អាមេរិកថាយន្តហោះចម្បាំងចិនហោះស្ទាក់យន្តហោះឈ្លបយកការណ៍អាមេរិកក្នុងដែនអាកាសអន្តរជាតិ
យន្តហោះចម្បាំងចិនពីរគ្រឿងបានហោះស្ទាក់យន្តហោះឈ្លបយកការណ៍ដែនសមុទ្ររបស់អាមេរិក នៅក្នុងដែនអាកាសអន្តរជាតិ។ នេះបើតាមការអះអាងរបស់ក្រសួងការពារជាតិអាមេរិកអាមេរិក កាលពីថ្ងៃពុធម្សិលមិញ ដោយបានបញ្ជាក់ថា សកម្មភាពហោះស្ទាក់នេះធ្វើឡើងប្រកបដោយគ្រោះថ្នាក់។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមសេចក្តីថ្លែងការណ៍របស់ក្រសួងការពារជាតិអាមេរិក ហេតុការណ៍បានកើតមានឡើង នៅថ្ងៃអង្គារ ទី១៧ឧសភាកន្លងទៅ នៅក្នុងដែនអាកាស ពីលើសមុទ្រចិនខាងត្បូង។ យន្តហោះរបស់អាមេរិក គឺជាប្រភេទយន្តហោះឈ្លបយកការណ៍ដែនសមុទ្ររបស់កងទ័ពជើងទឹក។
មន្រ្តីអ្នកនាំពាក្យក្រសួងការពារជាតិអាមេរិកបានលើកឡើងថា ការហោះស្ទាក់យន្តហោះឈ្លបយកការណ៍នេះបានធ្វើឡើង ដោយមិនត្រឹមត្រូវទៅតាមគោលការណ៍សុវត្ថិភាព ក៏ប៉ុន្តែ មិនបានបញ្ជាក់លម្អិត អំពីសកម្មភាពនេះធ្វើឡើង ក្នុងរូបភាពបែបណានោះទេ ដោយគ្រាន់តែបានលើកឡើងថា អាមេរិកកំពុងតែទាក់ទងទៅចិន ទាំងតាមផ្លូវទូត និងតាមមន្រ្តីយោធា ដើម្បីដោះស្រាយបញ្ហានេះ។
ពីខាងចិនវិញ ពីដំបូង ក្រសួងការពារជាតិចិនបានឆ្លើយតបនៅក្នុងសេចក្តីថ្លែងការណ៍នៅថ្ងៃព្រហស្បតិ៍នេះថា ចិនបានទទួលរបាយការណ៍ស្តីពីហេតុការណ៍ដែលអាមេរិកលើកឡើង ហើយថា ហេតុការណ៍នេះបានកើតឡើងប្រហែលជាដោយសារតែអាមេរិកបញ្ជូនយន្តហោះឈ្លបយកការណ៍ចូលមកជិតចិនខ្លាំងពេក។
ក៏ប៉ុន្តែ ក្រោយមក ក្រសួងការបរទេសចិនបានធ្វើការបដិសេធការចោទប្រកាន់របស់អាមេរិក ដោយបានលើកឡើងថា អ្វីដែលអាមេរិកបានអះអាងមិនត្រឹមត្រូវទាំងស្រុងនោះទេ។ លោកហុង ឡី មន្រ្តីអ្នកនាំពាក្យក្រសួងការបរទេសចិនបានប្រាប់អ្នកសារព័ត៌មានថា យន្តហោះឈ្លបយកការណ៍របស់អាមេរិក បានហោះមកក្បែរកោះហៃណានរបស់ចិន ហើយយន្តហោះចម្បាំងពីគ្រឿងរបស់ចិនហោះតាមឃ្លាំមើលសកម្មភាព ដោយរក្សាចម្ងាយសុវត្ថិភាព និងដោយមិនបានធ្វើសកម្មភាព ដែលអាចបង្កជាគ្រោះថ្នាក់ណាមួយនោះទេ។
គួរបញ្ជាក់ថា នៅក្នុងពេលដែលភាពតានតឹងនៅក្នុងជម្លោះសមុទ្រចិនខាងត្បូង រវាងចិន និងប្រទេសក្នុងតំបន់អាស៊ាន កំពុងតែកើនឡើងខ្លាំង ភាពតានតឹង រវាងចិន និងអាមេរិក ក៏កំពុងតែកើតមានខ្លាំងដែរ ជាពិសេស ចាប់តាំងពីពេលចិនធ្វើការសាងសង់កោះសិប្បនិមិត្ត និងហេដ្ឋារចនាសម្ព័ន្ធ ក្នុងតំបន់ជាប់ជម្លោះ ចំណែកឯអាមេរិកបញ្ជូនយន្តហោះចម្បាំង និងនាវាចម្បាំង ឲ្យចូលទៅល្បាតនៅក្បែរកោះទាំងអស់ជាច្រើនលើកច្រើនសា។
របាយការណ៍ស្តីពីការហោះស្ទាក់យន្តហោះយោធា រវាងចិន និងអាមេរិកនេះ ធ្វើឲ្យគេនឹកឃើញទៅដល់ហេតុការណ៍ កាលពីឆ្នាំ២០០១កន្លងទៅ ដែលនៅពេលនោះ យន្តហោះ
ឈ្លបយកការណ៍របស់អាមេរិក និងយន្តហោះចម្បាំងរបស់ចិន បានប៉ះទង្គិចគ្នានៅលើអាកាស បណ្តាលឲ្យអ្នកបើកបរយន្តហោះចម្បាំងរបស់ចិនត្រូវស្លាប់ ចំណែកឯយន្តហោះឈ្លបយកការណ៍របស់អាមេរិក ត្រូវបានចិនបង្ខំឲ្យចុះចតនៅកោះហៃណាន។ ហេតុការណ៍នេះបានបង្កឲ្យមានការប្រឈមមុខដាក់គ្នាយ៉ាងតានតឹងអស់រយៈពេលជាច្រើនខែ ទាំងខាងផ្លូវទូត និងយោធា នៅក្នុងអំឡុងពេលដែលអាកាសយានិកចំនួន ២៤នាក់ ត្រូវជាប់ឃុំ និងសួរចម្លើយនៅចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ