ក្រុមប្រឹក្សាសន្តិសុខ មិនអាចលូកដៃដោះស្រាយវិបត្តិនៅស៊ូដង់ដោយសារចិននិងរុស្ស៊ី
ស្ថានការណ៍នយោបាយនៅក្នុងប្រទេសស៊ូដង់ នៅតែស្ថិតនៅក្នុងស្ថានភាពច្របូកច្របល់ ក្រោយពេលដែលក្រុមយោធា បានបើកការបង្ក្រាប និងសម្លាប់ក្រុមបាតុករយ៉ាងតិច ៦០ នាក់រួចមក។ ជាមួយគ្នានេះផងដែរ ស្ថានការណ៍នៅស៊ូដង់ ក៏កំពុងបន្តស្ថិតក្នុងភាពមិនប្រាកដប្រជាខ្លាំងមួយកម្រិតថែមទៀត បន្ទាប់ពីកិច្ចប្រជុំពិភាក្សារបស់ក្រុមប្រឹក្សាសន្តិសុខអង្គការសហប្រជាជាតិត្រូវជាប់គាំង ដោយសារមានការប្រឆាំងជំទាស់ពីសំណាក់ ប្រទេសចិន និងរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្រោយការបង្ក្រាបដ៏ហិង្សា ដែលបានសម្លាប់បាតុករស៊ូដង់យ៉ាងតិចជាង ៦០ នាក់ និងបង្កឲ្យមានអ្នករបួសជាច្រើនរយនាក់ ប្រទេសអាល្លឺម៉ង និងអង់គ្លេស បានអំពាវនាវឲ្យក្រុមបណ្តាប្រទេសជាសមាជិករបស់ក្រុមប្រឹក្សាសន្តិសុខអ.ស.ប ជួបប្រជុំគ្នាដើម្បីរួមគ្នាជួយដោះស្រាយវិបត្តិដ៏ធ្ងន់ធ្ងរមួយនេះ។
បើយោងទៅតាមសេចក្តីព្រាងមួយ ដែលមើលឃើញដោយសារព័ត៌មានបារាំង AFP ប្រទេសអង់គ្លេស និងអាល្លឺម៉ង់ បានជួបប្រជុំគ្នា និងបានសម្រេចនូវសេចក្តីថ្លែងការណ៍រួមមួយ ដោយអំពាវនាវឲ្យ ក្រុមយោធាស៊ូដង់ និងបាតុករបន្តដោះស្រាយវិវាទដោយសន្តិវិធី។
តែទោះជាយ៉ាងណាក៏ដោយ នាខណៈនេះក្រុមប្រឹក្សាសន្តិសុខមិនអាចធ្វើអ្វីបាននោះទេ ហើយកិច្ចប្រជុំត្រូវបានជាប់គាំង ដោយសារមានការប្រឆាំងជំទាស់ពីសំណាក់ប្រទេសចិន និងរុស្ស៊ី មិនឲ្យថ្កោលទោសចំពោះការសម្លាប់ជនស៊ីវិលនៅក្នុងប្រទេសស៊ូដង់នាពេលកន្លងមកថ្មីៗនោះទេ។
ចិនបានប្រឆាំងជំទាស់ជាដាច់ខាតចំពោះ ការចង់ថ្កោលទោសលើក្រុមយោធាស៊ូដង់ និងការចង់អំពាវនាវឲ្យប្រទេសធំៗនៅក្នុងពិភពលោក រួមដៃគ្នាចាត់វិធានការបន្ទាន់ ដើម្បីបញ្ចប់នូវរាល់អំពើហិង្សាដែលអាចកើតមានឡើង នៅក្នុងប្រទេសស៊ូដង់ ដែលកំពុងផុងខ្លួនក្នុងវិបត្តិ។
ទាក់ទងរឿងនេះដែរ ប្រទេសរុស្ស៊ី មិនបានចេញមុខជំទាស់ដាច់អហិង្កា ដូចជាប្រទេសចិនឡើយ។ រុស្ស៊ី គ្រាន់តែទទូចឲ្យក្រុមប្រឹក្សាសន្តិសុខអ.ស.ប រង់ចាំមើលការឆ្លើយតប និងប្រតិកម្មពីសំណាក់ សហភាពអាហ្វ្រិកជាមុនសិន។
គួរជ្រាបថា ទោះបីជា កិច្ចប្រជុំរបស់ក្រុមប្រឹក្សាសន្តិសុខអ.ស.ប ត្រូវបរាជ័យយ៉ាងណាដ៏ដោយ ក៏ប្រទេសសហភាពអឺរ៉ុប ចំនួន៨បានចេញនូវសេចក្តីថ្លែងការណ៍រួមមួយ ដោយបានថ្កោលទោសចំពោះការបង្ក្រាបយ៉ាងហិង្សារបស់ ពួកយោធាស៊ូដង់ ទៅលើក្រុមបាតុករ។ ក្រុមបាតុករ ដែលបានចេញធ្វើការតវ៉ាជាច្រើនសប្តាហ៍ នៅពីមុខអគ្គសេនាធិការដ្ឋានកងទ័ពក្នុងទីក្រុងខាទុំ ដើម្បីទាមទារឲ្យពួកយោធា ប្រគល់អំណាចទៅឲ្យក្រុមស៊ីវិលវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ