គ្រោះធម្មជាតិធ្វើឲ្យមនុស្សផ្លាស់ទីច្រើន បើប្រៀបធៀបនឹងសង្រ្គាម
គ្រោះធម្មជាតិនៅឆ្នាំ ២០១៣បានធ្វើឲ្យចំនួនមនុស្សបម្លាស់ទី មានច្រើនជាងចំនួនមនុស្សផ្លាស់ទីដោយសារសង្រ្គាម បីដង នេះបើតាមការសិក្សារបស់ក្រុមប្រឹក្សាជនភៀសខ្លួនរបស់ប្រទេសន័រវែស កាលពីថ្ងៃពុធ ទី ១៧ កញ្ញា។ អង្គការធ្វើការខាងជនភៀសខ្លួនជាបន្ទាន់មួយនេះបានទាញសញ្ញាក្រើនរំលឹកពីផលវិបាកដោយគ្រោះធម្មជាតិ នៅមួយសប្តាហ៍មុន ដែលជំនួបកំពូលស្តីពីអាកាសធាតុបើកធ្វើឡើង នៅទីស្នាក់ការអង្គការសហប្រជាជាតិ ក្នុងទីក្រុងញូវយ៉ក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
បើតាមរបាយការណ៍របស់ក្រុមប្រឹក្សាជនភៀសខ្លួនរបស់ប្រទេសន័រវែស នៅឆ្នាំ ២០១៣ មនុស្សប្រមាណ២២លាននាក់បានផ្លាស់ទី ចាកចេញពីកន្លែងរស់នៅរបស់ខ្លួន ដោយសារគ្រោះមហន្តរាយធម្មជាតិ។ ដោយផ្អែកទៅលើតួលេខនេះ អង្គការឯករាជ្យមួយនេះដែលជំនាញខាងផ្តល់ជំនួយបន្ទាន់សម្រាប់ជនភៀសខ្លួនបានស្នើសុំឲ្យមេដឹកនាំក្នុងពិភពលោកប្រញាប់ចាត់វិធានការ ដើម្បីទប់ស្កាត់ការប្រែប្រួលអាកាសធាតុ ដែលជាប្រភពបង្កឲ្យមានគ្រោះមហន្តរាយធម្មជាតិ។
កាលពីថ្ងៃពុធ អង្គការធ្វើការខាងអាកាសធាតុជាច្រើនដែលបានប្រជុំគ្នា នៅទីក្រុងប៉ារីស បានទាមទារផងដែរឲ្យរដ្ឋាភិបាលប្រទេសធំៗនៅក្នុងពិភពលោក ជាពិសេសបារាំងផ្ទាល់ប្រកាសចូលវិភាគទាន ដើម្បីយុទ្ធនាការកាត់បន្ថយឧស្ម័នផ្ទះកញ្ចក់ផង និងជួយប្រទេសកំពុងអភិវឌ្ឍន៍ដែលកំពុងរងគ្រោះដោយសារការប្រែប្រួលអាកាសធាតុផង។
ប្រធានអង្គការន័រវែសខាងលើបានថ្លែងទាមទារប្រមុខរដ្ឋាភិបាលដែលនឹងចូលរួម នៅក្នុងជំនួបកំពូលស្តីពីការប្រែប្រួលអាកាសធាតុ នៅទីក្រុងញូវយ៉កឲ្យគិតគូរ ធ្វើនយោបាយ ដែលផ្តល់សារៈសំខាន់ដល់ប្រជាជនរងគ្រោះដោយសារគ្រោះធម្មជាតិ ពោលគឺជួយសម្រួលបញ្ហាអន្តោប្រវេសន៍ និងផ្តល់ជំរកដែលសមស្របតាមការចង់បានរបស់ប្រជាជនបម្លាស់ទី។
តាមរបាយការណ៍របស់ក្រុមប្រឹក្សាជនភៀសខ្លួន ៨០ភាគរយនៃប្រជាជនបម្លាស់ទី មាននៅក្នុងតំបន់អាស៊ី។ នៅហ្វីលីពីន គ្រោះមហន្តរាយជាតិធម្មជាតិ ដែលបង្កដោយខ្យល់ព្យុះ ពីរលើកធំៗបានធ្វើមនុស្សបាត់បង់ផ្ទះសម្បែង និងផ្លាស់ទីជាង ៥លាន ៨សែននាក់។
ជារួម បើតាមរបាយការណ៍ដដែល មិនថា ប្រទេសក្រីក្រ ឬ អ្នកមាន គឺមិនអាចជៀសរួច ផុតពីវិបត្តិបម្លាស់ទីរបស់ប្រជាជន។ ជប៉ុនជួបខ្យល់ព្យុះ ចំណែកអាមេរិករងគ្រោះដោយខ្យល់គួចTornades នៅពេលកាណាដា បានបង្ខំចិត្តជម្លៀសប្រជាជនជាង៦សែននាក់ពីតំបន់រងគ្រោះដោយទឹកជំនន់នៅភាគខាងលិចប្រទេស។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ