ហេតុអ្វីអាមេរិកព្យួរប្រព័ន្ធអនុគ្រោះពន្ធលើការនាំចូលទំនិញថៃ?
ចុះផ្សាយនៅថ្ងៃ៖
ស្តាប់ - ០៥:៣៨
កាលពីខែតុលាកន្លងទៅ រដ្ឋការរបស់លោកដូណាល់ ត្រាំ បានប្រកាសឲ្យដឹងថា អាមេរិកនឹងព្យួរប្រព័ន្ធអនុគ្រោះពន្ធលើការនាំចូលទំនិញពីថៃ នៅក្នុងតម្លៃជាទឹកប្រាក់ជាង១ពាន់លានដុល្លារសហរដ្ឋអាមេរិក ហើយការព្យួរប្រព័ន្ធអនុគ្រោះពន្ធនេះនឹងចាប់ចូលជាធរមាន នៅខែមេសាឆ្នាំ២០២០។ តើមានមូលហេតុអ្វីដែលជំរុញឲ្យអាមេរិកព្យួរប្រព័ន្ធអនុគ្រោះពន្ធចំពោះប្រទេសថៃដែលជាសម្ព័ន្ធមិត្តបែបនេះ?
ជាផ្លូវការ ហេតុផលដែលអាមេរិកបានលើកឡើង ក្នុងការព្យួរប្រព័ន្ធអនុគ្រោះពន្ធចំពោះថៃ គឺដោយសារតែបញ្ហាមិនគោរពសិទ្ធិពលករ។ នៅក្នុងសេចក្តីថ្លែងការណ៍ កាលពីថ្ងៃទី២៥ខែតុលា ការិយាល័យទទួលបន្ទុកពាណិជ្ជកម្មក្រៅប្រទេសរបស់អាមេរិកបានធ្វើការគូសបញ្ជាក់ថា ថៃមិនបានគោរពសិទ្ធិពលករស្របទៅតាមបទដ្ឋានអន្តរជាតិ រួមមានដូចជាសិទ្ធិសេរីភាពរបស់ពលករក្នុងការបង្កើត ឬចូលរួមក្នុងសមាគម ឬសហជីព ក៏ដូចជាសិទ្ធិផ្សេងទៀតទាក់ទងនឹងដំណើរការចរចាជាលក្ខណៈសមូហភាពទល់នឹងនិយោជក។
ស្ថានទូតអាមេរិកប្រចាំទីក្រុងបាងកកក៏បានពន្យល់បន្ថែមផងដែរថា ការគោរពសិទ្ធិពលករគឺជាផ្នែកមួយនៃលក្ខខណ្ឌក្នុងការទទួលបានប្រព័ន្ធអនុគ្រោះពន្ធពីអាមេរិក ហើយថា អាមេរិកធ្លាប់បានលើកយកបញ្ហានេះមកជជែកជាមួយរដ្ឋាភិបាលថៃអស់រយៈពេល ៦ឆ្នាំមកហើយ ក៏ប៉ុន្តែ នៅតែគ្មានដំណោះស្រាយ ទើបធ្វើឲ្យអាមេរិកសម្រេចព្យួរប្រព័ន្ធអនុគ្រោះពន្ធនៅពេលនេះ។
ជាការពិតណាស់ថា ថៃពិតជាធ្លាប់ត្រូវបានគេរិះគន់ច្រើនមែន ទាក់ទងនឹងការរំលោភសិទ្ធិពលករ ជាពិសេស នៅក្នុងវិស័យនេសាទ ហើយកន្លងមក សហភាពអឺរ៉ុបក៏ធ្លាប់បានធ្វើការព្រមានជាផ្លូវការផងដែរថា នឹងហាមឃាត់ការនាំចូលគ្រឿងសមុទ្រពីប្រទេសថៃ ប្រសិនបើរដ្ឋាភិបាលក្រុងបាងកកមិនដោះស្រាយបញ្ហាអស់ទាំងនេះ ជាពិសេស គឺទាក់ទងនឹងការចោទប្រកាន់ពីការប្រើប្រាស់កម្លាំងពលកម្មដូចទាសករ និងការនេសាទដោយខុសច្បាប់។
ក៏ប៉ុន្តែ ទោះបីជាយ៉ាងណា នៅក្នុងប្រទេសថៃ គេមានមន្ទិលសង្ស័យច្រើនចំពោះការណ៍ដែលអាមេរិកលើកយកបញ្ហាសិទ្ធិពលករនេះមកធ្វើជាហេតុផលនៃការព្យួរប្រព័ន្ធអនុគ្រោះពន្ធនៅពេលនេះ។
គេបាននាំគ្នាធ្វើការកត់សម្គាល់ថា តាមធម្មតា នាពេលកន្លងមក នៅពេលនិយាយពីការដោះដូរពាណិជ្ជកម្ម រដ្ឋាភិបាលអាមេរិក ក្រោមការដឹកនាំរបស់លោកដូណាល់ ត្រាំ មិនយកបញ្ហាសិទ្ធិពលករនេះទៅដាក់សម្ពាធលើប្រទេសដទៃនោះទេ ហើយលើសពីនេះទៅទៀត ការណ៍ដែលអាមេរិកលើកយកបញ្ហាសិទ្ធិពលករមកធ្វើជាហេតុផលក្នុងការដាក់ទណ្ឌកម្មលើថៃនៅពេលនេះ វាហាក់ដូចជាដើរបញ្ច្រាសគ្នាទៅនឹងសេចក្តីសន្និដ្ឋានរបស់សហភាពអឺរ៉ុបចំពោះដំណើរវិវឌ្ឍជាវិជ្ជមាននៃសំណុំរឿងនេះ។ សហភាពអឺរ៉ុប ដែលក្រោយពីបានព្រមានរដ្ឋាភិបាលថៃ បានសម្រេចដកការព្រមាននេះចេញវិញ កាលពីខែមករា ដើមឆ្នាំ២០១៩នេះ ក្រោយពីបានរកឃើញថា កំណែទម្រង់មួយចំនួនត្រូវបានរដ្ឋាភិបាលថៃដាក់ចេញដោយសមស្រប ដើម្បីកែលម្អសិទ្ធិពលករ នៅក្នុងវិស័យនេសាទ។
ហេតុដូច្នេះហើយបានជាគេនាំគ្នាសង្ស័យថា នៅពីក្រោយការខ្វាយខ្វល់ពីការគោរពសិទ្ធិពលករ ប្រហែលជាមានមូលហេតុផ្សេង ដែលជំរុញឲ្យអាមេរិកព្យួរប្រព័ន្ធអនុគ្រោះពន្ធចំពោះថៃនៅពេលនេះ។
ហេតុផល ដែលគេសំឡឹងឃើញមុនគេ ដោយសារតែវាជានយោបាយអាទិភាពរបស់លោកដូណាល់ ត្រាំ តាំងពីដើមមក គឺអាមេរិកកំពុងតែស្វះស្វែងរកវិធីកាត់បន្ថយឱនភាពជញ្ជីងពាណិជ្ជកម្មជាមួយថៃ។ យោងតាមតួលេខផ្លូវការរបស់ការិយាល័យពាណិជ្ជកម្មក្រៅប្រទេសរបស់អាមេរិក កាលពីឆ្នាំ២០១៨កន្លងទៅនេះ ថៃនាំទំនិញចេញទៅអាមេរិក នៅក្នុងទំហំជាទឹកប្រាក់រហូតដល់ទៅ ៣១,៩ពាន់លានដុល្លារ ក៏ប៉ុន្តែ នាំចូលទំនិញពីអាមេរិកវិញតែ ១២,៦ពាន់លានដុល្លារតែប៉ុណ្ណោះ ពោលគឺ ជញ្ជីងពាណិជ្ជកម្មត្រូវផ្អៀងយ៉ាងខ្លាំងទៅខាងថៃ រហូតដល់ទៅ ១៩,៣ពាន់លានដុល្លារ។
បន្ថែមពីលើនេះ នៅមានបញ្ហាចម្រូងចម្រាសមួយទៀត ដែលទើបនឹងកើតឡើងនាពេលថ្មីនេះ ហើយដែលធ្វើឲ្យអាមេរិកមិនសប្បាយចិត្តចំពោះថៃ គឺសេចក្តីសម្រេចរបស់រដ្ឋាភិបាលក្រុងបាងកក ក្នុងការហាមឃាត់លែងឲ្យប្រើប្រាស់ថ្នាំសម្លាប់សត្វល្អិតមួយចំនួននៅក្នុងវិស័យកសិកម្មរបស់ខ្លួន។
ថ្នាំសម្លាប់សត្វល្អិត៣ប្រភេទ ដែលរដ្ឋាភិបាលថៃចេញបម្រាមឈប់ឲ្យកសិករថៃប្រើ ចាប់ពីថ្ងៃទី១ខែធ្នូឆ្នាំ២០១៩ខាងមុខនេះ គឺជាសារធាតុគីមី ដែលគេរកឃើញថា អាចបង្កនូវផលប៉ះពាល់ច្រើនដល់សុខភាព ហើយក្នុងចំណោមថ្នាំសម្លាប់សត្វល្អិតទាំង៣ប្រភេទនេះ មានពីរប្រភេទត្រូវបានប្រទេសនៅសហភាពអឺរ៉ុបហាមឃាត់លែងឲ្យប្រើ តាំងពីឆ្នាំ២០០៧ និង២០០៨ ហើយមួយប្រភេទទៀតត្រូវបានគេគ្រោងចេញបម្រាមចាប់ពីឆ្នាំ២០២១ ឬ២០២៣ខាងមុខ។
សហរដ្ឋអាមេរិកវិញជំទាស់នឹងការចេញបម្រាមលើការប្រើប្រាស់ថ្នាំសម្លាប់សត្វល្អិតទាំងនេះ ដោយលើកឡើងថាបម្រាមនេះអាចនឹងធ្វើឲ្យប៉ះពាល់ទៅដល់ការនាំចូលផលិតផលកសិកម្មរបស់អាមេរិកទៅក្នុងប្រទេសថៃ។ អាមេរិកថែមទាំងបានផ្ញើលិខិតទៅកាន់រដ្ឋាភិបាលថៃទៀតផង ទាមទារឲ្យថៃពន្យារពេលចេញបម្រាមលើថ្នាំសម្លាត់សត្វល្អិតនេះ ក៏ប៉ុន្តែ រដ្ឋមន្រ្តីសុខាភិបាល និងរដ្ឋមន្រ្តីកសិកម្មថៃ បានរិះគន់បកទៅអាមេរិកវិញថា អាមេរិកគិតតែពីផលចំណេញខាងពាណិជ្ជកម្ម ហើយមិនគិតដល់សុខភាពរបស់ប្រជាជន។
គណៈរដ្ឋមន្រ្តីថៃបានអនុម័តជាផ្លូវការលើការហាមលែងឲ្យប្រើថ្នាំសម្លាប់សត្វល្អិត នៅថ្ងៃទី២២តុលា ហើយ៣ថ្ងៃក្រោយមក នៅថ្ងៃទី២៥តុលា អាមេរិកក៏បានចេញសេចក្តីសម្រេចព្យួរប្រព័ន្ធអនុគ្រោះពន្ធលើប្រទេសថៃ។
នៅក្នុងបរិបទនេះហើយ ដែលធ្វើឲ្យគេសង្ស័យថា អាមេរិកប្រហែលជាចង់ឆ្លៀតយកបញ្ហាសិទ្ធិពលករមកព្យួរប្រព័ន្ធអនុគ្រោះពន្ធលើថៃ ដើម្បីជាសម្ពាធក្នុងការចរចា ឲ្យថៃបើកចំហទីផ្សារសម្រាប់ការនាំចូលទំនិញរបស់អាមេរិក ហើយកាត់បន្ថយឱនភាពជញ្ជីងពាណិជ្ជកម្ម រវាងអាមេរិក និងថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ