លោកចនឃែរីទៅអារ៉ាប៊ូសាអ៊ូឌីតដើម្បីជជែកពីបញ្ហាស៊ីរីនិងលីប៊ី
លោកចន ឃែរី រដ្ឋមន្រ្តីការបរទេសអាមេរិក កំពុងស្ថិតក្នុងប្រទេសអារ៉ាប៊ីសាអ៊ូឌីត នៅថ្ងៃអាទិត្យនេះ ដើម្បីជជែកអំពីការស្វែងរកដំណោះស្រាយបញ្ចប់វិបត្តិនៅស៊ីរី និងលីប៊ី។ ដំណើរទស្សនកិច្ចរបស់លោកប្រមុខការទូតអាមេរិកនៅអារ៉ាប៊ីសាអ៊ូឌីត ត្រូវធ្វើឡើង នៅមុនពេលបើកធ្វើជំនួបជាច្រើននៅក្នុងសប្តាហ៍ក្រោយ នៅក្នុងទីក្រុងវីយ៉ែនប្រទេសអូទ្រីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
នៅក្នុងដំណើរទៅកាន់ប្រទេសអារ៉ាប៊ីសាអ៊ូឌីត នៅថ្ងៃអាទិត្យនេះ លោកចន ឃែរី បានជួបជជែកជាមួយនឹងមេដឹកនាំកំពូលៗ រួមមាន ទាំងព្រះមហាក្សត្រ និងរដ្ឋមន្រ្តីការបរទេសអារ៉ាប៊ីសាអ៊ូឌីត។
បន្ទាប់ពីជំនួបនទាំងនេះ នៅល្ងាចថ្ងៃអាទិត្យនេះ លោកចន ឃែរី នឹងចាកចេញពីអារ៉ាប៊ីសាអ៊ូឌីត ធ្វើដំណើរឆ្ពោះទៅកាន់ទីក្រុងវីយ៉ែន ប្រទេសអូទ្រីស ដើម្បីចូលរួមក្នុងកិច្ចប្រជុំអន្តរជាតិស្តីពីវិបត្តិស៊ីរី និងវិបត្តិលីប៊ី នៅថ្ងៃចន្ទ និងថ្ងៃអង្គារ។ កិច្ចប្រជុំស្តីពីវិបត្តិលីប៊ីនឹងត្រូវធ្វើនៅថ្ងៃចន្ទ ក្រោមអធិបតីភាពរបស់លោកប្រមុខការទូតអាមេរិក និងប្រមុខការទូតអ៊ីតាលី ដែលជាសហប្រធាន។ ចំណែកឯនៅថ្ងៃអង្គារ គឺជាកិច្ចប្រជុំនៃក្រុមការងារអន្តរជាតិទទួលបន្ទុកដោះស្រាយវិបត្តិស៊ីរី ដែលមានការចូលរួមពីសំណាក់ប្រទេសចំនួន ១៧ និងអង្គការអន្តរជាតិចំនួន ៣ ហើយដែលស្ថិតក្រោមកិច្ចសម្របសម្រួលរបស់លោកចន ឃែរី និងលោកស៊ែរហ្គី ឡាវរ៉ូហ្វ រដ្ឋមន្រ្តីការបរទេសរុស្ស៊ី។
ក្រោយពីបញ្ចប់កិច្ចប្រជុំពីរថ្ងៃនេះ នៅថ្ងៃពុធ លោកចន ឃែរី នឹងបន្តដំណើរទៅកាន់ទីក្រុងព្រុចស៊ែល ប្រទេសប៊ែលហ្ស៊ិក ដើម្បីជួបប្រជុំថ្នាក់រដ្ឋមន្រ្តីការបរទេសរបស់អង្គការអូតង់ ដើម្បីជជែកអំពីបញ្ហាប្រឈមធំៗរបស់អូតង់ ជាពិសេស គឺទាក់ទងនឹងភាពតានតឹងជាមួយរុស្ស៊ី។
វាមិនមែនជារឿងចៃដន្យទេ ដែលលោកចន ឃែរី ធ្វើដំណើរទៅកាន់ប្រទេសអារ៉ាប៊ីសាអ៊ូឌីត មុនពេលទៅចូលរួមប្រជុំដោះស្រាយបញ្ហាស៊ីរី និងលីប៊ី ពីព្រោះថា អារ៉ាប៊ីសាអ៊ូឌីត គឺជាខ្នងបង្អែកដ៏ធំរបស់ក្រុមឧទ្ទាមស៊ីរី ដែលកំពុងធ្វើសង្រ្គាមផ្តួលរំលំរបបដឹកនាំរបស់លោកបាស្ហា អាល់អាសាដ។ ចំណែកឯប្រទេសមួយចំនួនទៀតដែលជាសម្ព័ន្ធមិត្តរបស់អារ៉ាប៊ីសាអ៊ូឌីត រួមមាន ដូចជា អេហ្ស៊ីប និងអារ៉ាប់រួមជាដើម គឺជាប្រទេសដែលកំពុងផ្តល់ការគាំទ្រដល់ភាគីជម្លោះនៅក្នុងប្រទេសលីប៊ី។
ដូច្នេះ សហរដ្ឋអាមេរិកត្រូវការជាចាំបាច់នូវកិច្ចសហប្រតិបត្តិការពីសំណាក់អារ៉ាប៊ីសាអ៊ូឌីត នៅក្នុងការស្វែងរកដំណោះស្រាយវិបត្តិ ទាំងនៅក្នុងប្រទេសស៊ីរី និងលីប៊ី។ ក៏ប៉ុន្តែ គេសង្កេតឃើញថា នៅក្នុងពេលបច្ចុប្បន្ននេះ ទំនាក់ទំនង រវាងសហរដ្ឋអាមេរិក និងអារ៉ាប៊ីសាអ៊ូឌីតកំពុងតែមានភាពរកាំរកូសខ្លាំង ដោយសារតែសំណុំរឿងនុយក្លេអ៊ែរអ៊ីរ៉ង់ផង និងចុងក្រោយនេះទៀត មានបញ្ហាចម្រូងចម្រាសទាក់ទងនឹងការចោទប្រកាន់របស់អាមេរិក ទៅលើអារ៉ាប៊ីសាអ៊ូឌីតថាមានជាប់ពាក់ព័ន្ធនឹងការវាយប្រហារភេរវកម្ម កាលពីថ្ងៃទី១១កញ្ញា២០០១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ