កងទ័ពហ្វីលីពីនប្រកាសរួមកម្លាំងជាមួយក្រុមឧទ្ទាមរំដោះអ៊ីស្លាមMoro ដើម្បីកំចាត់ក្រុមជីហាត
ថ្ងៃពុធនេះ កងទ័ពហ្វីលីពីនបានប្រកាសរួបរួមកម្លាំងជាមួយក្រុមឧទ្ទាមរណសិរ្សរំដោះម៉ូរូ ដែលជាអតីតសត្រូវ ដើម្បីសម្រេចទិសដៅកំចាត់ក្រុមជីហាតមួយក្រុមនៅភាគខាងត្បូងប្រទេស។ កងទ័ពហ្វីលីពីនគ្រោងផ្តល់ជំនួយតាមផ្លូវអាកាស ជួយក្រុមឧទ្ទាមរណសិរ្សម៉ូរ៉ូ ក្នងយុទ្ធនាការកំចាត់ក្រុមជីហាត។
ចុះផ្សាយនៅថ្ងៃ៖ កែប្រែថ្ងៃទី៖
ដើម្បីបង្កើនប្រសិទ្ធភាពក្នុងការកំចាត់ក្រុមជីហាត កងទ័ពហ្វីលីពីនបានប្រកាសរួបរួម កម្លាំងគ្នាជាមួយក្រុមឧទ្ទាមរណសិរ្សរំដោះអ៊ីស្លាមម៉ូរ៉ូ ហៅកាត់ថា ក្រុម Milf ដែលជាអតីតសត្រូវរបស់ហ្វីលីពីន។ កងទ័ពនិងក្រុមឧទ្ទាមអ៊ីស្លាមម៉ូរ៉ូ មានទិសដៅរួមគ្នា គឺកំចាត់ក្រុមជីហាតមួយក្រុម នៅភាគខាងត្បូងក្រុងម៉ារ៉ាវី។ ក្រុមជីហាតនេះនាំមុខដោយសកម្មជនជីហាតឈ្មោះថា អ៊ីស្មាអែល អាប់ឌុលម៉ាលិក ដែលគេដាក់នាមអោយថា អាប៊ូ ទូរ៉ៃហ្វ៊ី Abu Turaifi។ សកម្មជនអាប៊ូ ទូរ៉ៃហ្វី ធ្លាប់ជាមេដឺកនាំមួយរូប នៅក្រុមឧទ្ទាមម៉ូរ៉ូដែរ។ ក្រុមឧទ្ទាមម៉ូរ៉ូប្រាប់ថា ក្រុមជីហាតអាប៊ូ ទូរ៉ៃហ្វ៊ី មួយនេះគាំទ្រក្រុមភេរវជនអង្គការរដ្ឋអ៊ីស្លាម។ ឆ្លៀតពេលកងទ័ពកំពុងផ្តោតការប្រយុទ្ធនៅក្រុងម៉ារ៉ាវី ក្រុមជីហាតមួយនេះបានពង្រឹងកងកម្លាំង និងបើកការវាយប្រហារ កាលពីខែសីហា។
ក្នុងការរួមដៃជាមួយក្រុមឧទ្ទាមម៉ូរ៉ូ ដើម្បីកំចាត់ក្រុមអាប៊ូ ទីរ៉ៃហ្វី មេបញ្ជាការកងទ័ពហ្វីលីពីនប្រាប់ថា កងទ័ពគ្រោងជួយដោយប្រយោល គ្រោងផ្តល់ជំនួយតាមផ្លូវអាកាសដល់ក្រុមរណសិរ្សម៉ូរ៉ូ។ ប៉ុន្តែ មិនលាយឡំកម្លាំងជាមួយក្រុមម៉ូរ៉ូទេ ព្រោះបច្ចេកទេសវាយប្រហាររបស់កងទ័ពនិងក្រុមម៉ូរ៉ូមិនដូចគ្នាទេ។ អ្នកសារព័ត៌មានAFP បានឃើញកងទ័ពប្រើឧទ្ធម្ភាគចក្រ២គ្រឿង វាយប្រហារក្រុមអាប៊ូ ទូរ៉ៃហ្វ៊ី។ ប៉ូលិសក៏បានដឹកជនរងគ្រោះរបស់ក្រុមឧទ្ទាមម៉ូរ៉ូដែរ។
សូមរំលឹកថា ក្រុមឧទ្ទាមរណសិរ្សម៉ូរ៉ូមានសកម្មជនប្រយុទ្ធមួយម៉ឺននាក់ ហើយបើយោងតាមរដ្ឋាភិបាលហ្វីលីពីន ហិង្សាបះបោរផ្តាច់ទឹកដីនិយមរបស់ក្រុមមួយនេះបានធ្វើអោយមានមនុស្សស្លាប់មួយសែននាក់។ រដ្ឋាភិបាលហ្វីលីពីនបានបើក ការចរចាសន្តិភាពជាមួយក្រុមឧទ្ទាមម៉ូរ៉ូ និងសម្រេចបានកិច្ចព្រមព្រៀងសន្តិភាពកាលពីឆ្នាំ២០១៤។ ប៉ុន្តែ ក្រុមម៉ូរ៉ូនៅមិនទាន់បានទំលាក់អាវុធចុះទេ ដោយរង់ចាំអោយហ្វីលីពីនបោះឆ្នោតចេញច្បាប់ទទួលស្គាល់ភាពស្វ័យតតាមតំបន់អ៊ីស្លាមផ្សេងៗជាមុនសិន។
ពេលនេះ ក្រៅពីត្រូវរួមដៃជាមួយក្រុមរណសិរ្សម៉ូរ៉ូ ដើម្បីកំទេចក្រុមជីហាតនៅភាគខាងត្បូងក្រុងម៉ារ៉ាវី កងទ័ពហ្វីលីពីនក៏កំពុងវាយបំបែកសកម្មជនអ៊ីស្លាមជ្រុលនិយម នៅតាមទីតាំងច្រើនកន្លែងទៀត នៅកោះមីនដាណាវ ភាគខាងត្បូងប្រទេសដែរ។ ចំណែកក្រុមរណសិរ្សម៉ូរ៉ូវិញក៏បានមមាញឹកកំទេចក្រុមដែលចូលដៃជើងជាមួយក្រុមភេរវជនរដ្ឋអ៊ីស្លាមដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ