គ្រិស្តសាសនាអ័រថូដុក្សពិភពលោកត្រូវបែកបាក់ជាពីរដោយសារតែវិបត្តិអ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:៥៨
សញ្ញាប៉ុន្មានដំបូងនៃការបែកបាក់បានផុសចេញមក នៅក្នុងខែតុលាកន្លងទៅ ក្នុងរង្វង់គ្រិស្តសាសនាអ័រថូដុក្ស បន្ទាប់ពីប្រមុខគ្រិស្ដសាសនាអ័រថូដុក្សដ៏ខ្លាំងក្លានៃក្រុងម៉ូស្គូ បានប្រកាសផ្តាច់ទំនាក់ទំនង ជាមួយ ប្រមុខដឹកនាំជាប្រវត្តិសាស្ត្រនៃគ្រិស្តសាសនាអ័រថូដុក្ស នៃក្រុងកុងស្តង់ទីណូប។
ក្នុងសម័យប្រជុំវិសាមញ្ញ នៅទីក្រុងមីនស្ក៍ រដ្ឋធានីនៃប្រទេសបេឡារុស វិហារអ័រថូដុក្សរុស្ស៊ី បានសម្រេចផ្តាច់រាល់ចំណងទាក់ទងជាមួយគូប្រជែងប្រវត្តិសាស្ត្ររបស់ខ្លួននៅក្រុង កុងស្តង់ទីណូប។ បុព្វជិត និង សាសនិក ក្រុងម៉ូស្គូ លែងអាចចូលរួមក្នុងពិធីផ្លូវការរួមគ្នា ឬ ទទួលព្រះក្រយា នៅក្នុងវិហារទាំងឡាយ ដែលស្ថិតក្រោមអំណាច ប្រមុខគ្រិស្តសាសនាអូរថូដុក្សក្រុងកុងស្តង់ទីណូប ដូចមុនទៀតឡើយ។
ភាពតានតឹងនេះ ត្រូវបានគេរំពឹងទុក ក្រោយពី ក្រុងកុងស្តង់ទីណូប បានប្រកាសទទួលស្គាល់ លក្ខន្តិកៈ ឯករាជ្យ នៃវិហារអ័រថូដុក្សនៅអ៊ុយក្រែន។ សេចក្តីសម្រេចនេះ មានអត្ថន័យខ័ណ្ឌបញ្ចប់ រយៈពេល ៣៣២ ឆ្នាំ ដែលវិហារនៅអ៊ុយក្រែន បានស្ថិតនៅក្រោមអាណាព្យាបាលវិហាររុស្ស៊ី ហេតុដែលញ៉ាំងឲ្យ ក្រុងម៉ូស្គូ ខឹងសម្បារក្រៃ។
ក្រុមសាសនិកអ័រថូដុក្សអ៊ុយក្រែន បែកបាក់ជាពីរ ដោយមួយ បន្តស្ថិតនៅស្មោះស្ម័គ្រនឹង ប្រមុខគ្រិស្តសាសនាអ័រថូដុក្សនៅម៉ូស្គូ ចំណែកមួយទៀត ស្មោះត្រង់នឹងប្រមុខអ័រថូដុក្សក្រុងគៀវស្វ័យប្រកាស ក្រោយពីអ៊ុយក្រែន បានឯករាជ្យ ក្នុងឆ្នាំ ១៩៩១ ហើយដែលមិនបានត្រូវទទួលស្គាល់ដោយ វិហារអ័រថូដុក្សណាមួយផ្សេងនោះឡើយ។
ការប្រជែងគ្នា រវាងវិហារទាំងពីរ ធ្លាក់ចុះធ្ងន់ធ្ងរ ដោយវិបត្តិរុស្ស៊ី-អ៊ុយក្រែន បណ្តាលមកពី រុស្ស៊ី បានភ្ជាប់ យកទៀបកោះគ្រីមេ ដោយផ្តាច់ចេញពីអ៊ុយក្រែនក្នុងឆ្នាំ ២០១៤ និងមកពី ជម្លោះបង្កដោយពួកផ្តាច់ទឹកដីរុស្ស៊ីនិយម នៅតំបន់ខាងកើតអ៊ុយក្រែន ដែលក្នុងអំឡុងជាង ៤ ឆ្នាំកន្លងទៅ បានផ្តាច់ជីវិតមនុស្ស អស់ជាង ១ ម៉ឺននាក់ទៅហើយ។
ដោយប្រតិកម្មទល់នឹង ការផ្តាច់ចំណងរវាងម៉ូស្គូ និង កុងស្តង់ទីណូប ប្រធានាធិបតីអ៊ុយក្រែន លោក ប៉េត្រូ ប៉ូរ៉ូឆេនកូ បានប្រមាណថា វិហាររុស្ស៊ីដើរតាមផ្លូវ ឆ្ពោះទៅដាក់ខ្លួនឯង ក្នុងស្ថានភាព “ស្វ័យឯកោ” និង ជាប់ ក្នុងទំនាស់ ជាមួយ គ្រិស្តសាសនាអ័រថូដុក្សពិភពលោក។
អ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ពីចំណែកខ្លួន បានសំដែងនូវក្តីកង្វល់ ចំពោះការផ្តាច់ទៅ នៃចំណងនោះ ហើយសង្ឃឹមថា ផលប្រយោជន៍វិហារក្រុងម៉ូស្គូ មុខជានឹង “ត្រូវគេគោរព” ហើយ “គតិបណ្ឌិតនឹងត្រូវឈ្នះ”។
ក្រៅពីភាពតានតឹងរកលេខដាក់គ្មាន រវាងម៉ូស្គូ និង ក្រុងគៀវ ការផ្តាច់ចំណងរវាងម៉ូស្គូ និង កុងស្តង់ទីណូប គឺ គម្រាមដល់ឯកភាពនៃពិភពអ្នកកាន់គ្រិស្តសាសនាអ័រថូដុក្ស ដែលមានសាសនិកជនសរុប ចំនួន ២៥០ លាននាក់។
“យើងមិនគាំទ្រ និង មិនប្រឆាំងឡើយ។ គោលជំហរយើង គឺគាំទ្រឲ្យមានឯកភាពជាធ្លុងមួយនៃវិហារអ័រថូដុក្សនៅទូទាំងពិភពលោក ប្រកបដោយភាពសុខដុម ការស្គាល់នាទីទទួលខុសត្រូវ និងភាពស្មោះត្រង់ចំពោះសណ្តាប់ធ្នាប់សាសនប្បញ្ញត្តិ ហើយប្រឆាំងនឹងអ្វីៗដែលបំបែកបំបាក់”។ នេះជាការថ្លែងរបស់ប្រមុខគ្រិស្តសាសនាអ័រថូដុក្សស៊ែរប៊ី សម្តេចសង្ឃ Irinée ក្នុងបទសម្ភាសន៍ ទាំងបន្ថែមថា ការទទួលស្គាល់វិហារឯករាជ្យនៅអ៊ុយក្រែន ដោយក្រុងកុងស្តង់ទីណូប គឺជា “សេចក្តីសម្រេចដែលនាំទៅកាន់ការផ្តាច់ចំណង” ហើយ បើកផ្លូវឲ្យមានការពុះចែកថ្មីៗទៀត ក្នុងគ្រិស្តសាសនាអ័រថូដុក្សពិភពលោក។
នៅ Monténégro ប្រមុខរងនៃវិហារអ័រថូដុក្ស លោក Stevo Vucinic បានថ្លែងគាំទ្រដល់ ការទទួលស្គាល់វិហារឯករាជ្យនៅអ៊ុយក្រែន ហើយបរិហារ កិច្ចការ “នយោបាយ” ដែលកើតឡើង រវាង មួយចំណែក គឺក្រុងកុងស្តង់ទីណូប និងមួយចំណែកទៀត គឺវិហាររុស្ស៊ីនិងស៊ែរប៊ី ដែលតាមយោបល់គាត់ គឺស្ថិតក្នុងដៃម៉ូស្គូ និង ក្រុងប៊ែលក្រាដ។ បុព្វជិតនេះ បន្ថែមថា ការផ្តាច់ចំណងនោះ “នឹងអនុញ្ញាតឲ្យគ្រប់តែវិហារអ័រថូដុក្សណា ដែលអឺរ៉ុបនិយម បូកទាំងវិហារ Monténégro ផង ទទួលបាន ក្បួនច្បាប់បន់ស្រន់ព្រះរួមតែមួយ ក្នុង អនាគតដ៏ខ្លីខាងមុខ។
“នេះជាសេចក្តីសម្រេចឯកតោភាគី ដែលនាំឲ្យក្រៀមក្រំ និង នាំឲ្យស្តាយក្រៃលែង” -នេះជាប្រតិកម្ម ពីខាងវិហារអ័រថូដុក្សហ្វាំងឡង់ ទាំងសំដែងសេចក្តីសង្ឃឹមថា នឹងបន្តតទៅទៀត “សកម្មភាពវប្បធម៌” ជាមួយវិហារម៉ូស្គូ។
ក្នុងលិខិតផ្ញើជូនសម្តេចសង្ឃ Kirill ជាប្រមុខគ្រិស្តសាសនាអ័រថូដុក្សរុស្ស៊ី បុព្វជិត Rostislav នៃវិហារអ័រថូដុក្សឆែក និង ស្លូវ៉ាគី បានអំពាវនាវឲ្យថ្កោលទោស “រាល់តែការប៉ុនប៉ង ដែលនាំទៅដល់ការផ្តល់លក្ខណៈត្រឹមត្រូវតាមច្បាប់ ដល់ការបង្កហេតុនៅអ៊ុយក្រែន ដើម្បី បំបែកបំបាក់មជ្ឈដ្ឋានសាសនា។
ចំណែកវិហារអ័រថូដុក្សប៉ូឡូញ និង ប៊ុលហ្ការី ទប់ខ្លួនមិនបញ្ចេញយោបល់អ្វីណាទេ ចំពោះ ការផ្តាច់ចំណង រវាង ម៉ូស្គូ និង កុងស្តង់ទីណូប ដរាបណាដែលគេមិនទាន់ទទួលសេចក្តីជូនដំណឹងជាផ្លូវការ។
វិហារអ័រថូដុក្សនៅហ្ស៊កហ្ស៊ីវិញ បានឲ្យដឹងថា គេនឹងចាត់ចែងការរួមប្រជុំនៃសភាសង្ឃ ដើម្បីអារកាត់ថា តើគោលជំហរណា ដែលត្រូវប្រកាន់យក។
កាលពីថ្ងៃទី៣១ តុលា លោកប្រធានាធិបតីរុស្ស៊ី វ៉្លាឌីមៀរ ពូទីន បានព្រមានអំពី “ផលវិបាកធ្ងន់ធ្ងរបំផុត” បណ្តាលមកពីការបែកបាក់ រវាងវិហារអ័រថូដុក្ស ក្រោយពី ប្រមុខគ្រិស្ដសាសនាអ័រថូដុក្សក្រុងកុងស្តង់ទីណូប បានទទួលស្គាល់ លក្ខន្តិកៈឯករាជ្យនៃវិហារអ័រថូដុក្សអ៊ុយក្រែន។ ថ្លែងក្នុងសម័យប្រជុំនៃជនរួមជាតិរុស្ស៊ី រស់នៅបរទេស ដែលបានប្រព្រឹត្តទៅនៅម៉ូស្គូ លោក ពូទីន បានធ្វើការគូសបញ្ជាក់ថា ការផ្តល់លក្ខណៈនយោបាយដល់វិស័យសាសនា ដែលជារឿងរសើបបែបនេះ ជានិច្ចជាកាល គឺតែងបង្កឲ្យមានផលប៉ះពាល់ធ្ងន់ធ្ងរបំផុត ជាបឋមគឺ សម្រាប់ ពួកមេនាំអាទិ៍ទង្វើនេះ។
នេះជាលើកដំបូង ដែលលោកប្រធានាធិបតីរុស្ស៊ីបានបញ្ចេញមតិខ្លួន អំពី វិបត្តិកើតឡើង ក្រោយពីប្រមុខគ្រិស្តសាសនាអ័រថូដុក្សក្រុងកុងស្តង់ទីណូបបានប្រកាសទទួលស្គាល់ឯករាជ្យនៃវិហារអ៊ុយក្រែន ដែលតាំងពី ឆ្នាំ១៦៨៦ មក តែងបានស្ថិតនៅក្រោមអាណាព្យាបាលនៃវិហារម៉ូស្គូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ