តំបន់ស៊ីនជាំងរបស់ចិនញាំញីជាថ្មីដោយអំពើភេរវកម្ម
ចុះផ្សាយនៅថ្ងៃ៖
ស្តាប់ - ០៥:៥២
ស៊ីនជាំង តំបន់ភាគខាងលិចបំផុតប្រទេសចិន ដែលមានបណ្តាជនភាគច្រើនកាន់សាសនាអ៊ីស្លាម បានរងគ្រោះបន្ទុះគ្រាប់បែកមួយខ្សែ នៅថ្ងៃអាទិត្យទី ២១កញ្ញា ២០១៤។ មានស្លាប់យ៉ាងហោចណាស់ពីរនាក់ និងរបួសជាច្រើននាក់ផ្សេងទៀត។ ការវាយប្រហារនេះ កើតឡើងតែមួយថ្ងៃមុនការប្រកាសសាលក្រម លើសំណុំរឿងក្តីកាត់ទោសបញ្ញាវន្តជាតិអ៊ុយហ្គួរ ពីបទបះបោរចង់ផ្តាច់ទឹកដី។
ការផ្ទុះ បានកើតឡើងជាបន្តបន្ទាប់ នៅបីកន្លែងខុសៗគ្នា ក្នុងនោះមួយកន្លែងក្នុងមជ្ឈមណ្ឌលពាណិជ្ជកម្ម នៅភាគខាងត្បូងតំបន់ស៊ីនជាំង តែជាសំណាងល្អ មិនបង្កឱ្យមានមនុស្សស្លាប់ច្រើន។
ថ្វីបើក្នុងពេលភ្លាមៗដូច្នេះ គេពុំទាន់ឃើញមានប្រតិកម្មអ្វីជាដុំកំភួនពីសំណាក់រដ្ឋាភិបាលក្រុងប៉េកាំងមែន ប៉ុន្តែបំផ្ទុះគ្រាប់កណ្តាលក្រុង ពីរបីកន្លែងក្នុងថ្ងៃតែមួយ មិនមែនជាករណីផ្ទុះធម្មតាឡើយ។ ម្យ៉ាង ហេតុការណ៍នេះកើតឡើងនៅ ក្នុងបរិបទដ៏តានតឹង ព្រោះជិតដល់ថ្ងៃដែលតុលាការក្រុងអ៊ូរ៉ុមឈី ត្រូវប្រកាសសាលក្រមក្នុងសំណុំរឿងក្តីសាស្ត្រាចារ្យជនជាតិអ៊ុយហ្គួរ Ilham Tohti ពីបទប៉ុនប៉ងផ្តាច់ទឹកដី។
អ៊ីឡាំ តោះទី អ្នកអ៊ីស្លាមមិនជ្រុលនិយម ដែលចង់ឃើញប៉េកាំង និងស៊ីនជាំងសម្របសម្រួលគ្នាតាមដំណោះស្រាយសន្តិវិធី មិនហិង្សាមិនប្រើការបង្ក្រាប ទើបបានចូលឆ្លើយបំភ្លឺនៅក្នុងសវនការ កាលពី សប្តាហ៍មុន ហើយទំនងជានឹងអាចរងទោសធ្ងន់ ជាប់ពន្ធនាគារយូរផង។ កាលពីថ្ងៃដែលប៉ូលិសចិនចាប់ខ្លួនលោក អ៊ីឡាំង តោះទី យកឃុំឃាំង ថ្ងៃនោះក៏មានផ្ទុះអំពើភេរវកម្មចាក់នឹងកាំបិត សម្លាប់មនុស្ស អស់ប្រមាណ១០០នាក់ មានទាំងភេរវជននិងពលរដ្ឋស៊ីវិលផង។ ហើយកាន់តែចៃដន្យនេះ បំផ្ទុះគ្រាប់នេះធ្លាក់មកជួនចំពេលដែលមានការកាត់ទោសអាជ្ញាធរតំបន់ និងប៉ូលិស ១៧នាក់ ពីបទមានពាក់ព័ន្ធភេរវកម្មនៅមុខប៉ុស្តិ៍ប៉ូលិស ថ្ងៃទី ២៨កក្កដា២០១៤។
យុទ្ធនាការប្រឆាំងភេរវកម្ម
ការប្រយុទ្ធប្រឆាំងនឹងភេរវនិយមបានក្លាយជាអាទិភាពមួយរបស់រដ្ឋអំណាចក្រុងប៉េកាំង។ ហើយក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខ ចិនបានបង្ហាញដោយចំហ នៅអង្គការសហប្រជាជាតិកាលពីថ្ងៃសុក្រកន្លងទៅនាឱកាសអំពាវនាវឱ្យសហគមន៍អន្តរជាតិគាំទ្រអ៊ីរ៉ាក់ប្រឆាំងនឹងពួកជីហាតអ៊ីស្លាម ថាត្រូវប្រឆាំងដាច់ខាតសកម្មភាពភេរវនិយម មិនថានៅទីណា ឬទីណា ពេលណា ឬជនដៃដល់ជាតិណាទេ។ ពាក្យសំដីទាំងអស់នេះមិនន័យគ្រប់គ្រាន់សម្រាប់ការអនុវត្តយុទ្ធនាការប្រឆាំងនឹងភេរវនិយមក្នុងប្រទេសដែរ។
ការមិនចុះសម្រុងនឹងគ្នារវាងជនជាតិអ៊ុយហ្គួរ កាន់សាសនាអ៊ីស្លាម មានភាសាកំណើតតួកគី ជាជនជាតិដើមនៃតំបន់ស៊ីនជាំង និងជនជាតិចិនហាន អ្នកថ្មី កាន់តែរីកធំធាត់ជាលំដាប់ព្រោះតែពួកអ៊ុយហ្គួ យល់ថាមិនបានទទួលប្រយោជន៍ស្មើគ្នាពីការអភិវឌ្ឍន៍និងកំណើនសេដ្ឋកិច្ចដ៏មានបានរបស់តំបន់។ វិសមភាពដែលបានរុញច្រានឱ្យពួកអ៊ុយហ្គួ ប៉ុន្មានឆ្នាំចុងក្រោយនេះ ប្រែខ្លួនជាអ្នកជ្រុលនិយមខ្លាំងឡើងៗ និងច្រានចោលរបៀបគ្រប់គ្រងតឹងរ៉ឹងរបស់អំណាចកណ្តាលក្រុងប៉េកាំង។ ឯក្រុងប៉េកាំង ឱ្យតែមានអំពើហិង្សាផ្ទុះឡើង តែងទម្លាក់កំហុសនិងចោទជាស្វ័យប្រវត្តិទៅលើពួកអ៊ុយហ្គួរ ថាមានសកម្មភាពភេរវនិយម ឬសកម្មភាពបះបោរចង់ផ្តាច់ទឹកដី។
ក្រោមលេសនេះ និងក្រោយពីបានរង ភេរវកម្មធំមិនធ្លាប់មាន កាលពីខែឧសភា ក្នុងទីផ្សារកណ្តាលក្រុងអ៊ូរ៉ុមឈី អាជ្ញាធរប៉េកាំងបានបើកយុទ្ធនាការទ្រង់ទ្រាយធំប្រយុទ្ធប្រឆាំងនឹងភេរវនិយម ដោយឈរលើទស្សនៈ គាស់ស្មៅឱ្យគាល់ទាំងឬស។ អាជ្ញាធរជាន់ខ្ពស់ផ្នែកតុលាការ និងប៉ូលិស បានផ្សព្វផ្សាយនៅចុងសប្តាហ៍នេះ ទិសដៅថ្មីនៃផែនការប្រយុទ្ធប្រឆាំងភេរវកម្ម ដោយដៅកម្ចាត់រាល់សកម្មភាពដែលនាំដល់ភាពជ្រុលនិយមផ្នែកសាសនា។
ប៉ុន្តែផែនការដែលពេលខ្លះមានទាំងការបង្ក្រាប ការប្រហារជីវិតជាផ្លូវការ ការចាប់ខ្លួន ការកាត់ទោសជាក្រុមៗ ដោយប្រើតុលាការ ក្រោមផ្លាកភេរវនិយម អាចនឹងមានគ្រោះនាំអំពើហិង្សា និងភាពតានតឹងឱ្យកាន់តែមានខ្លាំង។ បើតាមអ្នកការពារសិទ្ធិមនុស្សអ៊ុយហ្គួ នៅអាល្លឺម៉ង់ ការបង្ក្រាបបានក្លាយជាម៉ូទ័រជំរុញឱ្យបណ្តាជនអ៊ុយហ្គួកាន់តែចង់សងសឹក កាន់តែចង់ចូលក្នុងគន្លងជ្រុលនិយម និងបកទៅប្រើវិធីវាយប្រហារភេរវកម្ម តាមដានរបស់ក្រុមភេរវនិយមអន្តរជាតិផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ