ចិនថា អ.ស.ប គួរតែពិភាក្សាលើការដកទណ្ឌកម្មចេញពីកូរ៉េខាងជើង
នៅថ្ងៃសុក្រ ទី១ មីនា ប្រទេសចិនបានអំពាវនាវឲ្យ អ.ស.ប លើកយកប្រធានបទស្តីអំពី ការដកទណ្ឌកម្មពីកូរ៉េខាងជើង ទៅពិភាក្សាក្នុងកិច្ចប្រជុំក្រុមប្រឹក្សាសន្តិសុខរបស់ អ.ស.ប។ ការស្នើរបស់ចិននេះ ធ្វើឡើងបន្ទាប់ពីលោកដូណាល់ ត្រាំ និងលោកគីម ជុងអ៊ុនបញ្ចប់ជំនួបលើកទី២នៅឯប្រទេសវៀតណាម ដោយគ្មានសម្រេចបានកិច្ចព្រមព្រៀងអ្វីទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
“ទាំងសហរដ្ឋអាមេរិក និងកូរ៉េខាងជើងដឹងហើយថា ការដកទណ្ឌកម្ម គឺជាគន្លឹះតែមួយគត់ ដែលអាចឲ្យគេសម្រេចបាននូវកិច្ចព្រមព្រៀងរំសាយអាវុធនុយក្លេអ៊ែររបស់ទីក្រុងព្យុងយ៉ាង”។ នេះ គឺជាការលើកឡើងរបស់លោកលូ កាង (Lu kang) អ្នកនាំពាក្យក្រសួងការបរទេសចិន ដោយបន្ថែមទៀតថា ដោយសារបញ្ហាទណ្ឌកម្ម គឺជាចំណុចខ្ទាស់ខ្លាំង ដូច្នោះហើយ អ.ស.ប គួរចាប់ផ្តើមលើកយករឿងនេះ ទៅពិភាក្សាហើយនាកាលៈទេសៈនេះ។
ទាក់ទងនឹងសំណើសុំរបស់ចិននេះដែរ រហូតមកដល់ពេលនេះ អ.ស.ប នៅមិនទាន់បានបញ្ចេញជាប្រតិកម្មអ្វីនៅឡើយនោះទេ។ ក្រៅតែពីការស្នើសុំនេះ មន្ត្រីចិន ក៏បានទាក់ទងទៅមន្ត្រីអាមេរិក ដើម្បីពិភាក្សាអំពីបញ្ហាអាវុធនុយក្លេអ៊ែររបស់កូរ៉េខាងជើងដែរ។
ជាក់ស្តែង មន្ត្រីការទូតជាន់ខ្ពស់របស់ចិនម្នាក់ បាននិយាយតាមទូរស័ព្ទជាមួយប្រមុខការបរទេសអាមេរិកលោក Mike Pompeo ដោយស្នើឲ្យអាមេរិក រួមដោះស្រាយបញ្ហាជាមួយកូរ៉េខាងជើង ប្រកបដោយភាពអត់ធ្មត់ និងបន្តកិច្ចចរចាដោយសន្តិភាពនឹងគ្នា។
ឆ្លើយតបនឹងការលើកឡើងរបស់មន្ត្រីចិន លោក Pompeo បាននិយាយថា សហរដ្ឋអាមេរិក នឹងរក្សាទំនាក់ទំនងជាមួយកូរ៉េខាងជើង ហើយថាអាមេរិក រីករាយចំពោះវត្តមានដ៏សំខាន់របស់ចិន ក្នុងការចូលរួមដោះស្រាយបញ្ហានៅឧបទ្វីបកូរ៉េ។ នេះបើតាមសម្តីរបស់មន្ត្រីចិន និយាយនៅក្នុងសេចក្តីថ្លែងការណ៍មួយ។
គួរជ្រាបថា ចិនគឺជាប្រទេសដែលមានតួនាទីសំខាន់ខ្លាំងបំផុតមួយ ពាក់ព័ន្ធនឹងជំនួបរវាងអាមេរិក និងកូរ៉េខាងជើង។ ទីក្រុងប៉េកាំង មិនត្រឹមតែជាដៃគូពាណិជ្ជកម្មដ៏សំខាន់ ក៏ប៉ុន្តែប៉េកាំងក៏ជាសម្ព័ន្ធមិត្ត និងជាខ្នងបង្អែកដ៏រឹងមាំរបស់ទីក្រុងព្យុងយ៉ាងផងដែរ។ ដោយឡែកកាលពីគ្រាកន្លងទៅ ប្រទេសចិនបានគាំទ្រចំពោះការដាក់ទណ្ឌកម្មរបស់ អ.ស.ប ទៅលើប្រទេសកូរ៉េខាងជើង ដោយសារការសាកល្បងអាវុធនុយក្លេអ៊ែរ និងមីស៊ីល ឥតឈប់ឈររបស់លោកគីម ជុងអ៊ុន។
គួររំឭកជូនថា ជំនួបលោកទី២ រវាងលោកដូណាល់ ត្រាំ និងលោកគីម ជុងអ៊ុន បានបញ្ចប់ទៅយ៉ាងឆាប់រហ័សមុនកាលកំណត់ និងមិនបានចុះកិច្ចព្រមព្រៀងជាមួយគ្នាអ្វីទាំងអស់ កាលពីថ្ងៃទី ២៨ កុម្ភៈ ឆ្នាំ២០១៩ កន្លងទៅ។ ភាគីទាំងពីរ នៅតែមិនត្រូវរ៉ូវគ្នា ដោយសាររឿងដកទណ្ឌកម្មពីកូរ៉េខាងជើង ដែលស្នើសុំដោយទីក្រុងព្យុងយ៉ាង មុនពេលធ្វើការរំសាយអាវុធនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ