អង្គការអូតង់ រៀបចំចំណាត់ការទប់ទល់នឹងការបង្កើនមីស៊ីលរបស់រុស្ស៊ី
អង្គការអូតង់ នាខណៈនេះកំពុងតែរៀបចំគម្រោងការទប់ស្កាត់ ការបង្កើននូវការផលិតមីស៊ីលរបស់ប្រទេសរុស្ស៊ី។ នេះ ជាការលើកឡើងរបស់ប្រមុខដឹកនាំអង្គការអូតង់ កាលពីថ្ងៃអង្គារ ទី១២ កុម្ភៈ ដោយបានបន្ថែមថា អង្គការអូតង់ បានចាប់ផ្តើមគិតគូរហើយ ពីបញ្ហានេះ ដើម្បីការពារ កុំឲ្យមានការរីកសាយភាយមីស៊ីលរយៈចម្ងាយមធ្យម នៅក្នុងតំបន់ ព្រមទាំងនៅទូទាំងពិភពលោក បន្ទាប់ពីសន្ធិសញ្ញាស្តីអំពីអាវុធនុយក្លេអ៊ែរ រវាងអាមេរិក និងរស្ស៊ី ត្រូវបានព្យួរ។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីប្រទេសហត្ថលេខី ពោលគឺសហរដ្ឋអាមេរិក និងប្រទេសរុស្សី បានសម្រេចព្យួរនូវ សន្ធិសញ្ញាហាមឃាត់មីស៊ីលរយៈចម្ថាយមធ្យមរួចមក គេចាប់ផ្តើមបារម្ភខ្លាចថា ការប្រកួតប្រជែងសព្វាវុធថ្មីៗ អាចផ្ទុះឡើងនៅអឺរ៉ុប។ មួយវិញទៀត អង្គការអូតង់ ក៏ផ្តើមកើតចិត្តបារម្ភផងដែរ អំពីការគំរាមកំហែងរបស់រុស្ស៊ីនៅក្នុងតំបន់។
ជាក់ស្តែង ដើម្បីរិះរកវិធីត្រៀមបង្កាទល់នឹង បញ្ហាប្រឈមនេះ ប្រទេសដែលជាសមាជិកអង្គការអូតង់ បានជួបប្រជុំពិភាក្សាគ្នា នៅថ្ងៃពុធ ទី១៣ កុម្ភៈ ឆ្នាំ២០១៩ នេះ។ នៅក្នុងកិច្ចប្រជុំអគ្គលេខាធិការ របស់អង្គការអូតង់ លោក Jens Stoltenberg បាននិយាយថាក្រុមប្រទេសសម្ព័ន្ធអូតង់ ផ្តោតជជែកពិភាក្សាគ្នា អំពីវិធីទប់ស្កាត់ការរីកសាយភាយ នូវការផលិតមីស៊ីលរយៈចម្ងាយមធ្យម។
លើសពីនេះ លោក Stoltenberg បានអះអាងថា បណ្តាប្រទេសអឺរ៉ុប ចង់ឲ្យរុស្ស៊ីវិលមកគោរពសន្ធិសញ្ញាហាមឃាត់មីស៊ីលធន់មធ្យម និងបោះបង់ចោលនូវមហិច្ឆតា ផលិតប្រព័ន្ធមីស៊ីលថ្មី 9M729 របស់ខ្លួនវិញ។
លោកបន្តទៀតថា នេះមិនមែនមានន័យថា អូតង់ចង់បង្កើនមីស៊ីលដូចរុស្ស៊ីនោះទេ ក៏ប៉ុន្តែ អូតង់ចង់ធានាឲ្យបាន នូវការការពារខ្លួន ប្រកបដោយប្រសិទ្ធិភាពខ្ពស់ ទល់ទៅនឹងការបង្កើនមីស៊ីលនៅក្នុងតំបន់។
ជាមួយគ្នានេះដែរ ឯកអគ្គរដ្ឋទូតសហរដ្ឋអាមេរិក ប្រចាំអង្គការអូតង់ បានលើកឡើងថា វាដល់ពេលហើយ ដែលអាមេរិក ត្រូវចាត់វិធានការចំពោះរុស្ស៊ី ដែលរំលោភបំពាន មិនគោរពតាមសន្ធិសញ្ញា។ លោកបន្តថា នាខណៈនេះ មន្ទីរបញ្ចកោណ ក៏បានចាប់ផ្តើម រិះគិតផងដែរ ពីវិធីទប់ទល់នឹងការបង្កើនមីស៊ីលរបស់រុស្ស៊ី។
គួររម្លឹកជូនថា សន្ធិសញ្ញាហាមឃាត់មីស៊ីលរយៈចម្ងាយមធ្យម ត្រូវបានចុះហត្ថលេខាដោយសហរដ្ឋអាមេរិក និងសហភាពសូវៀត នៅក្នុងឆ្នាំ១៩៨៧។ សន្ធិសញ្ញានេះ ហាមប្រាម មិនឲ្យមានការផលិតមីស៊ីល រយៈចម្ងាយចន្លោះពី ៥០០ ទៅ ៥ ៥០០ គីឡូម៉ែត ក្នុងគោលបំណង បញ្ចប់នូវការបង្កើនការផលិតក្បាលកាំជ្រួចក៏មានគ្រោះថ្នាក់ នៅក្នុងទឹកដីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ