នៅប្រទេសក្រីក្រ អត្រាអ្នកអត់ការងារទាប ព្រោះមនុស្សមិនអាចមិនធ្វើការ
ចុះផ្សាយនៅថ្ងៃ៖
ស្តាប់ - ០៤:២៦
អត្រានិកម្មភាព ឬអត្រាអ្នកអត់ការងារធ្វើ ជារឿយៗ ត្រូវបានមើលឃើញថាមានកម្រិតទាបខ្លាំង ក្នុងបណ្ដាប្រទេសក្រីក្រ ឬប្រទេសកំពុងអភិវឌ្ឍ ធៀបជាមួយនឹងបណ្តាប្រទេសជឿនលឿន។ ប៉ុន្តែ បើគេអង្កេតមើលឱ្យបានជ្រៅ អត្រាអ្នកអត់ការងារធ្វើទាប គ្រាន់តែជា សក្ខីភាពមួយបង្ហាញថា មនុស្សកំពុងធ្វើការងារ មិនមានន័យថា មនុស្សកំពុងធ្វើការងារល្អប្រសើរនោះទេ ព្រោះថា ការងារទាំងនោះបានត្រឹមទទួលប្រាក់ឈ្នួលទាប ជួនកាលមានជួនកាលអត់ និងមានភាពផុយស្រួយខ្លាំង។
អត្រានិកម្មភាព៖ និយមន័យដោយអង្គការពលកម្មអន្តរជាតិ (ILO) នៃធនគារពិភពលោក
ជាទូទៅ ទោះជាយោងតាមនិយមន័យរបស់អង្គការពលកម្មអន្តរជាតិ (ILO) ឬក៏តាមនិយមន័យរបស់រដ្ឋាភិបាលនៃប្រទេសមួយ អត្រានិកម្មភាព (unemployment rate / taux du chômage) សំដៅដល់ ភាគរយនៃកម្លាំងពលកម្មសរុបដែលគ្មានការងារធ្វើ ប៉ុន្តែស្ថិតក្នុងស្ថានភាពរួចរាល់សម្រាប់ការងារ ឬក៏កំពុងរង់ចាំស្វែងរកការងារធ្វើតែម្ដង។ គេវាស់ កម្លាំងពលកម្មសរុប ដោយបូកបញ្ចូល មនុស្សដែលមានអាយុចាប់ពី ១៥ឆ្នាំឡើងទៅ និងអាចផ្គត់ផ្គង់កម្លាំងពលកម្មបាន នៅលើទីផ្សារការងារ មិនថាការងារពេញម៉ោង ឬមិនពេញម៉ោង ហើយនិងបូកបញ្ចូលមនុស្សដែលអត់ការងារធ្វើ ប៉ុន្តែកំពុងស្វែងរក។ ក្នុងន័យនេះ មិនមែនគ្រប់មនុស្សដែលធ្វើការ សុទ្ធតែរាប់បញ្ចូលក្នុងកម្លាំងពលកម្មសរុបនោះទេ។ ជាឧទាហរណ៍ បុគ្គលិកមិនទទួលបានប្រាក់ឈ្នួល សមាជិកធ្វើការងារក្នុងគ្រួសារ និងសិស្សានុសិស្ស មិនត្រូវបានគេរាប់បញ្ចូល។
ស្ថានភាពបច្ចុប្បន្ននៃអត្រានិកម្មភាពក្នុងបណ្ដាប្រទេសកំពុងអភិវឌ្ឍភាគច្រើន
ភាគច្រើននៃប្រទេសដែលមានអត្រានិកម្មភាពទាបបំផុត ស្ថិតក្នុងតំបន់អាស៊ី និងអាហ្វ្រិក ខណៈអត្រាអ្នកអត់ការងារធ្វើ អាចធ្លាក់ចុះទាប រហូតដល់ចន្លោះ ០,១% ទៅ ១,០%។
ប្រាកដណាស់ អត្រាអ្នកអត់ការងារធ្វើមានកម្រិតទាបខ្លាំង មិនមែនមានន័យថា សេដ្ឋកិច្ចរបស់ប្រទេសមួយ មានស្ថានភាពខ្លាំងខ្លាពិសេសអ្វីទេ។ ជាឧទាហរណ៍ ប្រទេសឡាវមានអ្នកអត់ការងារធ្វើ ត្រឹមតែប្រហែល ០,៣% ប៉ុណ្ណោះ នៅឆ្នាំ២០១៦ ប៉ុន្តែ ចំណូលប្រចាំឆ្នាំរបស់មនុស្សម្នាក់ មានមិនដល់ ១៧០០ដុល្លារផង។ នៅប្រទេសកម្ពុជាឯណោះវិញ ការប្រើប្រាស់កម្លាំងពលកម្មមានរហូតដល់ ៩៩,៩% នៃកម្លាំងពលកម្មសរុប ប៉ុន្តែ ចំណូលជាមធ្យមរបស់មនុស្សម្នាក់ មានទំហំទាបជាងប្រទេសឡាវខាងលើទៅទៀត។ ប្រមាណម្នាក់ក្នុងចំណោមមនុស្សពីរនាក់ ក្នុងប្រទេសកម្ពុជា រស់ជាមួយចំណូលប្រហែលត្រឹម ឬក្រោម ២ ដុល្លារ ក្នុងមួយថ្ងៃ។ ប្រទេសផ្សេងៗទៀត នៅអាហ្វ្រិក ដែលអត្រាអ្នកអត់ការងារធ្វើទាបបំផុត រួមមានដូចជា នីហ្សេ តុងហ្គា រវ៉ាន់ដា ជាដើម។
ហេតុអ្វីអត្រាអ្នកអត់ការងារធ្វើទាបខ្លាំងក្នុងប្រទេសក្រីក្រ?
តាមរយៈការកំណត់និយមន័យ ដូចដែលរៀបរាប់ខាងលើ គេអង្កេតឃើញថា ជារឿយៗ ប្រទេសក្រីក្រមានអត្រាអ្នកអត់ការងារធ្វើទាប បើធៀបនឹងបណ្ដាប្រទេសអភិវឌ្ឍជឿនលឿន។ ទាំងនេះអាចមកពីមូលហេតុដូចខាងក្រោម៖
ប្រទេសដែលមានអត្រាអ្នកអត់ការងារធ្វើទាប ភាគច្រើនជាប្រទេសកំពុងអភិវឌ្ឍ ហើយសេដ្ឋកិច្ចពឹងផ្អែកខ្លាំង លើវិស័យកសិកម្ម ដែលប្រើប្រាស់កម្លាំងពលកម្មមនុស្សភាគច្រើន ប៉ុន្តែជាប្រភេទការងារមានភាពផុយស្រួយខ្លាំង មានពេលខ្លះ មិនទៀងទាត់ និងអាស្រ័យខ្លាំងលើរដូវកាលអំណោយផលឬក៏អត់។ ត្រង់នេះ គេត្រូវចងចាំថា ទោះជាការងារមិនពេញម៉ោង ឬការងារមិនពេញលេញ និងថែមទាំង ការងារទទួលបានប្រាក់ឈ្នួលទាបយ៉ាងណា ក៏ត្រូវបានរាប់បញ្ចូលថា មានការងារធ្វើ។
កត្តាចម្បងមួយផ្សេងទៀត គឺដោយសារ ប្រទេសក្រីក្រកំពុងអភិវឌ្ឍ ជួបកង្វះខាត ឬអត់ទាំងស្រុងតែម្ដង ធានារ៉ាប់រង ឬរបបសន្តិសុខសង្គម សម្រាប់អ្នកអត់ការងារធ្វើ។ លើសពីនេះ វាអាចដោយសារ កង្វះប្រសិទ្ធភាព និងភាពស្មុគស្មាញនៃសេវាកម្មសាធារណៈ ហើយនិង បរិមាណនៃអត្ថប្រយោជន៍ទទួលបានមានទំហំទាបពេក បើទោះជាអ្នកអត់ការងារធ្វើ ទៅប្រកាសពីស្ថានភាពរបស់ខ្លួនដើម្បីទទួលបានអត្ថប្រយោជន៍ទាំងនោះក៏ដោយ។ នៅក្នុងបណ្តាប្រទេសអភិវឌ្ឍជឿនលឿន នៅពេលអ្នកអត់ការងារ ឬស្ថិតក្នុងស្ថានភាពកំពុងស្វែងរកការងារ គេអាចទទួលបានសេវាសង្គមខ្លះ ដើម្បីចញ្ចឹមជីវិត។ ផ្ទុយទៅវិញ ចំពោះ ពលរដ្ឋក្នុងប្រទេសកំពុងអភិវឌ្ឍ បើពួកគេមិនទទួលបានសេវាទាំងអស់នេះទេ ពួកគេត្រូវព្យាយាមរកគ្រប់មធ្យោបាយ ឬធ្វើការងារគ្រប់ប្រភេទ ដើម្បីចញ្ចឹមជីវិត និងបើមិនដូច្នេះទេ គេត្រូវប្រឈមនឹងស្ថានភាពអត់បាយតែម្ដង។
ជាទូទៅ គេអង្កេតឃើញថា នៅក្នុងបណ្ដាប្រទេសកំពុងអភិវឌ្ឍ អត្រាអ្នកអត់ការងារធ្វើ ច្រើនតែប្រមូលផ្ដុំ នៅលើក្រុមមនុស្សដែលមានជីវភាពធូរធារ និងបានទទួលការអប់រំខ្ពស់ ព្រោះដោយសារ ពួកគេអាចមានលទ្ធភាពគ្រប់គ្រាន់ ដើម្បីបន្តរង់ចាំទទួលបានការងារ ដែលខ្លួនពេញចិត្ដ និងសមស្របចំពោះខ្លួនឯង។ ទោះជាយ៉ាងណា ក្រុមពលរដ្ឋប្រភេទនេះ មានចំនួនតិចតួចណាស់ធៀបនឹងកម្លាំងពលកម្មសរុប ក្នុងប្រទេសទាំងមូល។
សរុបជារួម អត្រានិកម្មភាពទាប គ្រាន់តែជាសក្ខីភាពមួយបង្ហាញថា មនុស្សកំពុងធ្វើការងារ មិនមានន័យថា មនុស្សកំពុងធ្វើការងារល្អប្រសើរនោះទេ។ ក្នុងបណ្តាប្រទេសក្រីក្រភាគច្រើន ដោយសារគ្មានជម្រើស មនុស្សត្រូវតែបង្ខំចិត្តធ្វើការ ទោះជាការងារទាំងនោះ បានត្រឹមទទួលប្រាក់ឈ្នួលទាប ជួនកាលមានជួនកាលអត់ និងមានភាពផុយស្រួយខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ