ក្រុមហ៊ុនហ្វេសប៊ុក លុបទំព័រហ្វេសប៊ុកដែលជាប់ពាក់ព័ន្ធនឹងយោធាភូមា
នៅថ្ងៃពុធ ទី១៩ ធ្នូ នេះ ក្រុមហ៊ុនហ្វេសប៊ុក បានលុបចេញនូវ ទំព័រនិងគណនីរាប់រយ នៅភូមា ដោយសារតែ ទំព័រនិងគណនីហ្វេសប៊ុកទាំងអស់នោះ មានទំនាក់ទំនងជាមួយនឹងពួកយោធាភូមា។ យុទ្ធនាការរបស់ក្រុមហ៊ុនហ្វេសប៊ុកនេះ ធ្វើឡើងគឺដើម្បីឆ្លើយតបទៅនឹងការរិះគន់ដែលថាហ្វេសប៊ុក បរាជ័យក្នុងការគ្រប់គ្រងការផ្សព្វផ្សាយព័ត៌មានមិនពិតនិងមានលក្ខណៈញុះញង់ ដែលជំរុញឲ្យមានការរើសអើងលើ ជនជាតិភាគតិចរ៉ូហ៊ីងយ៉ា កើនឡើងនៅក្នុងប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ទំព័រហ្វេសប៊ុកចំនួន៤២៥ទំព័រ ទំព័រក្រុមចំនួន១៧ ព្រមទាំងគណនីហ្វេសប៊ុកចំនួន១៣៥ និងគណនី Instagram ចំនួន១៥ របស់ភូមា ត្រូវបានលុបចេញនៅថ្ងៃពុធនេះ។ ក្រុមហ៊ុនហ្វេសប៊ុកបានបញ្ជាក់ប្រាប់ថា ទំព័រ និងគណនីបណ្តាញសង្គមទាំងនោះ បើមើលពីក្រៅគឺមានលក្ខណៈជា ទំព័រសារព័ត៌មានឯករាជ្យ កំសាន្ត សម្រស់ និងផ្សព្វផ្សាយពីរបៀបរស់នៅ។ ប៉ុន្តែ តាមពិតទៅទំព័រទាំងនោះ មានទំនាក់ទំនងសម្ងាត់ជាមួយក្រុមកងទ័ពភូមា។
សូមជ្រាបថា ហ្វេសប៊ុក គឺជាបណ្តាញសង្គមដែលមានប្រជាប្រិយភាព និងឥទ្ធិពលខ្លាំងបំផុតនៅក្នុងប្រទេសភូមា។ នៅគ្រាកន្លងមក មានការរិះគន់ថាហ្វេសប៊ុក បានចូលរួមចំណែកផងដែរ ក្នុងការបញ្ឆេះការប្រឆាំង ការស្ពប់ខ្ពើមចំពោះក្រុម រ៉ូហ៊ីងយ៉ាកាន់សាសនាអ៊ីស្លាម ដែលជាជនជនភាគតិចរស់នៅក្នុង រដ្ឋរ៉ាឃីន ភាគខាងជើងប្រទេសភូមា។
ក្រោយផ្ទុះការរិះគន់ក្នុងប្រទេសភូមា ក្រុមហ៊ុនហ្វេសប៊ុក បានព្យាយាមកសាងកេរ្តិ៍ឈ្មោះរបស់ខ្លួនឡើងវិញ តាមរយៈការគ្រប់គ្រងព័ត៌មានមិនពិត ជាពិសេសព័ត៌មានទាំងឡាយណាដែលមានលក្ខណៈញុះញង់ និងបង្ហឲ្យមានការរើសអើងជាតិសាសន៍ និងបង្កជាអសន្តិសុខផ្សេងៗក្នុងសង្គមភូមា។ ជាក់ស្តែង ក្រុមហ៊ុនបានប្តេជ្ញាបង្កើនបុគ្គលិកផ្នែកវាយតម្លៃភាសាភូមា របស់ខ្លួនរហូតដល់ចំនួន១០០នាក់នៅចុងឆ្នាំ២០១៨នេះ ។
ទោះជាបែបនេះក្តី មានមតិរិះគន់មួយចំនួន លើកឡើងថា ចំណាត់ការរបស់ក្រុមហ៊ុនហ្វេសប៊ុកនេះ នៅមិនទាន់គ្រប់គ្រាន់នៅឡើយទេ ក្នុងយុទ្ធនាការត្រួតពិនិត្យគណនីហ្វេសប៊ុកដែលមានប្រមាណជា ២០លានគណនី នៅក្នុងប្រទេសភូមានាពេលបច្ចុប្បន្ននេះ។
គួររំឭកជូនថា ការផ្សព្វផ្សាយព័ត៌មានមិនពិត តាមរយៈទំព័រសង្គមដ៏ធំដូចជាហ្វេសប៊ុក ត្រូវបានគេព្រួយបារម្ភយ៉ាងខ្លាំង ដោយសារវាអាចជំរុញឲ្យមានអំពើហឹង្សាប្រឆាំងនឹងក្រុមរ៉ូហ៊ីងយ៉ាកើនឡើង។ ជាពិសេស បញ្ហានេះត្រូវបានគេយកចិត្តទុកដាក់ជាខ្លាំង បន្ទាប់ពីមានជនជាតិភាគតិចរ៉ូហ៊ីងយ៉ាចំនួនជាង ៧២ម៉ឺននាក់ បានរត់ភៀសខ្លួនពីប្រទេសភូមាទៅកាន់ប្រទេសបង់ក្លាដេស ដោយសារការធ្វើទុក្ខបុកម្នេញពីសំណាក់យោធា និងពលរដ្ឋភូមា កាលពីឆ្នាំ២០១៧ កន្លងទៅថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ