កូរ៉េខាងជើងបាញ់សាកល្បងមីស៊ីលរយៈចម្ងាយខ្លី
កូរ៉េខាងត្បូងបានអះអាងថា កូរ៉េខាងជើងបានធ្វើការបាញ់សាកល្បងសព្វាវុធរយៈចម្ងាយខ្លីជាច្រើនគ្រាប់ នៅថ្ងៃសៅរ៍នេះ ក៏ប៉ុន្តែ រហូតមកទល់នឹងពេលនេះ គេនៅមិនទាន់អាចកំណត់ឲ្យបានច្បាស់លាស់នៅឡើយទេ អំពីប្រភេទនៃសព្វាវុធទាំងនេះ។ ប្រសិនបើនេះគឺជាមីស៊ីលបាលីស្ទិករយៈចម្ងាយខ្លីពិតប្រាកដមែន វាគឺជាលើកទី១ នៅក្នុងរយៈពេលជាងមួយឆ្នាំកន្លងមកនេះ ហើយវាអាចជាការដំឡើងសាច់ដុំ ដើម្បីដាក់សម្ពាធ នៅក្នុងការចរចានុយក្លេអ៊ែរជាមួយអាមេរិក។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍ពីដំបូង នាយសេនាធិការចម្រុះនៃកងទ័ពកូរ៉េខាងត្បូងបានអះអាងថា អ្វីដែលកូរ៉េខាងជើងបានបាញ់សាកល្បងនៅព្រឹកថ្ងៃសៅរ៍នេះ គឺជា "មីស៊ីលរយៈចម្ងាយខ្លី” ក៏ប៉ុន្តែ ក្រោយមក នៅក្នុងសេចក្តីថ្លែងការណ៍មួយទៀត បានប្រើពាក្យត្រឹមតែ “សព្វាវុធរយៈចម្ងាយខ្លី” តែប៉ុណ្ណោះ ដោយមិនបញ្ជាក់ថា ជាប្រភេទមីស៊ីល ឬក៏ជាអ្វីផ្សេងទៀតនោះទេ។
សព្វាវុធនេះត្រូវបានបាញ់ចេញពីឆ្នេរប៉ែកខាងកើតរបស់កូរ៉េខាងជើង ដោយខ្លះហោះបានចម្ងាយ ៧០គីឡូម៉ែត្រ ហើយខ្លះទៀតហោះបានរហូតដល់ទៅ ២០០គីឡូម៉ែត្រ ទៅក្នុងសមុទ្រ ដែលស្ថិតនៅចន្លោះឧបទ្វីបកូរ៉េ និងប្រទេសជប៉ុន។ ក៏ប៉ុន្តែ បើយោងតាមក្រសួងការពារជាតិជប៉ុន មីស៊ីលអស់ទាំងនេះមិនបានហោះចូលទៅដល់ក្នុងដែនទឹករបស់ជប៉ុននោះទេ។
នៅឯទីក្រុងវ៉ាស៊ីងតោនឯណោះវិញ មន្រ្តីអ្នកនាំពាក្យសេតវិមានបានលើកឡើងថា អាមេរិកបានដឹង អំពីការបាញ់សាកល្បងនេះ ហើយមន្រ្តីផ្សេងទៀតនៅក្នុងជួររដ្ឋាភិបាលអាមេរិកបានលើកឡើងថា អ្នកជំនាញរបស់ខ្លួនកំពុងតែវិភាគទៅលើទិន្នន័យ ដើម្បីកំណត់ថា តើអ្វីដែលកូរ៉េខាងជើងបាញ់សាកល្បងនេះ គឺជាមីស៊ីល ឬជាប្រភេទអាវុធអ្វីផ្សេងទៀត។
គួររំឭកឡើងវិញថា លើកចុងក្រោយ ដែលកូរ៉េខាងជើងបានធ្វើការបាញ់សាកល្បងមីស៊ីលបាលីស្ទិក គឺកាលពីខែវិច្ឆិកាឆ្នាំ២០១៧កន្លងទៅ ហើយចាប់ពីពេលនោះមក កូរ៉េខាងជើង ថ្វីដ្បិតតែបានបាញ់សាកល្បងសព្វាវុធខ្លះ ក៏ប៉ុន្តែ មិនដែលបាញ់សាកល្បងមីស៊ីលបាលីស្ទិកនោះទេ ទោះជាមីស៊ីលរយៈចម្ងាយជិត ចម្ងាយមធ្យម ឬក៏ជាមីស៊ីលអន្តរទ្វីប។
ការបាញ់សាកល្បងនៅថ្ងៃសៅរ៍នេះ បើទោះជាមីស៊ីលបាលីស្ទិករយៈចម្ងាយខ្លីមែនក៏ដោយ ក៏មិនប្រាកដថា កូរ៉េខាងជើងដកចេញមកវិញនូវការសន្យាផ្អាកការសាកល្បងមីស៊ីលនិងនុយក្លេអ៊ែរដែលធ្លាប់ធ្វើនៅក្នុងអំឡុងពេលចរចានុយក្លេអ៊ែរជាមួយអាមេរិកនោះដែរ ពីព្រោះថា អ្វីដែលកូរ៉េខាងជើងសន្យាផ្អាកនោះ គឺទាក់ទងនឹងមីស៊ីលបាលីស្ទិកអន្តរទ្វីប។
ក៏ប៉ុន្តែ ទោះជាយ៉ាងណាក៏ដោយ ការបាញ់សាកល្បងនៅថ្ងៃនេះ វាគឺជាកាយវិកាមួយទៀត ដែលបង្ហាញពីការមិនសប្បាយចិត្តរបស់កូរ៉េខាងជើង នៅក្នុងដំណើរការចរចាជាមួយអាមេរិក ចាប់តាំងពីបរាជ័យនៃជំនួបកំពូល រវាងលោកគីម ជុងអ៊ុន និងលោកដូណាល់ ត្រាំ នៅក្នុងទីក្រុងហាណូយ ប្រទេសវៀតណាម កាលពីចុងខែកុម្ភៈកន្លងទៅ។ កូរ៉េខាងជើងទំនងជាយកការបាញ់សាកល្បងអាវុធនេះ ដើម្បីជាមធ្យោបាយក្នុងការដាក់សម្ពាធឲ្យអាមេរិកធ្វើសម្បទាន ទៅតាមការទាមទាររបស់ខ្លួន ជាពិសេស ការទាមទារឲ្យដកទណ្ឌកម្មសេដ្ឋកិច្ច ដែលក្រុងព្យុងយ៉ាងតែងតែទាមទារដោយទទូចពីអាមេរិក ដើម្បីជាថ្នូរនឹងការផ្អាកសកម្មភាពនុយក្លេអ៊ែរនិងមីស៊ីលរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ