គម្រោងដកកងទ័ពអាមេរិកចេញពីស៊ីរីរបស់លោកត្រាំ រងការរិះគន់ខ្លាំង
ចុះផ្សាយនៅថ្ងៃ៖
កាលពីថ្ងៃពុធ ទី១៩ ធ្នូ ម្សិលមិញនេះលោកប្រធានាធិបតីអាមេរិកដូណាល់ ត្រាំ បានប្រកាសអំពី គម្រោងដកកងទ័ពអាមេរិកទាំងអស់ ចេញពីប្រទេសស៊ីរី។ ព្រមជាមួយគ្នានេះលោកត្រាំបានអះអាងថា សហរដ្ឋអាមេរិក បានកំទេចពួកអង្គការរដ្ឋអ៊ីស្លាម ឲ្យខ្ទេចខ្ទីអស់ហើយ ដូច្នេះវាគ្មានប្រយោជន៍អ្វី ដែលត្រូវទុកទាហានអាមេរិកឲ្យនៅឈរជើងក្នុងទឹកដីស៊ីរីទៀតឡើយ។ ក៏ប៉ុន្តែ ការលើកឡើងរបស់ដូណាល់ លោកត្រាំនេះ បានធ្វើឲ្យសម្ព័ន្ធមិត្តអ៊ឺរ៉ុប រិះគន់ជាខ្លាំង និងថាវា ជាការសម្រេចចិត្តមិនត្រឹមត្រូវឡើយ។
ប្រតិកម្មរបស់អឺរ៉ុប ក្រោយលោកត្រាំប្រកាសពីគម្រោងដកកងទ័ពពីប្រទេសស៊ីរី
បច្ចុប្បន្ននេះ កងទ័ពអាមេរិកមានចំនួនប្រមាណជា ២ ០០០នាក់ កំពុងប្រចាំការនៅក្នុងប្រទេសស៊ីរី ដើម្បីជួយគាំទ្រក្រុមកួដស៊ីរី វាយកំទេច ប្រឆាំងនឹងពួកអង្គការរដ្ឋអ៊ីស្លាម ដែលគេស្គាល់ថាជាពួកជីហាត។
មែនទែនទៅ លោកត្រាំមានគម្រោងដកកងទ័ពអាមេរិក ចេញពីស៊ីរី ជាយូរមកហើយ។ ប៉ុន្តែលោកទើបតែដាច់ចិត្ត ប្រកាសប្រាប់ជាសាធារណៈ អពីការដកខ្លួនចេញពីស៊ីរី គឺខណៈពេលដែលមានការធ្លាយព័ត៌មានថា សហរដ្ឋអាមេរិកកំពុងសម្របសម្រួលទំនាក់ទំនងការទូតជាមួយនឹងប្រទេសតួកគី និងបានយល់ព្រមលក់មីស៊ីលក្នុងតម្លៃទឹកប្រាក់ចំនួន ៣,៥ ពាន់លានដុល្លារសហរដ្ឋអាមេរិក ទៅឲ្យតួកគី។ តួកគី ដែលគេដឹងថា ជាសត្រូវរបស់កងម្លាំងកួដនៅស៊ីរី។
សូមបញ្ជាក់ជូនផងដែរថា ក្រាយប្រកាសគម្រោងដកកងទ័ពចេញពី ប្រទេសស៊ីរី លោកត្រាំក៏បានលើកឡើងផងដែរថា និងអនុវត្តគម្រោងនេះឲ្យបានក្នុងរយៈពេលមួយខែទៀត។
ទាក់ទិនរឿងនេះដែរ គេត្រូវដឹងថា ការសម្រចចិត្តរបស់លោកត្រាំ កាលពីម្សិលមិញ បានធ្វើឲ្យក្រុមសម្ព័ន្ធអន្តរជាតិអឺរ៉ុប ដែលចូលរួមជាមួយអាមេរិក ក្នុងប្រតិបត្តិការប្រយុទ្ធប្រឆាំងជាមួយក្រុមអង្គការរដ្ឋអ៊ីស្លាម ភ្ញាក់ផ្អើល និងបញ្ចេញប្រតិកម្មមិនគាំទ្រឡើយ។
បណ្តាប្រទេសអឺរ៉ុប ដែលជាសម្ព័ន្ធមិត្តរបស់អាមេរិក ជាពិសេសប្រទេសអង់គ្លេស មានការព្រួយបារម្ភ បារម្ភពីព្រោះពួកគេគិតថា រហូតមកដល់ពេលនេះពួកជីហាត នៅតែមានវត្តមានជាច្រើននៅឡើយនៅក្នុងប្រទេសស៊ីរី និងប្រទេសអ៊ីរ៉ាក់។ បើយោងតាមរបាយការណ៍របស់ថ្មីៗរបស់អាមេរិកនេះ ចំនួនកងទ័ពជីហាតនៅមានចំនួនច្រើន គឺច្រើនរហូតដល់ចំនួន ១៤ ០០០នាក់ឯណោះ។
ទាញចេញពីហេតុផលនេះ គេខ្លាចថា ពួកជីហាត អាចនឹងកែនកងកម្លាំងកាន់តែច្រើនជាងមុន និងអាចបង្កជាហនិភ័យ ដែលគេមិនអាចស្មានទុកមុនបាន។ ជាក់ស្តែង រដ្ឋាភិបាលអង់គ្លេស ទើបតែបដិសេដចំពោះការលើកលើងរបស់ លោកត្រាំដែលថា អាមេរិក បានវាយឈ្នះពួកអាយស៊ីសជាស្ថាពរហើយ។
បន្ថែមលើនេះ រដ្ឋាភិបាលអង់គ្លេសក៏បានអះអាងទៀតថា មានកិច្ចការជាច្រើនទៀត ដែលអាមេរិក ព្រមទាំងក្រុមសម្ព័ន្ធអន្តរជាតិត្រូវសាមគ្គីគ្នា ដើម្បីដោះស្រាយវិបត្តិនៅស៊ីរី។ ជាពិសេស គឺបន្តសហប្រតិបត្តិការក្នុងការជួយឧបត្ថម្ភគ្រាំទ្រដល់ ក្រុមកួដស៊ីរី ដើម្បីប្រយុទ្ធប្រឆាំងទៅនឹង ក្រុមអង្គការរដ្ឋអ៊ីស្លាម និងជួយឪ្យប្រទេសស៊ីរី មានសន្តិភាពឡើងវិញ ក្រោយពីផុងខ្លួនធ្លាក់ចូលក្នុងសង្គ្រាមអស់រយៈពេលជាង៧ ឆ្នាំរួចមក។
ជោគវាសនារបស់ក្រុមកួដ ប្រសិនបើអាមរិកពិតជាដកខ្លួនចេញពីប្រទេសស៊ីរីដូចការគ្រោងទុក
សង្គ្រាមនៅស៊ីរី គឺជាបញ្ហាដ៏ចាក់ស្រែះ និងស្មុគស្មាញខ្លាំងមែនទែន ដោយសារតែមានតួអង្គជាច្រើន លូកដៃក្នុងសង្គ្រាមនៅស៊ីរី។ នៅម្ខាង ក្រុមកួដ គឺជាចលនា ដែលទទួលបានការគាំទ្រពីសំណាក់អាមេរិក និងបណ្តាប្រទេសអឺរ៉ុបចំនួនជាង១០ ប្រទេស ដែលក្នុងនោះរួមមាន បារាំង អង់គ្លេស និងអាល្លឺម៉ង់ជាដើម ក្នុងការវាយកំទេចពួកអង្គការរដ្ឋអ៊ីស្លាម។
ក៏ប៉ុន្តែ ពួកកួដស៊ីរី គឺជាចលនាបះបោរប្រឆាំងទៅនឹងរបបដឹកនាំផ្តាច់ការរបស់រដ្ឋាភិបាលស៊ីរី ដែលមានលោកអាសាធជាប្រមុខដឹកនាំ។ ដូច្នេះហើយ វាមានន័យថា ក្រុមកួដស៊ីរីនេះ ក៏ជាសត្រូវរបស់ប្រទេសរុស្សីដែរ។ ហេតុអ្វី? ពីព្រោះប្រធានាធិបតីអាសាធ សព្វថ្ងៃនេះ គឺជាមិត្តរបស់វិមានក្រឹមឡាំង។ ដូច្នេះហើយ ក្នុងករណីដែលអាមេរិកដកកងទ័ពចេញពីប្រទេសស៊ីរី ក្រុមកួដនឹងប្រឈមខ្លាំងទៅនឹងការវាយប្រហារពីសំណាក់ រុស្ស៊ី និងរដ្ឋាភិបាលរបស់លោកអាសាធ ដែលសំងំរងចាំតែឪកាលល្អដើម្បីកំចាត់ពួកកួដស៊ីរីចោល។
រឿងដ៏គួរឲ្យកត់សម្គាល់មួយទៀត គឺពាក់ព័ទ្ធនឹងប្រទេសតួកគី។ សម្រាប់អាមេរិក ពួកកួដស៊ីរីគឺជាមិត្ត តែសម្រាប់តួកគីវិញពួកគេជាសត្រូវ។ នៅគ្រាកន្លងមក ប្រធានាធិបតីតួកគីគឺលោកអ៊ែរដូហ្គាន ធ្លាប់បាននិយាយហើយថា កងកម្លាំងកួដស៊ីរី គឺជាក្រុមភេវរកម្ម ដែលអាចបង្កគ្រោះថ្នាក់ដល់ប្រទេសតួកគី។ មិនតែប៉ុណ្ណោះ នៅគ្រាកន្លងមក ទីក្រុងអង់ហ្គារ៉ា ធ្លាប់បានបើកការវាយប្រយុទ្ធ លើក្រុមកួដស៊ីរីរួចមកហើយ តែគ្រាន់តែមិនហ៊ាន ធ្វើអ្វីច្រើនហួសហេតុនោះទេ ដោយញញើតនឹងអាមេរិក។ ផ្ទុយទៅវិញ តើជោគវាសនាអនាគតរបស់ក្រុមកួដស៊ីរី ទៅជាយ៉ាងណា បើសិនជាអាមេរិករបស់លោកត្រាំលែងខ្វល់គាំទ្រ ដូចការប្រកាសនោះ?
បើអាមេរិកពិតជាដកខ្លួនលែងពាក់ព័ន្ធនឹងបញ្ហានៅស៊ីរី ឈប់ផ្តល់ជំនួយ និងដកកងទ័ពជំនួយដល់កងម្លាំងកួដមែននោះ គ្រោះថ្នាក់មុនគេ ដែលក្រុមកួតអាចនឹងប្រឈមនោះ គឺប្រទេសតួកគី ពីព្រោះថាប្រធានាធិបតីតួកគីគឺលោកអ៊ែរ ដូហ្គាន ទើបតែបានប្រកាសកាលពីថ្ងៃចន្ទ ដើមសប្តាហ៍នេះថា តួកគីនឹងបើកការវាយប្រហារ ប្រឆាំងទៅនឹងក្រុមកួដនៅស៊ីរី ក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ