ជប៉ុន នឹងមាននាវាផ្ទុកយន្តហោះដំបូង
ប្រទេសជប៉ុននឹងមាននាវាផ្ទុកយន្តហោះដំបូង ក្នុងពេលឆាប់ៗ។ នៅមួយរយៈចុងក្រោយនេះ រដ្ឋាភិបាលជប៉ុន ក្រោមការដឹកនាំរបស់លោកនាយករដ្ឋមន្ត្រី ស្ហីនហ្សូ អាបេ បានខិតខំយ៉ាងខ្លាំង ក្នុងការបង្កើនសមត្ថភាពយោធារបស់ប្រទេស តាមរយៈការអភិវឌ្ឍន៍សម្ភារៈយោធា និងការទិញគ្រឿងសញ្វវុធទំនើបៗពីសហរដ្ឋអាមេរិក។ ទិន្នាការរបស់លោកអាបេ បែបនេះ ត្រូវបានគេដឹងថាធ្វើឡើងគឺដើម្បីរាំងខ្ទប់ឥទ្ធិពលប្រទេសជិតខាងដែលជាគូសត្រូវគឺប្រទេសចិន ដែលបាននិងកំពុងពង្រីកឥទ្ធិពលយោធា គួរឲ្យកត់សម្គាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ប្រទេសជប៉ុន នឹងមាននាវាផ្ទុកយន្តហោះដ៏ទំនើបដំបូងក្នុងដៃក្នុងពេលឆាប់ៗនេះ បើគិតចាប់តាំងពីសម័យសង្គ្រាមលោកលើកទី២បញ្ចប់ នាឆ្នាំ១៩៤៥មក។ ក្រៅពីនេះ ជប៉ុនក៏បានបញ្ជាទិញផងដែរនូវយន្ដហោះចម្បាំងរាប់សិបគ្រឿង ដោយជប៉ុនអះអាងថា វាគឺស្ថិតក្រោមផែនការការពារជាតិថ្មីមួយតែប៉ុណ្ណោះ។
សូមជ្រាបថា ផែនការការពារជាតិថ្មីមានរយៈពេល៥ឆ្នាំរបស់ជប៉ុននេះ ចំណាយថវិកាប្រមាណជា ២៤៤ ពាន់លានដុល្លារសហរដ្ឋអាមេរិក នឹងត្រូវប្រើប្រាស់រហូតដល់ឆ្នាំ២០២៤។ ផែនការថ្មីនេះ ក៏តម្រូវឱ្យមានការអភិវឌ្ឍន៍នូវនាវាផ្ទុកឧទ្ធម្ភាគចក្រចំនួនពីរដែលមានស្រាប់ដើម្បីក្លាយទៅជានាវាដែលអាចផ្ទុកយន្តហោះបាន។
ខណៈពេលដែលរដ្ឋាភិបាលជប៉ុន កំពុងអភិវឌ្ឍវិស័យយោធាការពាររបស់ខ្លួន ឲ្យកាន់តែខ្លាំង ភាពចម្រូងចម្រាសក៏ចាប់ផ្តើមកើតមានផងដែរ។ មានមតិខ្លះអះអាងថា ការខិតខំបង្កើនសមត្ថភាពយោធាខ្លាំងរបស់រដ្ឋការលោកអាបេ គឺប្រាសចាកពីរដ្ឋធម្មនុញ្ញសន្តិភាពនិយមរបស់ជប៉ុនក្រោយចាញ់សង្គ្រាមលោកលើកទី២ ដែលកំណត់ឲ្យជប៉ុនអាចបង្កើតបានតែយោធាដើម្បីការពារខ្លួនតែប៉ុណ្ណោះ។
ឆ្លើយតបនឹងការរិះគន់ដែលកំពុងកើតមាន នាយករដ្ឋមន្ត្រីជប៉ុនដែលមាននិន្នាការជាតិនិយមគឺលោកអាបេ បានអះអាងថា កិច្ចខិតខំប្រឹងប្រែងរបស់រដ្ឋាភិបាលក្នុងការពង្រឹងវិស័យយោធានៅប៉ុន្មានឆ្នាំថ្មីៗនេះ គឺដើម្បីទប់ទល់នឹងការគំរាមកំហែងនានានៅក្នុងតំបន់ ដែលក្នុងនោះមានជាអាទិ៍ ប្រទេសកូរ៉េខាងជើង និងប្រទេសគូសត្រូវដូចជាចិន ដែលកំពុងពង្រីកដែនអំណាចយោធាខ្លាំងឡើងៗគួរឲ្យបារម្ភ។
គួរជម្រាបជូនថា ផែនការការពារជាតិថ្មីរបស់ជប៉ុនដែលទើបអនុម័តនាថ្ងៃនេះ ក៏ត្រូវគេជឿថាធ្វើឡើង ដោយសារមានសម្ពាធពីប្រធានាធិបតីអាមេរិកលោកដូណាល់ ត្រាំ ដែលបានត្អូញត្អែរជាច្រើនលើកច្រើនសារ អំពីបញ្ហាឱនភាពពាណិជ្ជកម្មរវាងទីក្រុងវ៉ាស៊ីនតោន ជាមួយទីក្រុងតូក្យូ។ លោកត្រាំ បានជំរុញឱ្យលោកអាបេ ទិញសព្វាវុធយោធារបស់អាមេរិក និងបង្កើនសមត្ថភាពការពារប្រទេសរបស់ជប៉ុនទៀតផង ដើម្បីទប់ទល់នឹងចិនដែលបាននិងកំពុងពង្រីកដែនអំណាចរបស់ខ្លួនកាន់តែធំឡើងៗ ទាំងនៅក្នុងតំបន់ និងក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ