអ៊ុន និយាយអោយចំគឺដាក់លោកគឺម ក្នុងបញ្ជីខ្មៅតែម្តង។ សំណើទណ្ឌកម្មអាមេរិកក៏គ្រោងលែងបង់ប្រាក់អោយពលករកូរ៉េខាងជើងដែលធ្វើការនៅបរទេសដែរ ដូច្នេះមានន័យថា ពលករទាំងនេះនឹងត្រូវត្រលប់ទៅស្រុកកំណើតវិញ ចៀសមិនរួចទេ។ សំណើអាមេរិកទាមទារផងដែរ អោយដាក់កងកម្លាំងត្រួតពិនិត្យរាល់កប៉ាល់ដែលជាប់សង្ស័យថា ដឺកទំនិញដែលអង្គការសហប្រជាជាតិហាមឃាត់។ ខ្លឹមសារលើកឡើងទាំងអស់នេះ ជាខ្លឹមសារដំបូង មិនទាន់កែប្រែ។
ឥឡូវនេះ ដើម្បីបញ្ចុះបញ្ចូលចិននិងរុស្ស៊ី អាមេរិកបានបន្ធូរទណ្ឌកម្មមួយចំនួនទៅវិញ បែបយ៉ាងពីដំបូងដែលហាមប្រាមទាំងស្រុងមិនអោយនាំប្រេងទៅកូរ៉េខាងជើងនោះ ឥឡូវ គេអាចនាំប្រេងទៅវិញបាន ប៉ុន្តែ ក្នុងកម្រិតកំណត់។ ឧទាហរណ៍ កូរ៉េខាងជើងពេលនេះអាចនាំផលិតផលប្រេងចូលស្រុក ក្នុងបរិមាណកំណត់២លានបារីល ក្នុងមួយឆ្នាំៗ។ ខ្លឹមសារទណ្ឌកម្មថ្មី ក៏គ្រោងកាត់បន្ថយការនាំចេញឧស្ម័នរាវធម្មជាតិទៅអោយក្រុងព្យុងយ៉ាងដែរ។ កន្លងមក ចិននាំចេញប្រេងឆៅទៅអោយកូរ៉េខាងជើងច្រើនណាស់ ស្ទើរតែទាំងស្រុងតែម្តង គឺប្រហែល៥០០ពាន់តោនឯណោះក្នុងមួយឆ្នាំៗ។
ហើយនិយាយពីផលិតផលធ្វើពីប្រេងវិញ គឺចិននាំទៅកូរ៉េខាងជើង ១ឆ្នាំៗ ប្រហែលជា២០០ពាន់តោនដែរ។ រុស្ស៊ីវិញ ក៏នាំចេញប្រេងឆៅអោយក្រុងព្យុងយ៉ាង ប្រហែលជា៤ម៉ឺនតោនដែរ ក្នុងមួយឆ្នាំ។ អញ្ចឹង បើអាមេរិកហាមប្រាមទាំងស្រុងមិនអោយនាំប្រេងទៅកូរ៉េខាងជើង គឺធ្វើបាបកូរ៉េខាងជើងខ្លាំងណាស់។ ហើយក៏ប៉ះពាល់ពាណិជ្ជកម្មរុស្ស៊ី និងចិនផងដែរ។ ចិននិងរុស្ស៊ី មិនចង់ឃើញក្រុងព្យុងយ៉ាងដុនដាបដោយសារត្រូវគេកាត់ផ្តាច់ប្រេងទាំងស្រុងទេ។ ម្ល៉ោះហើយ ទើបពេលនេះ អាមេរិកបន្ធូរទណ្ឌកម្មនេះទៅវិញ គឺមិនកាត់ផ្តាច់ប្រេងទាំងស្រុងទេ។
អាមេរិកសម្រេចដែរថា មិនបង្កកទ្រព្យលោកគឹម ជុងអ៊ុន ហើយក៏មិនបង្កកទ្រព្យសម្បត្តិក្រុមហ៊ុនអាកាសចរណ៍កូរ៉េខាងជើងដែរ។ បើនិយាយពីពលករកូរ៉េខាងជើងដែលធ្វើការនៅបរទេសវិញ ពេលនេះ អាមេរិកសម្រេចដែរថា លែងហាមឃាត់ការជ្រើសរើសពួកគេចូលធ្វើការ លែងហាមឃាត់ការបង់កម្រៃពលកម្មទៅអោយពួកគេទៀត។ ទិសដៅគឺចៀសកុំអោយរដ្ឋកូរ៉េខាងជើងត្រូវប្រឈមនឹងជនភៀសខ្លួនដែលត្រូវត្រលប់ទៅស្រុកវិញ។ សូមបញ្ជាក់ថា ពលករកូរ៉េខាងជើងធ្វើការក្នុងប្រទេសរុស្ស៊ីមាន ៣ម៉ឺន៥ពាន់នាក់ រុស្ស៊ីនិងចិនជំទាស់ មិនអោយបញ្ជូនពួកគេទៅស្រុកវិញ ក៏ដើម្បីមិនចង់ឃើញមានការហូរហៀរជនភៀសខ្លួនទាំងនេះដែរ។
ពលករកូរ៉េខាងជើងនៅបរទេសសព្វថ្ងៃ មានប្រហែលពី៦ម៉ឺន ទៅ១០ម៉ឺននាក់។ អង្គការសហប្រជាជាតិធ្លាប់ចោទក្រុងព្យុងយ៉ាងថា បង្ខំប្រជាជនកូរ៉េខាងជើងប្រមាណជា៥ម៉ឺននាក់ អោយទៅធ្វើការនៅក្រៅស្រុក ដើម្បីរកចំណូលអោយរដ្ឋ។ យោងតាមអង្គការសហប្រជាជាតិ ពលករទាំងនេះនាំចំណូលអោយក្រុងព្យុងយ៉ាង ពី១ពាន់២រយលានដុល្លារ ទៅ២ពាន់៣រយលានដុល្លារ ឯណោះមួយឆ្នាំៗ។
ដោយឡែក ការហាមឃាត់នាំចូលសម្លៀកបំពាក់កូរ៉េខាងជើង នៅតែរក្សាទុកក្នុងសំណើដដែល ព្រោះចិននិងរុស្ស៊ីមិនបានជំទាស់ទេ។
ទោះយ៉ាងណា ក៏មិនដឺងថា ក្នុងការបោះឆ្នោតលើសំណើអាមេរិក នៅក្រុមប្រឹក្សាសន្តិសុខ ថ្ងៃចន្ទនេះ ចិននិងរុស្ស៊ីចេញវេតូជំទាស់រឺយ៉ាងណាទេ ! គិតតាំងពីឆ្នាំ២០០៦មក អង្គការសហប្រជាជាតិដាក់ទណ្ឌកម្មលើកូរ៉េខាងជើង ៧លើកហើយ។ ពេលដាក់ម្តងៗ គឺតែងតែធ្ងន់ជាងមុនជានិច្ច។ ទិសដៅទណ្ឌកម្មបន្តបន្ទាប់នេះ ក៏ដើម្បីជំរុញអោយកូរ៉េខាងជើងចរចានុយក្លេអ៊ែរ។ ទណ្ឌកម្មចុងក្រោយ គឺអនុម័តកាលពីខែសីហាមុននេះ ជាទណ្ឌកម្មស្នើដោយអាមេរិក ហាមកូរ៉េខាងជើងមិនអោយនាំចេញធ្យូងថ្ម រ៉ែដែក សំណ និងផលិតផលអាហារសមុទ្រទៅក្រៅស្រុក។ ទិសដៅគឺដើម្បីផ្តាច់ចំណូលរបស់កូរ៉េខាងជើងដែលបានពីការនាំចេញ។ ហើយចិននិងរុស្ស៊ីក៏មិនបានចេញវេតូជំទាស់ទណ្ឌកម្មខែមុននេះដែរ ដោយសារតែមើលឃើញថា លោកគឺម ជុងអ៊ុន ហួសហេតុពេក។
ប៉ុន្តែ ដូចលើកឡើងអញ្ចឹង មិនដឺងថា សំណើទណ្ឌកម្មថ្មីលើកនេះ អាចអោយចិននិងរុស្ស៊ីព្រមអនុម័តទៀតរឺយ៉ាងណាទេ ព្រោះក្រុងព្យុងយ៉ាងទើបនឹងរងទណ្ឌកម្មថ្មី ខែមុនផង ឥឡូវត្រូវមានថ្មីទៀតខែកញ្ញានេះ។ មើលទៅ ដូចជាធ្ងន់ពេកទេដឹង ! ចិននិងរុស្ស៊ីមិនចង់ឃើញរបបក្រុងព្យុងយ៉ាងដួលរលំគ្រេង ដោយសារទំងន់ទណ្ឌកម្មអង្គការសហប្រជាជាតិទេ។ វាអាចបង្កគ្រោះថ្នាក់ទៀតផង បើកូរ៉េខាងជើងបញ្ចេញប្រតិកម្មយោធាណាមួយតបទៅវិញ។ ម្យ៉ាងទៀត ទណ្ឌកម្មដាក់លើប្រទេសណាមួយភ្លាម ក៏មិនអាចផ្តល់ប្រសិទ្ធភាពភ្លាមៗដែរ ផលវិបាកគឺក្នុងរយៈពេលវែង។ ដូចករណីទណ្ឌកម្មលើអ៊ីរ៉ង់អញ្ចឹង ទាល់តែចាំជាង១០ឆ្នាំ ទើបឃើញអ៊ីរ៉ង់សម្រេចចិត្ត ព្រមចរចាកម្មវិធីនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ