សវនាការកាត់ក្តី អតីតនាយករដ្ឋមន្ត្រីម៉ាឡេស៊ីលោកណាជីប ត្រូវពន្យារពេល
អតីតនាយករដ្ឋមន្រ្តីម៉ាឡេស៊ីលោកណាជីប រ៉ាហ្សាក់ ត្រូវចូលខ្លួនក្នុងតុលាការដើម្បីទទួលការជំនុំជម្រះក្តី លើករណីចោទប្រកាន់ពីបទប្រព្រឹត្តអំពើពុករលួយ នៅថ្ងៃអង្គារ ទី១២ កុម្ភៈ ឆ្នាំ២០១៩។ ក៏ប៉ុន្តែ សវនាការជំនុំជម្រះក្តីនេះ ត្រូវបានពន្យារពេលទៅវិញ ហើយតុលាការម៉ាឡេស៊ី នៅមិនទាន់បានកំណត់ពីកាលបរិច្ឆេទថ្មីនៃការកាត់ក្តីនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
តុលាការឧទ្ធរណ៍ម៉ាឡេស៊ី នៅថ្ងៃចន្ទ ទី ១១ កុម្ភៈ ឆ្នាំ២០១៩ បានប្រកាសយល់ព្រម ពន្យារពេលកាត់ក្តីលើករណីសង្ស័យពុករលួយរបស់លោកណាជីប រ៉ាហ្សាក់ ទៅតាមសំណើរបស់មេធាវីលោក។ មេធាវីការពារក្តីឲ្យលោកអតីតនាយករដ្ឋមន្ត្រីណាជីប បានស្នើសុំពន្រយាពេលជំនុំជម្រះក្តីនេះ ដោយសំអាងលើហេតុផលថា មានបញ្ហាបច្ចេកទេសមួយចំនួនដែលនាំឲ្យលោកនិងកូនក្តីគឺលោកណាជីប មិនអាចចូលខ្លួនក្នុងសវនាការតាមកាលកំណត់បានឡើយ។
សូមជម្រាបជូនថា ការសម្រេចរបស់តុលាការពន្យារពេលកាត់ក្តីនេះបានធ្វើឲ្យប្រជាពលរដ្ឋម៉ាឡេស៊ីខកចិត្ត ដោយសារដំណើរការក្នុងការស្វែងរកយុត្តិធម៌ពាក់ព័ន្ធនឹងករណីសង្ស័យពីការកេងបន្លំថវិកាជាតិរបស់លោកណាជីប មិនអាចប្រព្រឹត្តទៅបានក្នុងពេលឆាប់ៗនេះ។
តែទោះជាយ៉ាងណាក្តី មន្ត្រីតុលាម៉ាឡេស៊ីម្នាក់បានអះអាងថា សវនាការនឹងមិនពន្យារពេលយូរនោះទេ។ លោកសង្ឃឹមថា ការកាត់ក្តីនឹងធ្វើឡើងក្នុងរយៈពេលតែ ១ ឬ ២ សប្តាហ៍ទៀតតែប៉ុណ្ណោះ។
គួររឭកជូនថា រឿងអាស្រូវពុករលួយ បានរុញច្រានឲ្យលោកណាជីប រ៉ាហ្សាក់ ចាញ់ការបោះឆ្នោតនិងខ្ទាតចេញពីតំណែងជានាយករដ្ឋមន្ត្រីកាលពីខែឧសភា ឆ្នាំ២០១៨ កន្លងទៅ។
ក្រោយពីបាត់បង់តំណែងជានាយករដ្ឋមន្ត្រីភ្លាមមក លោកណាជីប ត្រូវបានចាប់ខ្លួនដោយរងបទចោទប្រកាន់ថាមានជាប់ពាក់ព័ន្ធទៅនឹងករណីក្លែងបន្លំថវិការដ្ឋចំនួន ៤៩ ករណី ពីធនាគារអភិវឌ្ឍន៍ម៉ាឡេស៊ី (1MDB) ។ 1MDB ជាគម្រោង បង្កើតឡើងដើម្បីជួយអភិវឌ្ឍដល់សេដ្ឋកិច្ចម៉ាឡេស៊ី។ លោកណាជីប និងបក្សពួករងបទចោទថាបានលួចប្រាក់រាប់ពាន់លានដុល្លារ ពីគម្រោងមួយនេះ។
តែទោះជាបែបនេះក្តី ក៏រហូតមកដល់ពេលនេះ អតីតមេដឹកនាំម៉ាឡេស៊ីលោកណាជីប នៅតែបដិសេធថាលោកមិនបានប្រព្រឹត្តអំពើពុករលួយ ដូចជាការចោទប្រកាន់របស់តុលាការឡើយ។ លោកណាជីប រ៉ាហ្សាក់ ព្រមទាំងបក្សពួក បានចាត់ទុកការចោទប្រកាន់ខាងលើ ថាជាការសងសឹករបស់រដ្ឋាភិបាលថ្មីដែលដឹកនាំដោយលោកម៉ាហាធា ម៉ូហាម៉េដ តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ