តើប្រទេសចិន ពិតជាចោរលួចបច្ចេកវិទ្យាពីសហរដ្ឋអាមេរិកមែនឬយ៉ាងណា?
ចុះផ្សាយនៅថ្ងៃ៖
ស្តាប់ - ០៥:២៩
អស់រយៈពេលជាច្រើនឆ្នាំមកហើយ ដែលរដ្ឋាភិបាលទីក្រុងវ៉ាស៊ីនតោន ចោទប្រកាន់រដ្ឋាភិបាលទីក្រុងប៉េកាំង ថាបានប្រើកលល្បិចផ្សេងៗ ដើម្បីលួចយកអាថ៌កំបាំងបច្ចេកវិទ្យាសម្ងាត់សំខាន់ៗពីអាមេរិក។ ផ្ទុយទៅវិញ ក៍អស់រយៈពេលជាច្រើនឆ្នាំហើយដែរ ដែលរដ្ឋាភិបាលចិន បានបដិសេដយ៉ាងក្រេវក្រោធ ចំពោះការចោទរបស់អាមេរិក ហើយចិនធ្លាប់ទាំងបានបោះសម្តីឲ្យអាមេរិក ផ្តល់ភស្តុតាងពិតជាក់ស្តែង ទាក់ទិននឹងការចោទប្រកាន់នេះទៀតផង។ ដូច្នោះហើយ តើសហរដ្ឋអាមេរិក ចោទចិនថាបានលួចបច្ចេកវិទ្យាអ្វីខ្លះពីខ្លួន? ហើយតើ ចិនអាចលួចយកបច្ចេកវិទ្យាទាំងនោះ បានតាមរបៀបណាខ្លះទៅ?
១. តើប្រទេសចិន លួចបច្ចេកវិទ្យាអ្វីខ្លះពីសហរដ្ឋអាមេរិក?
អស់រយៈពេលជាច្រើនឆ្នាំមកហើយ ដែលក្រុមហ៊ុនអាមេរិកមួយចំនួនបានត្អូញត្អែរថារដ្ឋាភិបាលចិន ខិតខំរិះរកមធ្យោបាយជាច្រើន ដើម្បីទាញយកឲ្យបាន នូវការណ៍សម្ងាត់ ពីក្រុមហ៊ុនទាំងនោះ។ សម្រាប់សហរដ្ឋអាមេរិក បញ្ហាពាណិជ្ជកម្មសំខាន់បំផុតជាមួយប្រទេសចិននាពេលបច្ចុប្បន្ននេះ គឺពាក់ព័ន្ធនឹងការលួចផ្ទេរបច្ចេកវិទ្យាដែលរួមមានលើវិស័យយោធា ថាមពល ឧស្សាហកម្មផលិតបញ្ញាសប្បនិម្មិត រថយន្ត និងទូរសព្ទជាដើម។
នៅត្រង់ចំណុចនេះ គេគួរដឹងថា នយោបាយដំឡើងពន្ធគយរបស់សហរដ្ឋអាមេរិក ទៅលើមុខទំនិញរបស់ចិននាពេលនេះ ដើមហេតុដំបូងគឺវាដរចេញពីការលួចបច្ចេកវិទ្យា និងព័ត៌មានសម្ងាត់នានារបស់អាមេរិកនេះឯង។
ដើម្បីឆ្លើយតបនឹងទង្វើរបស់ចិននេះ រដ្ឋាភិបាលអាមេរិក ដឹកនាំដោយលោកប្រធានាធិបតីដូណាល់ ត្រាំ កាលពីខែមីនា ឆ្នាំ២០១៨ កន្លងទៅថ្មីៗនេះ ក៏បានដាក់ពាក្យផ្តឹងទៅកាន់អង្គការពាណិជ្ជកម្មពិភពលោកផងដែរ ដើម្បីប្រឆាំងទៅនឹងរដ្ឋាភិបាលចិន ដែលបាននិងកំពុងបន្តលួចបច្ចេកវិទ្យារបស់អាមេរិកយ៉ាងគឃ្លើន។
ដោយឡែក បើតាមក្រុមអ្នកជំនាញផ្នែកពាណិជ្ជកម្មអាមេរិក ការលួចចម្លងកម្មសិទ្ធិបញ្ញារបស់ចិនពីអាមេរិក មានតម្លៃទឹកប្រាក់ចន្លោះពី ២២៥ពាន់លានដុល្លារ រហូតដល់ ៦០០ពាន់លានដុល្លារ ជារៀងរាល់ឆ្នាំ។
២. វិធីដែលចិនប្រើដើម្បីទទួលបានបច្ចេកវិទ្យាសម្ងាត់ពីអាមេរិក
គួរកត់សម្គាល់ថា ការលួចផ្ទេរបច្ចេកវិទ្យារបស់ចិន ត្រូវគេជឿថា បានធ្វើឡើងជាច្រើនរូបភាព និងត្រូវបានគេរៀបចំឡើងយ៉ាងម៉ត់ចត់ជាទីបំផុត។ ការនេះ វាបានបង្កជាក្តីកង្វល់កាន់តែខ្លាំងឡើងៗ សម្រាប់ក្រុមហ៊ុនអាមេរិក ជាពិសេសក្រុមហ៊ុនផ្នែកបច្ចេកវិទ្យា។
ដោយឡែក ក្រុមហ៊ុនរបស់អាមេរិកមួយចំនួនដែលកំពុងមានវត្តមានក្នុងប្រទេសចិន បានសុខចិត្តទទួលយកលក្ខខណ្ខរបស់រដ្ឋាភិបាលទីក្រុងប៉េកាំង ដោយពួកគេសម្លឹងឃើញពីផលប្រយោជន៍ ដែលអាចទាញយកពីសក្តានុពលសេដ្ឋកិច្ចដ៏ធំនិងក្លៀវក្លារបស់ចិន ដែលមានចំនួនប្រជាជនដ៏ច្រើន គឺរហូតដល់ ១,៣ ពាន់លាននាក់។
២.១ ការចាប់ដៃគូគ្នារបស់ក្រុមហ៊ុនបរទេស និងក្រុមហ៊ុនក្នុងស្រុកចិន
បើនិយាយពីវិធីសាស្ត្រដែលប្រទេសចិន ប្រើក្នុងការក្រសោបយកចំណេះដឹង និងបច្ចេកវិទ្យាសម្ងាត់ពីក្រុមហ៊ុនអាមេរិកវិញ គេមើលឃើញថា វិធីសាស្ត្រ ”ចាប់ដៃគូគ្នា” គឺជាវិធីសាស្ត្រចំបងមួយ ដែលប្រទេសចិនកំពុងអនុវត្ត។ និយាយឲ្យងាយស្តាប់នោះគឺថា រាល់ក្រុមហ៊ុនបរទេស ត្រូវសហការណ៍ជាមួយក្រុមហ៊ុនក្នុងស្រុកចិន ហើយត្រូវចែករំលែកបច្ចេកវិទ្យារបស់ខ្លួន ទៅឱ្យក្រុមហ៊ុនចិនដែលជាដៃគូ ជាលក្ខខណ្ឌដើម្បីអាចចូលរកស៊ីក្នុងទីផ្សាររបស់ចិនបាន។
គួរជម្រាបជូនថា គោលនយោបាយរបស់រដ្ឋាភិបាលទីក្រុងប៉េកាំងនេះ ត្រូវបានហាមឃាត់ដោយអង្គការពាណិជ្ជកម្មពិភពលោក ហើយគោលនយោបាយបែបនេះ ក្រៅពីចិន មិនមានបណ្តាប្រទេសដទៃណាបន្តអនុវត្តទៀតនោះទេ។
២.២ ការចែករំលែកអាជ្ញាប័ណ្ណ
មួយវិញទៀត ច្បាប់ថ្មីរបស់ចិន បានទាមទារឱ្យក្រុមហ៊ុន ដែលប្រតិបតិ្តការ ផ្ទុកទិន្នន័យតាមប្រព័ន្ធអ៊ីនធឺណិត (cloud-computing operations) ផ្តល់សិទ្ធិឲ្យចិនអាចកាន់កាប់ទិន្នន័យទាំងឡាយរបស់ក្រុមហ៊ុនទាំងនោះបាន។ ជាក់ស្តែង ដើម្បីអាចវិនិយោគនៅក្នុងដែនដីចិនបាន ក្រុមហ៊ុនបច្ចេកវិទ្យាដ៏ធំនិងល្បីល្បាញរបស់អាមេរិកគឺក្រុមហ៊ុន Apple និងក្រុមហ៊ុន Amazon សុខចិត្តគោរពតាមគោលនយោបាយរបស់អាជ្ញាចិន ដោយឯកភាពប្រគល់ទិន្នន័យរបស់ខ្លួនទៅឲ្យក្រុមហ៊ុនចិនក្នុងស្រុក។
បន្ថែមលើនេះ មន្រ្តីចិនក៏បានដាក់សម្ពាធក្រុមហ៊ុនបរទេស ឱ្យផ្តល់លទ្ធភាពឱ្យពួកគេអាចទទួលបានបច្ចេកវិទ្យានាំមុខថ្មីៗ ពីក្រុមហ៊ុនទាំងនោះផងដែរ ដោយអះអាងថា នេះជាផ្នែកមួយនៃដំណើរការត្រួតពិនិត្យ ដើម្បីធានាថា ផលិតផលទាំងនោះមានសុវត្ថិភាពសម្រាប់អតិថិជនចិន។
២.៣ វិធីសាស្ត្រប្រមូលទិញយក
សព្វថ្ងៃនេះ រដ្ឋាភិបាលចិនសម្បូរលុយ ក្រុមហ៊ុនចិនជាច្រើនក៏សម្បូរលុយក្នុងការដាក់ទុនវិនិយោគដែរ។ ប្រសិនបើ ចិនមិនអាចស្វែងរក ឬក៍ប្រមូលបានព័ត៌មានសំខាន់ទាក់ទងនឹងបច្ចេកវិទ្យាអ្វីមួយដែលខ្លួនចង់បាននោះទេ ចិននឹងធ្វើដំណើរទៅរកវាដោយខ្លួនឯង តាមរយៈយុទ្ធសាស្ត្រដើរប្រមូលទិញយក។
ជាក់ស្តែង តាមការចុះផ្សាយរបស់កាសែត The New York Times កាលពីខែមីនា ឆ្នាំ២០១៨កន្លងទៅ មានរបាយការណ៍ចោទប្រកាន់រដ្ឋាភិបាលចិនថា បានបញ្ជាឱ្យក្រុមហ៊ុនឯកជនចិន ប្រមូលយកចំណេះជំនាញពីអាមេរិក តាមរយៈការទិញយកក្រុមហ៊ុន និងភាគហ៊ុនរបស់ក្រុមហ៊ុនអាមេរិក។ តែទោះជាបែបនេះក្តី ក្រុមហ៊ុនចិនទាំងនោះបានអះអាងថា ពួកគេមិនមានទំនាក់ទំនងអ្វីឡើយ ជាមួយរដ្ឋាភិបាលចិន។
២.៤ ចោរកម្មតាមអ៊ីនធឺណិត
មួយវិញទៀត ចោរកម្មតាមប្រព័ន្ឋអ៊ីនធឺណិត ក៏ត្រូវបានក្រុមហ៊ុនអាមេរិកជាច្រើន អះអាងថាក្រុមចារកិច្ចចិនបានប្រើដើម្បីលួចយកទិន្នន័យអាថ៌កំបាំងរបស់ខ្លួនដែរ។ វីធីសាស្ត្រនេះ ត្រូវចិនប្រើជាច្រើនឆ្នាំមកហើយ ជាពិសេសក្នុងវិស័យថាមពលដើរដោយកម្លាំងខ្យល់ (Wind turbine) ហើយកាលពីសម័យគ្រប់គ្រងរដ្ឋរបស់លោកអូបាម៉ា រដ្ឋាភិបាលអាមេរិកធ្លាប់បានចោទប្រកាន់មន្ត្រីយោធាចិនចំនួន៥នាក់ផងដែរ ពីបទចូលរួមក្នុងចោរកម្ម។
សូមជម្រាបជូនថា ទោះជាមានការចោទប្រកាន់ជាច្រើនឆ្នាំយ៉ាងណាក្តីពីសំណាក់រដ្ឋាភិបាលទីក្រុងវ៉ាស៊ីនតាន ក៏រដ្ឋាភិបាលចិននៅតែបន្តបដិសេធថាមិនបានលួចបច្ចេកវិទ្យាពីអាមេរិកឡើយ។ ដោយឡែក រហូតមកដល់ពេលនេះអង្គការពាណិជ្ជកម្មពិភពលោក ក៏នៅមិនទាន់បានកាត់សេចក្តីនៅឡើយទេថា ភាគីខាងត្រូវភាគីណាខុស ជុំវិញបណ្តឹងរបស់អាមេរិក ដែលចោទថាចិនគឺជាចោរបច្ចេកវិទ្យា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ