កូរ៉េខាងជើងព្រមលុបចោលកម្មវិធីនុយក្លេអ៊ែរ ទាល់តែលែងមានការគំរាមផ្នែកនុយក្លេអ៊ែរពីអាមេរិក
នៅថ្ងៃព្រហស្បតិ៍ ទី២០ ធ្នូ ឆ្នាំ២០១៨ រដ្ឋាភិបាលទីក្រុងព្យុងយ៉ាង បានចេញមុខអះអាងថា ខ្លួនពិតជាមានឆន្ទៈខ្ពស់ ក្នុងការលុបបំបាត់ចោល នូវកម្មវិធីផលិតអាវុធនុយក្លេអ៊ែរពិតមែន។ បន្ថែមលើនេះ មេដឹកនាំកូរ៉េខាងជើងលោកគីម ជុងអ៊ុន បានបញ្ជាក់ថា ប្រសិនណាបើលោកដូណាល់ ត្រាំ ដកចេញវិញ នូវរាល់ការគំរាមកំហែងទាំងឡាយ ដែលអាមេរិកដាក់មកលើប្រទេសកូរ៉េខាងជើង នោះកូរ៉េខាងជើង នឹងរំលាយចោលកម្មវិធីផលិតអាវុធនុយក្លេអ៊ែរភ្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ជំនួបចរចារវាងលោកដូណាល់ត្រាំ និងលោកគីម ជុងអ៊ុន ស្តីអំពីសំណុំរឿងផលិតអាវុធនុយក្លេអ៊ែរកូរ៉ខាងជើង នៅក្នុងប្រទេសសិង្ហបុរី កន្លងផុតទៅអស់ប្រមាណជា ៦ខែ មកហើយ។ ក៏ប៉ុន្តែ រហូតមកដល់ពេលនេះ ភាគីទាំងពីរ នៅតែមិនទាន់អាចស្វែងរកច្រកដើររួមគ្នាបាននៅឡើយទេ។
ហេតុនេះហើយ ទើបនៅថ្ងៃព្រហស្បតិ៍ ម្សិលមិញនេះ ទីក្រុងព្យុងយ៉ាង បានចេញមុខ ទាមទារឲ្យទីក្រុងវ៉ាស៊ីនតោនបន្ធូរបន្ថយយនូវការដាក់ទណ្ឌកម្មនានា មកលើកូរ៉េខាងជើង។ មិនតែប៉ុណ្ណោះ រដ្ឋបាលរបស់លោកគីម ជុងអ៊ុន ក៏បានទទូចឲ្យសហរដ្ឋអាមេរិករបស់លោកត្រាំ បញ្ឃប់រាល់ការគំរាមកំហែងដោយអាវុធនុយក្លេអ៊ែរ មកលើកូរ៉េខាងជើងឲ្យអស់ ប្រសិនបើអាមេរិកពិតជាចង់ឃើញ កូរ៉េខាងជើងរំសាយចោលនូវកម្មវិធីផលិតអាវុធនុយក្លេអ៊ែរ ពិតមែននោះ។
សម្រាប់កូរ៉ខាងជើង កិច្ចចរចាទ្វេភាគី អាចសម្រេចទៅបានលុះត្រាណាតែ ភាគីទាំងពីរព្រមធ្វើសម្បទានឲ្យគ្នាទៅវិញទៅមក មិនមែនដូចជាអាមេរិក ដែលចេះតែទាមទារឲ្យកូរ៉េខាងជើងលះបង់តែឯងនោះទេ។
គួររំឭកជូនថា កូរ៉េខាងជើង បានចេញបរិហារនយោយបាយអាមេរិក នាខណៈនេះ គឺបន្ទាប់ពីសហរដ្ឋអាមេរិក នៅតែរក្សាជំហរ ប្រឆាំងទៅនឹងកូរ៉េខាងជើង រហូតដល់ការបញ្ចប់ការផលិតអាវុធនុយក្លេអ៊ែរ ត្រូវបានត្រួតពិនិត្យនិងផ្ទៀងផ្ទាត់ដោយសហគមន៍អន្តរជាតិច្បាស់លាស់សិន។
សូមជម្រាបជូនទៀតថា ក្រៅតែពីការដាក់ទណ្ឌកម្មសេដ្ឋកិច្ច ការដំឡើងអាវុធនុយក្លេអ៊ែរនៅតំបន់ក្បែរព្រំដែនប្រទេសកូរ៉េខាងជើង-កូរ៉េខាងត្បូង កាលពីសប្តាហ៍មុន អាជ្ងាធរអាមេរិក ក៏បានដាក់បញ្ចូលឈ្មោះមន្ត្រីជាន់ខ្ពស់កូរ៉េខាងជើងចំនួនបីនាក់ផងដែរ ទៅក្នុងបញ្ជីខ្មៅពាក់ព័ន្ធនឹងបទរំលោភសិទ្ធិមនុស្ស។
ទីក្រុងព្យុងយ៉ាង បានចាត់ទុកទង្វើរបស់អាមេរិកនេះថា ជាឧបសគ្គរាំងស្ទះ ដល់ដំណើរការចរចា ដើម្បីឈានដល់ ការលុបបំបាត់កម្មវិធីផលិតអាវុធនុយក្លេអ៊ែរទាំងស្រុងនៅក្នុងឧបទ្វីបកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ