ច្បាប់ថ្មីរបស់សហភាពអឺរ៉ុប ស្ដីពីការការពារទិន្នន័យ ចូលជាធរមាន
បន្ទាប់ពីករណីជាច្រើនទាក់ទឹនទៅនឹងការលេចធ្លាយទិន្នន័យ ឬទិញ-លក់ទិន្នន័យឯកជននៅលើបណ្ដាញអ៊ីនធ័រនែត បានកើតមានឡើងកន្លងមក ច្បាប់ស្ដីពីការការពារទិន្នន័យនៅអឺរ៉ុប ត្រួវបានកែសម្រួលឡើងវិញ ហើយច្បាប់ថ្មីនេះចូលជាធរមាន នៅថ្ងៃសុក្រ ទី២៥ ខែឧសភា។ ច្បាប់ថ្មីស្ដីពីការការពារទិន្នន័យឯកជននេះ នឹងចាប់ផ្ដើមដំបូងដោយអនុវត្តទៅលើក្រុមហ៊ុនធំៗ ដែលប្រើប្រាស់ព័ត៌មានសម្រាប់ផ្សាយពាណិជ្ជកម្ម ហើយក្រុមហ៊ុនខ្នាតតូចនានាអាចសម្របតាមបណ្ដើរៗ។
ចុះផ្សាយនៅថ្ងៃ៖
ស្តាប់ - ០២:០៤
សហភាពអឺរ៉ុបបានធ្វើការកែប្រែនូវច្បាប់ស្ដីពីការការពារទិន្នន័យទូទៅ ដែលហៅកាត់ថា GDPR។ នេះគឺជាវិធានការមួយរបស់សហភាពអឺរ៉ុប ក្នុងការបង្កើនការការពារទិន្នន័យឯកជនប្រជាពលរដ្ឋរបស់ខ្លួន អោយកាន់តែមានប្រសិទ្ធភាព។ ច្បាប់នេះត្រូវបានកែសម្រួលនិងបញ្ចូលបន្ថែមនូវបទបញ្ញត្តិមួយចំនួន ហើយចូលជាធរមានចាប់ពីថ្ងៃសុក្រ ទី២៥ ខែឧសភា។
បទបញ្ញត្តិសំខាន់ៗ កំណត់ទៅលើអង្គភាពសាធារណៈនិងក្រុមហ៊ុនឯកជន ក្នុងនោះរួមមានដូចជា ការប្រមូលយកទិន្នន័យរបស់អ្នកប្រើប្រាស់ដែលស្ថិតនៅក្នុងសហភាពអឺរ៉ុប ការផ្ទុកនិងការបញ្ជូនទិន្នន័យទាំងនោះទៅកាន់ភាគីទី៣ ត្រូវបានដាក់ឡើងនៅក្នុងច្បាប់ការពារទិន្នន័យថ្មីនេះ។ អង្គភាពទាំងនោះ ត្រូវបើកចំហជាងមុនអំពីទិន្នន័យដែលពួកគេទទួលបាន ហើយពួកគេប្រើប្រាស់ទិន្នន័យទាំងនោះយ៉ាងដូចម្ដេច។
ចំពោះបុគ្គលឯកជន ពួកគេត្រូវផ្តល់នូវការអនុញ្ញាតអោយបានជាក់លាក់សម្រាប់ការប្រើប្រាស់ទិន្នន័យរបស់ពួកគេ ហើយពួកគេមានសិទ្ធិបញ្ឍប់ការផ្ទេរទិន្នន័យទៅភាគីទី៣ ឬស្នើអោយលុបចោលនូវទិន្នន័យទាំងនោះ។
សហភាពអឺរ៉ុប បានអះអាងថា ច្បាប់នេះនឹងក្លាយទៅជាស្តង់ដារពិភពលោកមួយសម្រាប់ការការពារព័ត៌មាននៅលើបណ្តាញអ៊ីនធឺរណែត ជាពិសេសបន្ទាប់ពីមានរឿងអាស្រូវលេចធ្លាយទិន្នន័យអ្នកប្រើប្រាស់របស់ហ្វេសប៊ុករហូតដល់ទៅជិត៨៧លាននាក់។
ប្រធានហ្វេកប៊ុក បានលើកឡើងនៅក្នុងពេលចួលបំភ្លឺរបស់លោកនៅសភាអឺរ៉ុបកាលពីថ្ងៃអង្គារ៍ ទី២២ ឧសភា ថា ក្រុមហ៊ុនហ្វេសប៊ុកនឹងអនុវត្តគោរពតាមការកំណត់របស់ច្បាប់ការពារទិន្នន័យថ្មីរបស់សហភាពអឺរ៉ុប ហើយហ្វេសប៊ុកនឹងធ្វើការវិនិយោគខ្នាតធំៗ ដើម្បីការពារទិន្នន័យអ្នកប្រើប្រាស់របស់ខ្លួន។
ក្រុមហ៊ុនបណ្ដាញទំនាក់ទំនងសង្គមធំៗផ្សេងទៀតដូចជា Whatsapp និង Twitter ក៏បានបង្ហាញនូវការត្រៀមខ្លួនរួចជាស្រេចក្នុងការអនុវត្តច្បាប់ថ្មីនេះផងដែរ។ ចំណែកឯក្រុមហ៊ុនជំនួញខ្នាតតូចជាច្រើន បានសម្ដែងនូវការព្រួយបារម្ភចំពោះការអនុវត្តច្បាប់ថ្មីនេះ។
តែមន្ត្រីសហភាពអឺរ៉ុប បានអោយដឹងថា ដំបូងច្បាប់ការពារទិន្នន័យនេះ ថ្មីនេះនឹងផ្តោតសំខាន់តែលើក្រុមហ៊ុនបច្ចេកវិទ្យាធំៗ ហើយក្រុមហ៊ុនខ្នាតតូចនានាអាចសម្របតាមបណ្ដើរៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ