អាមេរិកនឹងប្តូរស្ថានទូតទៅហ្សេរុយសាឡិមដើម្បីអបអរថ្ងៃបុណ្យឯករាជ្យអ៊ីស្រាអែល
អាមេរិកបានប្រកាសថា នឹងផ្លាស់ប្តូរស្ថានទូតរបស់ខ្លួនទៅក្រុងហ្សេរុយសាឡិមនៅក្នុងខែឧសភាខាងមុខ ស្របពេលគ្នាជាមួយនឹងថ្ងៃបុណ្យទី៧០នៃការប្រកាសឯករាជ្យរបស់អ៊ីស្រាអែល។ ប៉ាឡេស្ទីន ដែលមានជម្លោះជាមួយអ៊ីស្រាអែលក្នុងការដណ្តើមយកក្រុងហ្សេរុយសាឡិម បានហៅការប្តូរទីតាំងស្ថានទូតនេះថាជា "ការញុះញុងដោយច្បាស់ក្រឡែត"។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
កាលពីថ្ងៃសុក្រម្សិលមិញ អាមេរិកបាននិយាយថា ខ្លួននឹងធ្វើការផ្លាស់ប្តូរទីតាំងស្ថានទូតរបស់អាមេរិកដែលសព្វថ្ងៃស្ថិតនៅក្នុងទីក្រុង Tel Aviv នៃប្រទេសអ៊ីស្រាអែល ទៅកាន់ទីក្រុងហ្សេរុយសាឡិមវិញនៅក្នុងខែឧសភាខាងមុខនេះ ដើម្បីជាការអបអរចំពោះថ្ងៃបុណ្យទី៧០នៃការប្រកាសឯករាជ្យរបស់អ៊ីស្រាអែល ដែលនឹងប្រព្រឹត្តទៅនាថ្ងៃទី១៤ មេសាសម្រាប់ឆ្នាំនេះ។ សូមបញ្ជាក់ថា រហូតមកដល់ពេលបច្ចុប្បន្ន នៅក្នុងទីក្រុងហ្សេរុយសាឡិម មានតែអគ្គកុងស៊ុលតំណាងអាមេរិកប៉ុណ្ណោះ ពុំទាន់មានស្ថានទូតរបស់អាមេរិកផ្ទាល់នោះទេ។
លោកដូណាល់ត្រាំ បានអះអាងថា ការប្តូរទីតាំងស្ថានទូតអាមេរិកទៅក្រុងហ្សេរុយសាឡិមនេះ ជាសញ្ញានៃការចាប់ផ្តើមនៃវិធីសាស្រ្តថ្មីនៃការដោះស្រាយបញ្ហាជម្លោះរវាងអ៊ីស្រាអែលនិងប៉ាឡេស្ទីន។
តែប៉ាឡេស្ទីនពុំយល់ដូច្នេះនោះទេ ហើយមានការមិនពេញចិត្តយ៉ាងខ្លាំងចំពោះរឿងនេះ។ ប៉ាឡេស្ទីនបានធ្វើការរិះគន់ភ្លាមៗនិងហៅការប្រកាសប្តូរទីតាំងស្ថានទូតអាមេរិកនេះថា ជា"ការញុះញង់ដល់បណ្តាជនអារ៉ាប់ទាំងអស់"។
ប៉ាឡេស្ទីនថែមទាំងប្រឆាំងទៅនឹងកាលបរិច្ឆេទដែលអាមេរិកបានជ្រើសរើសសម្រាប់ការប្តូរទីតាំងស្ថានទូតនេះទៀតផង ដោយប៉ាឡេស្ទីនបានហៅថ្ងៃទី១៤ ខែឧសភាដែលអ៊ីស្រាអែលប្រកាសឯករាជ្យក្នុងឆ្នាំ១៩៤៨នោះ ថាជា "ថ្ងៃនៃសេចក្តីមហន្តរាយ"។
សូមរំលឹកផងដែរថា ដោយមានការខឹងសម្បារចំពោះការទទួលស្គាល់លោកត្រាំថាក្រុងហ្សេរុយសាឡិមជារដ្ឋធានីរបស់ប្រទេសអ៊ីស្រាអែល និងការដាក់ស្ថានទូតនៅហ្សេរុយសាឡិមនេះ មេដឹកនាំប៉ាឡេស្ទីនលោក Mahmud Abbasបានប្រកាសថាពួកគេនឹងលែងទទួលស្គាល់អាមេរិកជាអ្នកសម្របសម្រួលការចរចាលើកិច្ចព្រមព្រៀងសន្តិភាពរវាងអ៊ីស្រាអែលនិងប៉ាឡេស្ទីន។ ហើយកាលពីដើមសប្តាហ៍នេះ លោក Mahmud Abbas បានធ្វើដំណើរទៅកាន់អង្គការសហប្រជាជាតិ ដើម្បីអំពាវនាវអោយមានសន្និសិទ្ធអន្តរជាតិនៅពាក់កណ្តាលឆ្នាំ២០១៨នេះ ក្នុងគោលបំណងបញ្ឈប់តួនាទីរបស់សហរដ្ឋអាមេរិកក្នុងការសម្រុះសម្រួលក្នុងបញ្ហាជម្លោះរវាងប៉ាឡេស្ទីននិងអ៊ីស្រាអែល។
ចំពោះរឿងដាក់ស្ថានទូតនៅក្រុងហ្សេរុយសាឡិមនេះ អ៊ីស្រាអែលបានសម្តែងនូវសេចក្តីស្វាគមន៍ ព្រមទាំងសេចក្តីថ្លែងអំណរគុណផងដែរចំពោះលោកប្រធានាធិបតីអាមេរិកលោកដូណាល់ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ