នាយករដ្ឋមន្ត្រីនូវែលសេឡង់ជំរុញឲ្យពិភពលោកចាត់វិធានការចំពោះខ្លឹមសារនៅលើបណ្តាញសង្គម
នាយករដ្ឋមន្ត្រីប្រទេសនូវែលសេឡង់ អ្នកស្រី ហ្សាស៊ីនដា អារឌែន Jacinda Ardern នៅថ្ងៃពុធ ទី២០ មីនា បានអំពាវនាវឱ្យមានការចាត់វិធានការជាសកល ដើម្បីប្រយុទ្ធប្រឆាំងទៅនឹងគ្រោះថ្នាក់ដែលបង្កដោយបណ្តាញសង្គម។ ការអំពាវនាវរបស់អ្នកស្រីនាយករដ្ឋមន្ត្រីនូវែលសេឡង់ធ្វើឡើង ស្របពេលដែលសហគមន៍អ៊ីស្លាម ចាប់ផ្តើមបញ្ចុះសពជងរងគ្រោះដោយសារសោកនាដកម្មបាញ់ប្រហារ នៅវិហារអ៊ីស្លាម ២កន្លែង ក្នុងទីក្រុងក្រៃឈើច កាលពីថ្ងៃសុក្រ ទី១៥ មីនា កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
៥ ថ្ងៃបន្ទាប់ពីហេតុការណ៍បាញ់ប្រហារនៅក្នុងក្រុងក្រៃឈើច នាយករដ្ឋមន្ត្រីនូវែលសេឡង់ បានថ្លែងថា វាដល់ពេលហើយដែលមេដឹកនាំពិភពលោកត្រូវរួមគ្នាដោះស្រាយ ឬក៏ឆ្លើយតបទៅនឹងបណ្តាញសង្គម។ បណ្តាញសង្គម ដែលអ្នកស្រីអះអាងថា បានជួយជំរុញឲ្យអំពើហិង្សា និងនិន្នាការជ្រុលនិយមកើនឡើង។
គួរជម្រាបជូនថា ការលើកឡើងរបស់អ្នកស្រីនាយករដ្ឋមន្ត្រី ពាក់ព័ន្ធការរួមចំណែករបស់បណ្តាញសង្គមក្នុងការបង្កើនអំពើហិង្សា និងគំនិតជ្រុលនិយម គឺធ្វើឡើងបន្ទាប់ពីវីដេអូអំពីព្រឹត្តិការណ៍បាញ់សម្លាប់មនុស្សចំនួន ៥០ នាក់ នៅក្នុងទីក្រុងក្រៃឈើច ស្ថិតនៅភាគខាងត្បូងប្រទេសនូវែលសេឡង់ត្រូវបានបង្ហោះនិងចែកចាយនៅលើបណ្តាញសង្គមដូចជា ហ្វេសហ៊ុក និងទ្វីតធ័រយ៉ាងផុលផុស។
ក្រោយហេតុការណ៍នេះ អាជ្ញាធរនូវែលសេឡង់ក៏បានអំពាវនាវផងដែរកុំឲ្យមានការចែកចាយរូបភាពវីដេអូដ៏ហិង្សានេះ ហើយភ្លាមៗនោះ ក្រុមហ៊ុនហ្វេសប៊ុក-ទ្វីតធ័រ បានលុបចោលនូវខែ្សវីដេអូទាំងនោះចេញពីបណ្តាញសង្គមរបស់ខ្លួនផងដែរ។
ទាក់ទងរឿងនេះដែរ ក្រុមហ៊ុនហ្វេសប៊ុកបាននិយាយថារីដេអូដែលផ្សាយផ្ទាល់ពីការបាញ់ប្រហារនៅក្រៃឈើចត្រូវបានគេមើលឃើញតិចជាង ២០០ ដង ប៉ុន្តែហ្វេសប៊ុកបានដកចេញនូវវីដេអូច្រើនរហូតដល់ប្រមាណជា ១លាន ៥ សែន។ តំណាងក្រុមហ៊ុនហ្វេសប៊ុក ក៏បានឲ្យដឹងទៀតថា ការចែកចាយវីដេអូនៃព្រឹត្តិការណ៍បាញ់សម្លាប់មានច្រើន ដោយសារមានអ្នកចាប់អារម្មណ៍ពីរឿងនេះខ្លាំង។
តែទោះបីជាក្រុមហ៊ុនហ្វេសប៊ុក បានចាត់វិធានការដកចេញនូវវីដេអូនៃការបាញ់ប្រហារយ៉ាងណាក្តី នាយករដ្ឋមន្ត្រីនូវែលសេឡង់នៅតែមិនសប្បាយចិត្ត និងថាក្រុមហ៊ុនបណ្តាញសង្គមត្រូវទទួលខុសត្រូវចំពោះការរួមចំណែកបង្កើននូវអំពើហិង្សា មិនមែនគិតតែពីរកប្រាក់ចំណូលតែមួយមុខនោះទេ។
គួរជម្រាបជូនថា រហូតមកទល់ពេលនេះ អាជ្ញាធរនូវែលសេឡង់បានចាប់ខ្លួនមនុស្សចំនួនពីរនាក់ហើយ ទាក់ទងនឹងករណីចែកចាយវីដេអូហិង្សានៃការបាញ់ប្រហារនៅក្រៃឈើច។ ចំណែក នៅឯសហរដ្ឋអាមេរិកវិញ គណៈកម្មាធិការសភា កំពុងស្នើសុំឲ្យនាយកប្រតិបត្តិ ក្រុមហ៊ុនបច្ចេកវិទ្យាធំៗរបស់អាមេរិក ពន្យល់ពីការរីករាលដាលនៃវីដេអូដ៏រន្ធត់និងហិង្សា នៅលើបណ្តាញអ៊ីនធឺណែតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ