រុស្ស៊ីបណ្តេញមន្រ្តីទូតអាមេរិក៦០នាក់ជាការសងសឹក
កាលពីថ្ងៃព្រហស្បតិ៍ម្សិលមិញ រុស្ស៊ីបានប្រកាសបណ្តេញមន្រ្តីទូតអាមេរិក ចំនួន ៦០នាក់ ព្រមទាំងបិទស្ថានអគ្គកុងស៊ុលអាមេរិក នៅក្នុងទីក្រុង Saint-Pétersbourg ដើម្បីជាការសងសឹកចំពោះសហរដ្ឋអាមេរិកដែលបានធ្វើដូចគ្នាចំពោះរុស្ស៊ី នៅក្នុងសំណុំរឿងបំពុលអតីតភ្នាក់ងារចារកិច្ចនៅអង់គ្លេស។
ចុះផ្សាយនៅថ្ងៃ៖
បណ្តេញមន្រ្តីទូត ៦០នាក់ និងបិទស្ថានអគ្គកុងស៊ុល១ គឺជាវិធានការតបដូចគ្នាបេះបិទ ទៅនឹងអ្វីដែលអាមេរិកបានធ្វើចំពោះរុស្ស៊ី ហើយលោក ស៊ែរហ្គៃ ឡាវរ៉ូហ្វ រដ្ឋមន្រ្តីក្រសួងការបរទេសរុស្ស៊ី ក៏បានឲ្យដឹងផងដែរថា រុស្ស៊ីនឹងឆ្លើយតបដូចគ្នា ចំពោះប្រទេសផ្សេងទៀត ដែលបានរួមដៃគ្នាជាមួយអាមេរិក និងអង់គ្លេស បណ្តេញមន្រ្តីទូតរុស្ស៊ី។
គួររំឭកឡើងវិញថា ភ្លាមៗក្រោយពីមានការបំពុលអតីតភ្នាក់ងារចារកិច្ចរុស្ស៊ី ព្រមទាំងកូនស្រី អង់គ្លេសបានដាក់ការទទួលខុសត្រូវទៅលើរដ្ឋាភិបាលរុស្ស៊ី ហើយបានបណ្តេញមន្រ្តីទូតរុស្ស៊ី ចំនួន ២៣នាក់ចេញពីប្រទេស។ រុស្ស៊ីក៏បានឆ្លើយតបវិញរួចទៅហើយដែរ ចំពោះវិធានការរបស់អង់គ្លេស។ ក្រោយមកទៀត អាមេរិក បួករួមជាមួយនឹងបណ្តាប្រទេសជាច្រើនផ្សេងទៀត ក្នុងនោះក៏រួមមានទាំងបារាំងផង ក៏បាននាំគ្នាបណ្តេញមន្រ្តីទូតរុស្ស៊ីចេញពីប្រទេសរៀងៗខ្លួនដែរ ដោយគិតជាសរុប មានមន្រ្តីទូតរុស្ស៊ីរហូតដល់ទៅជាង ១៥០នាក់ ត្រូវបានគេបណ្តេញចេញពីប្រទេស។
រហូតមកទល់នឹងពេលនេះ រុស្ស៊ីនៅតែប្រកាន់ជំហរដូចពីមុនដដែល គឺបដិសេធដាច់ខាតថាខ្លួនមិនមានជាប់ពាក់ព័ន្ធនឹងការបំពុលអតីតភ្នាក់ងារចារកិច្ចនៅអង់គ្លេសនោះទេ ហើយលោកស៊ែរហ្គៃ ឡាវរ៉ូហ្វ បានចោទអង់គ្លេសថាជាអ្នកបង្ខំឲ្យប្រទេសផ្សេងទៀតធ្វើសកម្មភាពប្រឆាំងនឹងរុស្ស៊ី។
ពីរដ្ឋធានីវ៉ាស៊ីងតោន មន្រ្តីអ្នកនាំពាក្យសេតវិមានបានលើកឡើងថា ការបណ្តេញមន្រ្តីទូត និងបិទស្ថានអគ្គកុងស៊ុលអាមេរិកដោយរុស្ស៊ីនៅពេលនេះ គឺជាការបង្ហាញឲ្យឃើញពីការធ្លាក់ចុះកាន់តែដុនដាបនៃទំនាក់ទំនងទ្វេភាគី ក៏ប៉ុន្តែថា អាមេរិកក៏បានគិតស្មានទុកជាមុនរួចទៅហើយដែរថា រុស្ស៊ីនឹងចាត់វិធានការបែបនេះ។
មន្រ្តីអ្នកនាំពាក្យក្រសួងការបរទេសអាមេរិកវិញបានព្រលយពាក្យថា អាមេរិកកំពុងតែពិចារណាចាត់វិធានការផ្សេងបន្ថែមទៀតប្រឆាំងនឹងរុស្ស៊ី ក្នុងពេលដែលឯកអគ្គរដ្ឋទូតអាមេរិកប្រចាំទីក្រុងម៉ូស្គូបានលើកឡើងពីលទ្ធភាពនៃការបង្កកទ្រព្យសម្បត្តិរបស់រុស្ស៊ី។
ក៏ប៉ុន្តែ រដ្ឋាភិបាលក្រុងម៉ូស្គូបានព្រមានរួចជាស្រេចហើយថា ក្រៅពីការបណ្តេញមន្រ្តីទូត និងបិទស្ថានអគ្គកុងស៊ុលអាមេរិក រុស្ស៊ីអាចនឹងចាត់វិធានការផ្សេងទៀត ប្រសិនបើអាមេរិកបន្តធ្វើសកម្មភាពប្រឆាំងនឹងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ