ចិនពិភាក្សាជាមួយសមាជិកក្រុមប្រឹក្សាសន្តិសុខអ.ស.ប.ពីប្រតិកម្មដែលត្រូវឆ្លើយតបទៅកូរ៉េខាងជើង
រដ្ឋមន្ត្រីការបរទេសចិនបានប្រាប់នៅថ្ងៃពុធនេះថា ចិនកំពុងពិភាក្សាជាមួយសមាជិកក្រុមប្រឹក្សាសន្តិសុខអង្គការសហប្រជាជាតិផ្សេងទៀត ពីប្រតិកម្មដែលត្រូវឆ្លើយតបទៅនឹងកូរ៉េខាងជើង ក្រោយមានការបាញ់មីស៊ីលរំលងទឹកដីជប៉ុន នៅថ្ងៃអង្គារម្សិលមិញ នេះ។ ម្សិលមិញ ក្រុមប្រឹក្សាសន្តិសុខអង្គការសហប្រជាជាតិបានកោះប្រជុំ បន្ទាន់ និងថ្កោលទោសជាឯកច្ឆន្ទចំពោះការបាញ់មីស៊ីលរបស់ក្រុងព្យុងយ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
លោកវ៉ាង យី រដ្ឋមន្ត្រីការបរទេសចិនលើកឡើងថា ចិនពិភាក្សាជាមួយសមាជិកផ្សេងៗទៀតនៃក្រុមប្រឹក្សាសន្តិសុខអង្គការសហប្រជាជាតិ ទាក់ទងនឹងស្ថានការណ៍ចុងក្រោយនេះ ក្រោយពេលកូរ៉េខាងជើងបានបាញ់មីស៊ីលបាលិស្ទិកចំងាយមធ្យម រំលងទឹកដីជប៉ុន។ យោងតាមលោកវ៉ាង យី ចិននិងសមាជិកផ្សេងទៀតនៃក្រុមប្រឹក្សាសន្តិសុខនឹងមានប្រតិកម្មដែលត្រូវឆ្លើយតបនឹងការបាញ់មីស៊ីលនេះ។ ការបាញ់មីស៊ីលក្រុងព្យុងយ៉ាងម្សិលមិញ រំលងទឹកដីជប៉ុន គិតពីឆ្នាំ២០០៩មក គឺទៅជាលើកទី១ហើយ តែជាទង្វើហួសហេតុធ្វើអោយចិនមិនជំទាស់ស្រុះស្រួលថ្កោលទោសជាមួយសមាជិកផ្សេងទៀត នៃក្រុមប្រឹក្សាសន្តិសុខអង្គការសហប្រជាជាតិ។
រដ្ឋមន្ត្រីការបរទេសចិនមិនបានបញ្ជាក់ថា តើចិននិងសមាជិកក្រុមប្រឹក្សាសន្តិសុខ១៤ប្រទេសផ្សេងទៀត បានពិភាក្សាពីទណ្ឌកម្មថ្មីៗប្រឆាំងកូរ៉េខាងជើងរឺយ៉ាងណាទេ។ យោងតាមព័ត៌មានពីប្រភពការទូត អង្គការសហប្រជាជាតិនៅមានវិធានការផ្សេងទៀត ដូចជាការបញ្ជូនពលករកូរ៉េខាងជើងដែលធ្វើការនៅបរទេស អោយត្រលប់ទៅស្រុកវិញ រឺក៏វិធានការដាក់ទណ្ឌកម្មលើផ្នែកប្រេងជាងដើម។ ទោះយ៉ាងនេះក្តី រដ្ឋមន្ត្រីការបទេសសចិនប្រាប់ថាសមាជិក ក្រុមប្រឹក្សាសន្តិសុខអង្គការសហប្រជាជាតិព្រមព្រៀង ថាត្រូវប្រឹងប្រែងរកដំណោះស្រាយបែបការទូត និងសន្តិភាព ចំពោះបញ្ហានុយក្លេអ៊ែរកូរ៉េខាងជើង។
លោកវ៉ាង យី នៅតែបង្ហាញជំហរចិន អំពាវនាវអោយមានការចរចា៦ប្រទេសឡើងវិញ ជាការចរចារវាងប្រទេសកូរ៉េទាំង២ អាមេរិក ចិន រុស្ស៊ី និងជប៉ុន។ ការចរចានេះជាប់គាំង តាំងពីឆ្នាំ២០០៩មក។ ចិននៅតែអំពាវនាវអោយចៀសវាងវិធានការដែលបន្ថែមភាពតានតឹងក្នុងតំបន់។
ដោយឡែក ក្នុងកិច្ចប្រជុំបន្ទាន់ក្រុមប្រឹក្សាសន្តិសុខម្សិលមិញ ត្បិតថា គ្រប់សមាជិកនាំគ្នាថ្កោលទោសកូរ៉េខាងជើង តែចិន រុស្ស៊ី និងអាមេរិកនៅតែមិនអាចចៀសពីការខ្វែង គំនិតគ្នាលើបញ្ហាមួយចំនួន។ កាលពីដើមខែសីហា ចិន និងរុស្ស៊ី សុទ្ធតែបាន បង្ហាញបំណងល្អដោយព្រមអនុម័តសំណើអាមេរិកបន្ថែមទណ្ឌកម្មលើក្រុងព្យុងយ៉ាង ក្រោយមានការបាញ់មីស៊ីលអន្តរទ្វីប ខែកក្កដាមុននេះ។ ប៉ុន្តែ កន្លងមក អាមេរិកបានដាក់ ទណ្ឌកម្មទៅលើអ្នកវិនិយោគចិននិងរុស្ស៊ីដែលរងការចោទប្រកាន់ថា បានធ្វើពាណិជ្ជកម្មជាមួយកូរ៉េខាងជើង។ ម្សិលមិញនេះ ចិននិងរុស្ស៊ីបានបរិហារពីការសម្រេចដាក់ទណ្ឌកម្មបែបឯកតោភាគីរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ