អាមេរិកត្រលប់ទៅជួបចរចាជាមួយចិនដើម្បីសម្រេចឲ្យបាននូវកិច្ចព្រមព្រៀងពាណិជ្ជកម្ម
គណៈប្រតិភូជាន់ខ្ពស់អាមេរិក នឹងត្រលប់ទៅជួបពិភាក្សាជាមួយសមភាគីចិន ក្នុងទីក្រុងប៉េកាំង ដើម្បីសម្រេចឲ្យបាននូវកិច្ចព្រមព្រៀងពាណិជ្ជកម្មថ្មីរួមគ្នាមួយ នៅចន្លោះថ្ងៃទី ២៨-២៩ ខែមីនាខាងមុននេះ។ នេះបើតាមការប្រកាសឲ្យដឹងពីក្រសួងពាណិជ្ជកម្មចិននៅថ្ងៃព្រហស្បតិ៍ ទី ២១ មីនានេះ។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីការចរចាបន្តបន្ទាប់ប្រព្រឹត្តទៅនៅតែមិនអាចសម្រេចបានលទ្ធផលល្អ ភាគីអាមេរិក និងចិននៅតែបន្តការចរចាជាមួយគ្នាដើម្បីឆ្ពោះទៅទម្លុះទម្លាយភាពទាល់ច្រកពាណិជ្ជកម្មរវាងគ្នា។ ជាក់ស្តែង អ្នកនាំពាក្យក្រសួងពាណិជ្ជកម្មចិនលោក Gao Feng បានឲ្យដឹងថា តំណាងគណៈប្រតិភូពាណិជ្ជកម្មអាមេរិកលោក Robert Lighthizer និងលេខាធិការក្រសួងរតនាគារលោក Steven Mnuchin នឹងវិលត្រឡប់មកកាន់ទីក្រុងប៉េកាំង នៅសប្តាហ៍ក្រោយ។ ។ លោក Gao បានឲ្យដឹងទៀតថា ក្រុមអ្នកចរចាចិននៅខែមេសាខាងមុខនេះ ក៏នឹងត្រលប់ទៅកាន់ទីក្រុងវ៉ាស៊ីនតោនសាជាថ្មីទៀតដើម្បីបន្តកិច្ចពិភាក្សាអំពីបញ្ហាពាណិជ្ជកម្មជាមួយភាគីអាមេរិកវិញដែរ។
គួរជម្រាបជូនថា ក្នុងរយៈពេល៨ខែ ចុងក្រោយនេះ សហរដ្ឋអាមេរិក និងចិន បានយកពន្ធលើមុខទំនិញនាំចូល រវាងគ្នាទៅវិញទៅមក ក្នុងតម្លៃទឹកប្រាក់ប្រមាណជា ៣៦០ ពាន់លានដុល្លារសហរដ្ឋអាមេរិក។ និន្នាការនេះ បានធ្វើឲ្យប៉ះពាល់ដល់ក្រុមហ៊ុនសហគ្រាសក្នុងប្រទេសទាំងពីរមិនតិចនោះទេ។
ទោះបីជាកិច្ចចរចាពាណិជ្ជកម្មរវាងអាមេរិក និងចិនមានភាពជឿនលឿនខ្លះយ៉ាងណាក្តី ក៏ប៉ុន្តែភាគីទាំងពីរមិនងាយនឹងសម្រេចបាននូវកិច្ចព្រមព្រៀងនោះទេ។ អាមេរិកតែងតែទាមទារឲ្យចិនធ្វើពាណិជ្ជកម្មដោយស្មើភាព ប៉ុន្តែក្រុមអ្នកវិភាគនិយាយហើយថា ចិនមានការស្ទាក់ស្ទើរក្នុងការធ្វើសម្បទានណាមួយ ដែលអាចធ្វើឲ្យប៉ះពាល់ដល់អំណាចរបស់បក្សកុម្មុយនីស្តចិន។
ជាក់ស្តែង ចិនប្រហែលជាពិបាកឆ្លើយតបទៅនឹងការចង់បានរបស់អាមេរិក ដែលចង់ឲ្យក្រុមហ៊ុន និងសហគ្រាសបរទេស រកស៊ីនៅក្នុងប្រទេសចិនបាន ដោយមិនបាច់ត្រូវផ្ទេរបច្ចេកវិទ្យាទៅឲ្យដៃគូចិន ឬមួយក៏មានសិទ្ធិទទួលបានផលដូចក្រុមហ៊ុនក្នុងស្រុកដែរ។
គួរកត់សម្គាល់ថា នៅគ្រាកន្លងមក លោកប្រធានាធិបតីអាមេរិកដូណាល់ ត្រាំ រំពឹងថាអាចសម្រេចបានកិច្ចព្រមព្រៀង និងបិទបញ្ចប់កិច្ចរចរចា នៅឯកិច្ចប្រជុំកំពូលមួយជាមួយលោកស៊ី ជីនពីងប្រធានាធិបតីចិន នៅចុងខែមីនានេះ។ ក៏ប៉ុន្តែ កាលផុតកំណត់ ត្រូវបានពន្យារដោយសារលទ្ធផលនៃកិច្ចពិភាក្សាមិនសូវរីកចម្រើនទៅមុខដូចការរំពឹងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ