បំណែករបស់នាវាមុជទឹកអាហ្សង់ទីន ត្រូវបានរកឃើញបន្ទាប់ពីបាត់ខ្លួនរយៈពេល១ឆ្នាំ
កងទ័ពជើងទឹកអាហ្សង់ទីន និយាយថាបំណែកនៃនាវាមុជទឹក ដែលបានបាត់ខ្លួនរួមជាមួយនាវិកចំនួន៤៤នាក់ កាលពីឆ្នាំមុន ត្រូវបានគេរកឃើញហើយ នៅឯមហាសមុទ្រអាត្លង់ទិច នាថ្ងៃសុក្រម្សិលមិញ។ ការរកឃើញថ្មីនេះ បានបំផ្លាញក្តីសង្ឃឹមរបស់គ្រួសារ ដែលគិតថាក្រុមនាវិកទាំងនោះអាចនៅរស់រានមានជីវិត។
ចុះផ្សាយនៅថ្ងៃ៖ កែប្រែថ្ងៃទី៖
នាវាមុជទឹកអាហ្សង់ទីនឈ្មោះ ARA San Juan បានបាត់ខ្លួនក្នុងរយៈចម្ងាយ ៤៣០ គីឡូម៉ែត្រ ពីឆ្នេរអាហ្សង់ទីន កាលពីថ្ងៃទី១៥ ខែវិច្ឆិកា ឆ្នាំ២០១៧ កន្លងទៅ។ ក្រុមកងទ័ពជើងទឹក បានបញ្ឈប់បេសកកម្មស្វែងរករបស់ខ្លួន ពីរសប្តាហ៍បន្ទាប់ពីគ្រោះថ្នាក់នេះកើតឡើង។
តែទោះជាយ៉ាងណាក្តី មួយឆ្នាំក្រោយពីនាវានេះបាត់ខ្លួន ក្រុមមន្រ្តីអាហ្សង់ទីនបានប្រកាសដោយសុទិដ្ឋិនិយមថា គេអាចរកឃើញនាវានោះក្នុងជម្រៅប្រមាណជា ៨០០ ម៉ែត នៅខាងក្រោមផ្ទៃទឹកនៃមហាសមុទ្រអាត្លង់ទិក។
ជាមួយគ្នានេះផងដែរ បើតាមសេចក្តីថ្លែងការណ៍ បង្ហោះនៅលើបណ្តាញសង្គម tweeter របស់កងទ័ពជើងទឹកអាហ្សង់ទីន បំណែករបស់នាវាមុជទឹក ត្រូវបានរកឃើញដោយ ក្រុមហ៊ុនរុករករបស់អាមេរិក ជាក្រុមហ៊ុនចុងក្រោយបង្អស់ ដែលនៅខ្នះខ្នែងបន្តស្វែងរកនាវាដែលបាត់។
គួរគម្រាបជូនថា កងនាវាចរ បានបាត់បង់ទំនាក់ទំនងជាមួយនាវាមុជទឹក ARA San Juan កាលពីថ្ងៃទី១៥ ខែវិច្ឆិកា ឆ្នាំមុន គឺក្នុងរយៈចម្ងាយប្រមាណជា ៤៥០ គីឡូម៉ែត្រ ពីឆ្នេរអាហ្សង់ទីន គឺខណៈពេលដែលនាវានោះ ធ្វើដំណើរត្រឡប់ទៅកាន់មូលដ្ឋាន ដែលមានទីតាំង ស្ថិតនៅចុងខាងត្បូងនៃប្រទេសអាហ្សង់ទីន។
ក្រោយពីហេតុការណ៍បាត់នាវានេះដែរ ក្រុមកងទ័ពជើងទឹកអាហ្សង់ទីនត្រូវបានគេ រិះគន់ជាខ្លាំងជុំវិញប្រតិបត្តិការសង្គ្រោះរបស់ពួកគេ ដែលធ្វើក្នុងរយៈពេលខ្លី ពោលគឺត្រឹមតែ២សប្តាហ៍។ ក្រោយមកទៀត ក្រុមគ្រួសារជនរងគ្រោះ បានដាក់សម្ពាធជាខ្លាំង ឲ្យរដ្ឋាភិបាលអាហ្សង់ កុំបោះបង់ចោលប្រតិបត្តិការស្វែងរកនាវាដែលបាត់នោះឲ្យសោះ ពីព្រោះពួកគេសង្ឃឹមថា ក្រុមនាវិកដែលជាសាច់ញាត្តិរបស់ពួកគេ អាចនៅរស់រានមានជីវិត។
គួររំឭកជូនថា វិស័យនាវាផ្លូវទឹក មានកម្រិតទាបណាស់នៅក្នុងប្រទេសអាហ្សង់ទីន។ ក្នុងអំឡុងពេលនៃរបបផ្តាច់ការយោធាចន្លោះឆ្នាំ ១៩៧៦-១៩៨៣ មធ្យោបាយតាមនាវា ក៏ធ្លាប់ត្រូវបានគេប្រើជាមជ្ឈមណ្ឌលឃុំឃាំង និងធ្វើទារុណកម្មផងដែរ ហើយក្នុងអំឡុងពេលនោះ មានមនុស្សប្រមាណជា ៣០.០០០ នាក់ បានបាត់ខ្លួនទៅតាមនាវាមួយចំនួនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ