វៀតណាម៖ នយោបាយឡើងកម្តៅខ្លាំងមុនសមាជបក្សកុម្មុយនិស្ត
គណបក្សកុម្មុយនិស្តវៀតណាម នឹងចាប់ផ្តើមបើកធ្វើសមាជបក្ស នៅថ្ងៃព្រហស្បតិ៍ ២១ មករា ខាងមុខនេះ ដើម្បីជ្រើសរើសមេដឹកនាំអាណត្តិថ្មី។ ជាទូទៅ នៅក្នុងប្រទេសកុម្មុយនិស្តមួយនេះ សមាជផ្លាស់ប្តូរមេដឹកនាំមិនដែលចោទជាបញ្ហាចម្រូងចម្រាសអ្វីធំដុំនោះទេ ដោយសារតែអំណាចទាំងអស់ស្ថិតនៅក្នុងដៃបក្សតែមួយ។ ក៏ប៉ុន្តែ លើកនេះ គេសង្កេតឃើញថា ស្ថានភាពនយោបាយនៅវៀតណាមហាក់ដូចជាកំពុងតែកើនកម្តៅយ៉ាងខ្លាំងខុសពីធម្មតា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ជាទូទៅ នយោបាយនៅក្នុងប្រទេសវៀតណាម ដែលជាប្រទេសស្ថិតក្រោមរបបកុម្មុយនិស្ត មិនសូវជាទាក់ទាញចំណាប់អារម្មណ៍របស់សាធារណជនច្រើនប៉ុន្មាននោះទេ ហើយដំណើរការផ្លាស់ប្តូរថ្នាក់ដឹកនាំបក្សកុម្មុយនិស្តវៀតណាម ក៏ច្រើនតែត្រូវបានធ្វើឡើងដោយស្ងាត់ៗផងដែរ។ ក៏ប៉ុន្តែ នៅក្នុងសម័យកាលអ៊ីនធ័រនែត ដែលគេពិបាកនឹងរឹតត្បឹតលំហូរព័ត៌មាន ជម្លោះផ្ទៃក្នុងបក្សកុម្មុយនិស្តវៀតណាមកំពុងតែបែកធ្លាយជាសាធារណៈ បង្កើតឲ្យមាននូវបរិយាកាសនយោបាយក្តៅគគុកខុសប្លែកពីពេលមុនៗ។
គួរបញ្ជាក់ថា នៅក្នុងសមាជរយៈពេលមួយសប្តាហ៍ ដែលនឹងចាប់ផ្តើមបើកធ្វើ នៅថ្ងៃព្រហស្បតិ៍ខាងមុខនេះ បក្សកុម្មុយនិស្តវៀតណាមនឹងធ្វើការជ្រើសរើសមេដឹកនាំកំពូលៗសម្រាប់អាណត្តិថ្មី រយៈពេល ៥ឆ្នាំ ដោយក្នុងនោះ តំណែងកំពូលៗចំនួន ៣ នឹងត្រូវមានការផ្លាស់ប្តូរ គឺប្រធានាធិបតី នាយករដ្ឋមន្រ្តី និងលេខាបក្ស។
ជាទូទៅ អ្វីៗត្រូវបានគេកំណត់រួចជាស្រេចតាំងពីរាប់ខែមុនបើកធ្វើសមាជបក្សទៅទៀត ក៏ប៉ុន្តែ លើកនេះ អ្វីៗហាក់ដូចជានៅមិនទាន់ដាច់ស្រេចនៅឡើយ ដែលជាការបង្ហាញឲ្យឃើញ អំពីភាពប្រទាញប្រទង់គ្នា រវាងក្រុមផ្សេងៗគ្នានៅក្នុងបក្ស ជាពិសេស គឺរវាងក្រុមអ្នកស្និទ្ធនឹងលោកនាយករដ្ឋមន្រ្តី ង្វៀន តាន់ហ្ស៊ុង និងក្រុមអ្នកស្និទ្ធនឹងលោកលេខាបក្ស ង្វៀន ភូជុង។
នៅក្នុងការប្រកួតប្រជែងគ្នានេះ គូបដិបក្ខបានប្រើប្រាស់ប្រព័ន្ធអ៊ីនធ័រនែតធ្វើជាអាវុធ ដើម្បីយកប្រៀបលើគ្នាទៅវិញទៅមក ជាពិសេស តាមរយៈការបញ្ចេញជាសាធារណៈនូវខ្លឹមសារនៃការជជែកតថ្លៃគ្នាផ្ទៃក្នុងបក្ស ការចុះផ្សាយនូវលិខិតអនាមិកបរិហារិះគន់គូប្រជែង ហើយរហូតមានការបង្កើតឲ្យមានជាពាក្យចចាមអារ៉ាម អំពីការធ្វើរដ្ឋប្រហារ ដែលជារឿងដ៏កម្រ នៅវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ