តើវិបត្តិអត្រាកំណើតធ្លាក់ចុះនៅក្នុងប្រទេស គឺជាកំហុសរបស់ស្ត្រីជប៉ុនមែនឬទេ?
ចុះផ្សាយនៅថ្ងៃ៖
ស្តាប់ - ០៥:១៨
នៅថ្ងៃអាទិត្យ ទី៣ កុម្ភៈ ឆ្នាំ ២០១៩ ឧបនាយករដ្ឋមន្ត្រីជប៉ុនលោកថារ៉ូ អាសូ (Taro Aso) បាននិយាយថា វិបត្តិប្រជាសាស្ត្រ ដែលប្រទេសជប៉ុនបាននិងកំពុងពើបប្រទះ គឺជាកំហុសរបស់ស្ត្រីជប៉ុន។ អ្នកនយោបាយអភិរក្សនិយមវ័យ ៧៨ឆ្នាំរូបនេះ សង្កត់ធ្ងន់ថា វាមិនមែនជារឿងត្រឹមត្រូវទេ ដែលមនុស្សជាច្រើន នាំគ្នាទៅស្តីបន្ទោសមនុស្សចាស់ថា ជាឧបសគ្គរាំងស្ទះដល់ដំណើរការអិភវឌ្ឍន៍ របស់ប្រទេសជាតិនោះ។ ក៏ប៉ុន្តែ អ្នកដែលគួរត្រូវស្តីបន្ទោសនោះ គឺស្រ្តី ដែលមិនព្រមផ្តល់កំណើតឲ្យក្មេងៗវិញឯណេះទេ។ ហេតុអ្វីបានជា ឧបនាយករដ្ឋមន្ត្រីលោកអាសូ ស្តីបន្តោសថា ស្ត្រីគឺជាអ្នកធ្វើឲ្យប្រទេសជប៉ុនមានវិបត្តិប្រជាសាស្ត្រ? តើការស្តីបន្ទោសនេះ ជាការត្រឹមត្រូវដែរឬទេ?
ប្រទេសជប៉ុន គឺជាប្រទេសជឿនលឿនខ្លាំង និងក៏ជាប្រទេសមានសេដ្ឋកិច្ចធំជាងទី ៣ ក្នុងពិភពលោកដែរ។ ក៏ប៉ុន្តែ ជប៉ុនបានពើបប្រទះនឹងបញ្ហាសេដ្ឋកិច្ច ដោយសារតែ ចំនួនមនុស្សចាស់កើនច្រើនលើសលុប ខណៈពេលដែលអត្រាកំណើតវិញធ្លាក់ចុះទាបខ្លាំង។
ជាក់ស្តែង បើយោងតាមស្ថិតិចេញដោយ ក្រសួងសុខាភិបាលជប៉ុន នាឆ្នាំ ២០១៧ កន្លងទៅ អត្រាកណើត នៅក្នុងប្រទេសមានប្រមាណជា ៩ សែន ៥ ម៉ឺននាក់ ខណៈពេលដែលអត្រាមនុស្សស្លាប់វិញមានចំនួនច្រើនរហូតដល់ប្រមាណជា ១ លាន ៣ សែននាក់ឯណោះ។
បញ្ហាប្រជាសាស្ត្រ គឺជាបញ្ហាប្រឈមខ្លាំង និងបានផ្ទុះឡើងក្នុងប្រទេសជប៉ុន ចាប់តាំងពី១៩៧០ មកម្ល៉ោះ។ ដោយសាតែ អត្រាកំណើតចេះតែបន្តធ្លាក់ចុះគួរឲ្យបារម្ភ ទើបលោកថារ៉ូ អាសូ ដែលមានតួនាទីជាឧបនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុផង បានថ្លែងនៅក្នុងកិច្ចប្រជុំមួយ កាលពីថ្ងៃទី៣ កុម្ភៈឆ្នាំ២០១៩ ថា គូស្វាមី-ភរិយាវ័យក្មេង ជាពិសេស្ត្រីដែលមិនចង់បានកូន គឺជាចំណោទនៃបញ្ហា។ ពួកគេ ជាអ្នកធ្វើឲ្យអត្រាកំណើតធ្លាក់ទាប និងជាដើមចម ដែលធ្វើឲ្យកត្តាប្រជាសាស្ត្ររបស់ប្រទេសមួយអាស៊ីនេះ ធ្លាក់ចូលក្នុងវិបត្តិធ្ងន់ធ្ងរទៅៗ ពីមួយឆ្នាំទៅមួយឆ្នាំ។
គួរជម្រាបជូនថា នេះមិនមែនជាលើកទី១ ទេ ដែលក្រុមអ្នកនយោបាយអភិរក្សនិយមជប៉ុន ស្តីបន្ទោសលើប្តីប្រពន្ធក្មេងៗ ជាពិសេសស្ត្រីៗជប៉ុនតែម្តង ជុំវិញទំនោរធ្លាក់ចុះខ្លាំងឡើង នៃអត្រាកំណើត នៅក្នុងប្រទេស។
ជាក់ស្តែង កាលពីខែមិថុនា ឆ្នាំ២០១៨ កន្លងទៅ លោកតូហ្សីហ៊ីរូ នីកៃ រដ្ឋលេខាធិការ របស់គណបក្សកាន់អំណាចសព្វថ្ងៃ ដែលមានលោកស្ហីនហ្សូ អាបេ ជាប្រមុខដឹកនាំ ក៏បានបញ្ចេញទស្សនៈវាយប្រហារ គ្រួសារដែលមិនព្រមយកកូនដែរ។ លោកតូហ្សីហ៊ីរូ បាននិយាយថា ប្តីប្រពន្ធ ដែលមិនព្រមយកកូន គឺជាមនុស្សអាត្មានិយម។ លោកថា ភាពលំបាកមិនមែនជាឧបសគ្គអ្វី ក្នុងការចិញ្ចឹមកូននោះទេ។
មួយវិញទៀត សមាជិកមួយចំនួនទៀត របស់គណបក្សកាន់អំណាចជប៉ុន ក៏បានលើកឡើងដែរថា ស្ត្រីជប៉ុនគួរតែបង្កើតកូន យ៉ាងហោចណស់ ក៏ឲ្យបានបីនាក់ដែរ ហើយថាស្ត្រីដែលនៅលីវ និងមិនចង់បានគ្រួសារ ពួកគេអាចក្លាយជាបន្ទុករបស់រដ្ឋ នៅពេលចាស់ទៅ។
គួរជម្រាបជូនថា ក្រោយមានផ្ទុះការស្តីបន្ទោសជាបន្តបន្ទាប់ទៅលើស្ត្រី ពីសំណាក់ ក្រុមអ្នកនយោបាយអភិរក្សនិយម មកពីបក្សកាន់អំណាច ជាពិសេស ពីសំណាក់លោកឧបនាយករដ្ឋមន្ត្រីអាសូ រួចមក ក្រុមសមាជិកបក្សប្រឆាំង បាននាំគ្នាចេញមុខ រិះគន់ជាខ្លាំង។
ជាក់ស្តែង មួយថ្ងៃក្រោយការថ្លែងរបស់លោកអាសូ ពោលនៅថ្ងៃទី៤ កុម្ភៈ ឆ្នាំ ២០១៩ លោក ត្រូវគេបង្ខំឲ្យដកពាក្យសម្តី ដែលលោកបានភ្ជាប់ស្ត្រី ដែលគ្មានកូន ទៅនឹងវិបត្តិប្រជាសាស្ត្រ។ វិបត្តិប្រជាសាស្ត្រ ដែលមានន័យថា ខ្វះមនុស្សពេញវ័យ ធ្វើការដើម្បីទ្រទ្រង់សេដ្ឋកិច្ចជាតិ និងរួមចំណែក ផ្តល់ថវិកា ជួយដល់មនុស្សចាស់ ដែលចូលនិវត្តន៍ និងសេវាថែទាំសុខភាពសង្គម។
សូមជ្រាបថា បន្ទាប់ពី រងការរិះគន់យ៉ាងចាស់ដៃ ពីសំណាក់ក្រុមបក្សប្រឆាំងរួចមក លោករដ្ឋមន្ត្រីហិរញ្ញវត្ថុអាសូ ក៏បានចេញមុខសុំទោសជាសាធារណៈ ចំពោះការលើកឡើងរបស់លោក ដែលថាស្ត្រីគួរត្រូវស្តីបន្ទោស ជុំវិញបញ្ហាប្រឈម ដែលធ្វើឲ្យអត្រាកំណើត របស់ប្រទេសជប៉ុនមានការធ្លាក់ចុះខ្លាំង។ ជាពិសេស អត្រាកំណើតក្នុងឆ្នាំ ២០១៨ ដែលមានត្រឹមតែប្រមាណជាង ៩២ ម៉ឺននាក់ និងជាអត្រា ដែលទាបបំផុតក្នុងប្រវត្តិសាស្តរបស់ប្រទេសជប៉ុន ក្នុងរយៈពេល ជាងមួយសតវត្សរ៍កន្លងមកនេះ។
សរុបសេចក្តីមក តើនរណាដែលគេគួរស្តីបន្ទោសពាក់ព័ន្ធនឹងបញ្ហាប្រជាសាស្ត្រ ដែលបានញាំញីសេដ្ឋកិច្ចរបស់ប្រទេសជប៉ុនអស់ជាច្រើនទសវត្សរ៍កន្លងមកនេះ?
តាមពិតទៅ និន្នាការធ្លាក់ចុះអត្រាកំណើត មិនមែនមាននៅតែជប៉ុននោះទេ។ វាក៏កើតមានផងដែរ នៅក្នុងបណ្តាប្រទេសជឿនលឿនជាច្រើនទៀតដូចជា សិង្ហបុរី កូរ៉េខាងត្បូង កាណាដា និងសហរដ្ឋអាមេរិក ជាដើម។ ក៏ប៉ុន្តែ ខុសគ្នាត្រង់ថា ជប៉ុនមានអត្រាកំណើតធ្លាក់ចុះខ្លាំង បើប្រៀបធៀបជាមួយនឹង ប្រទេសអភិវឌ្ឍន៍ដទៃទៀត។
មួយវិញទៀត បើតាមអ្នកជំនាញផ្នែកប្រជាសាស្ត្រជប៉ុន មានកត្តាចំបងមួយចំនួន ដែលទាញសង្គមជប៉ុន ឲ្យធា្លក់ទៅក្នុងរណ្តៅនៃវិបត្តិបាត់បង់កម្លាំងពលកម្មសកម្មនេះ។ កត្តាទាំងនោះរួមមាន ទី១៖ បញ្ហាថវិកា ដែលឳពុកម្តាយជប៉ុនចាំបាច់ ត្រូវការយ៉ាងច្រើន ដើម្បីចំណាយក្នុងការចិញ្ចឹមបីបាច់និងថែរក្សាកូន។ ចំណែកឯ កត្តាបន្ទាប់នោះគឺ៖ កង្វះសេវាថែទាំកុមារ និងទី៣ គឺកត្តាវេលា។ វេលា ដែលប្រជាជនជប៉ុន ភាគច្រើន ចំណាយតែនៅកន្លែងធ្វើការងារ និងគ្មានពេលគ្រប់គ្រាន់ដើម្បីមើលថែកូន។
ទាក់ទងនឹងរឿងនេះដែរ លោក Jeff Kingston សាស្រ្តាចារ្យជំនាញផ្នែកភូមិសាស្ត្រនយោបាយជប៉ុន របស់សាកលវិទ្យាល័យ The Temple មានទីតាំងនៅសហរដ្ឋអាមេរិក បានលើកឡើងថា ដើម្បីដោះស្រាយវិបត្តិប្រជាសាស្ត្រ រដ្ឋាភិបាលជប៉ុន គួរគិតគូរ ជួយសម្រួល ដល់តុល្យភាពជីវិតការងារ និងជីវិតឯកជនរបស់ប្រជាជន។ វិធីសាស្ត្រនេះ គួរត្រូវបានយកទៅអនុវត្តក្នុងសង្គមជប៉ុនបន្ថែមទៀត ប្រសើរជាជាង ស្តីថាឲ្យស្ត្រី ដែលគ្មានកំហុសអ្វីទៅវិញនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ