លោកហ្កាយដូ រៀបចំធ្វើបាតុកម្មដើម្បីឲ្យជំនួយមនុស្សធម៌អាចចូលវ៉េណេស៊ុយអេឡាបាន
ក្រុមបក្សប្រឆាំងរបស់វ៉េណេស៊ុយអេឡា បានប្រកាសពីគម្រោងធ្វើបាតុកម្មដ៏ធំមួយនៅថ្ងៃអង្គារ ទី១២ កុម្ភៈ ឆ្នាំ២០១៩ នេះ។ ជាបាតុកម្ម ដើម្បីដាក់សំពាធឲ្យ រដ្ឋាភិបាលដឹកនាំដោយលោកម៉ាឌូរ៉ូ យល់ព្រមបើកផ្លូវឲ្យក្បួនរថយន្តដឹកជំនួយមនុស្សធម៌ អាចបើកចូលក្នុងប្រទេសបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
លោកហ្កាយដូ ប្រធានសភា និងជាអ្នកតាំងខ្លួនឯង ថាជាប្រធានាធិបតីស្តីទី វ៉េណេស៊ុយអេឡា បានប្រកាសថ្កោលទោសចំពោះ ក្រុមកងទ័ព ដែលបានបិទផ្លូវ រាំងខ្ទប់មិនឲ្យ ក្បួនរថយន្តដឹកជំនួយមនុស្សធម៌ បើកចូលក្នុងទឹកដីរបស់ប្រទេសបាន។
លោកហ្កាយដូ បានសង្កត់ធ្ងន់ថា ទង្វើរបស់ពួកកងទ័ពវ៉េណេស៊ុយអេឡា គឺជាទង្វើដែលមិនអាចទទួលយកបានឡើយ។ មិនអាចទទួលយកបាន ពីព្រោះថា ការបិទផ្លូវមិនឲ្យជំនួយមនុស្សធម៌បានដល់ដៃ ប្រជាជនខ្លួនឯងរាប់ម៉ឺននាក់ ដែលកំពុងរស់នៅក្នុងគ្រោះអត់ឃ្លាន ប្រៀបបីដូចជា អំពើឧក្រិដ្ឋកម្មប្រឆាំងនឹងមនុស្សជាតិដូច្នោះដែរ។
បន្ថែមលើនេះ លោកហ្កាយដូ អះអាងថា ប្រសិនណាបើក្រុមកងទ័ព របស់លោកម៉ាឌូរ៉ូ នៅតែរឹងទទឹង មិនព្រមបើកផ្លូវច្រកព្រំដែនទេនោះ លោកនឹងដឹកនាំ ធ្វើការប្រឆាំងតវ៉ាទ្រង់ទ្រាយធំមួយ នៅភាគខាងកើតទីក្រុងការ៉ាកាស នាពេលឆាប់ៗនេះ។ មិនតែប៉ុណ្ណោះ លោកក៏បានអំពាវនាវផងដែរ ឲ្យប្រជាជនវ៉េណេស៊ុយអេឡានៅទូទាំងប្រទេស ចូលរួមក្នុងការប្រឆាំងតវ៉ានេះ។
គួរជម្រាបជូនថា ស្ថានភាពនយោបាយ នៅក្នុងប្រទេសសម្បូរប្រេង-វ៉េណេស៊ុយអេឡា នៅតែបន្តស្ថិតនៅក្នុងភាពច្របូកច្របល់ខ្លាំង។ ក្រៅតែពី ប្រទាញប្រទង់គ្នា រឿងការបោះឆ្នោតសាជាថ្មី នាពេលនេះលោកម៉ាឌូរ៉ូ និងលោកហ្កាយដូ កំពុងតតាំងគ្នាខ្លាំងទៅៗ ពាក់ព័ន្ធនឹងរឿងជំនួយស្បៀងអាហារ។
ជំនួយស្បៀងអាហារ ដែលមេបក្សប្រឆាំងថា អាចជួយសង្គ្រោះដល់ជីវិតប្រជាជនបានជាង ៣០ ម៉ឺននាក់ ដែលកំពុងរស់ត្រដរខ្យល់ រងចាំជំនួយដើម្បីបន្តជីវិតរស់។ ក៏ប៉ុន្តែ សម្រាប់លោកម៉ាឌូរ៉ូ ជំនួយទាំងនោះជារបស់សហរដ្ឋអាមេរិក និងមិនព្រមជាដាច់ខាតឲ្យរថយន្តដឹកជំនួយមនុស្សធម៌ទាំងនោះ បើកចូលប្រទេសបាន ពីព្រោះដើម្បីការពារកុំឲ្យអាមេរិកអាចចូលឈ្លានពានវ៉េណេស៊ុយអេឡាបាន។
សូមរំម្លឹកជូនថា បន្ទាប់ពីផុងខ្លួនធ្លាក់ចូលក្នុងវិបត្តិសេដ្ឋកិច្ច និងនយោបាយធ្ងន់ធ្ងររួចមក ប្រជាជនវ៉េណេស៊ុយអេឡាក្រីក្រ ធ្លាក់ខ្លួនរស់នៅយ៉ាងលំបាកដោយសារតែ ខ្វះខាតស្បៀងអាហារ ថ្នាំសង្កូវ។ មួយវិញទៀត បើយោងតាមអង្គការសហប្រជាជាតិ មានប្រជាជនវ៉េណេស៊ុយអេឡាប្រមាណជាង ២ លាននាក់ បានរត់ភៀសខ្លួនចេញពីប្រទេសចាប់តាំងពីឆ្នាំ ២០១៥ មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ