ជប៉ុនរងគ្រោះរញ្ជួយដីជាលើកទី២សម្លាប់មនុស្ស២៣នាក់
បន្ទាប់ពីរញ្ជួយដីដ៏ធំមួយ កាលពីថ្ងៃព្រហស្បតិ៍ ជប៉ុនត្រូវរងគ្រោះរញ្ជួយដីដ៏ធំមួយទៀត នៅថ្ងៃសៅរ៍នេះ ដោយបណ្តាលឲ្យបាត់បង់ជីវិតមនុស្សយ៉ាងតិច ២៣នាក់។ នេះគឺជាគ្រោះរញ្ជួយដ៏លើកទី២ ក្នុងរយៈពេលតែ២ថ្ងៃ ក្រោយពីរញ្ជួយដីកាលពីថ្ងៃព្រហស្បតិ៍ ដែលកាលណោះបានសម្លាប់មនុស្សចំនួន ៩នាក់។ កងកម្លាំងប្រដាប់អាវុធប្រមាណជា ២ម៉ឺននាក់ត្រូវបានរដ្ឋាភិបាលជប៉ុនដាក់ពង្រាយទៅកាន់កន្លែងកើតហេតុ ដើម្បីជួយដល់ប្រតិបត្តិការសង្រ្គោះ។
ចុះផ្សាយនៅថ្ងៃ៖
ស្តាប់ - ០១:៤២
ការរញ្ជួយដីនៅថ្ងៃសៅរ៍ និងការរញ្ជួយដីកាលពីថ្ងៃព្រហស្បតិ៍ កើតឡើងនៅក្នុងតំបន់តែមួយ គឺនៅប៉ែកខាងត្បូងឆៀងខាងលិចនៃប្រទេសជប៉ុន ចម្ងាយប្រមាណជា ៩០០គីឡូម៉ែត្រពីទីក្រុងតូក្យូ។
បើយោងតាមក្រសួងឧតុនិយមជប៉ុន ការរញ្ជួយដីទាំងពីរនេះមានទំនាក់ទំនងនឹងគ្នា ដោយវាកើតឡើងនៅតាមបណ្តោយខ្សែប្រសព្វនៃផ្លាកតិចតូនិកតែមួយ ហើយការរញ្ជួយដីនៅថ្ងៃសៅរ៍នេះមានកម្លាំងរហូតដល់ទៅ ៧,៣រ៉ិចទ័រ ពោលគឺខ្លាំងជាងការរញ្ជួយដីកាលពីថ្ងៃព្រហស្បតិ៍ ដែលមានកម្លាំងត្រឹមតែ ៦,៥រ៉ិចទ័រ។ ហេតុដូច្នេះហើយបានជាការរញ្ជួយដីនៅថ្ងៃសៅរ៍នេះ បានបង្កឲ្យមានការខូចខាតច្រើនជាង ហើយចំនួនអ្នកស្លាប់ក៏មានយ៉ាងច្រើនផងដែរ។
ការរញ្ជួយដីលើកទី២នេះ បានបណ្តាលឲ្យអគារជាច្រើនត្រូវរលំ ក្នុងនោះក៏មានមន្ទីរពេទ្យមួយផងដែរ ចំណែកឯស្ពាន ផ្លូវថ្នល់ និងផ្ទះសម្បែងរបស់ប្រជាជនត្រូវរងការខូចខាត ដោយសារការរលំបាក់ដីភ្នំបង្កឡើងដោយកម្លាំងរញ្ជួយ។
អ្វីដែលធ្វើឲ្យគេកាន់តែបារម្ភខ្លាំងទៅទៀតនោះ គឺការរញ្ជួយដីលើកទី២នេះ បានធ្វើឲ្យកម្រើកឡើងនូវភ្នំភ្លើងមួយ ដែលនៅលើកោះជាមួយគ្នា។ ម៉ាស៊ីនប្រតិករនុយក្លេអ៊ែរចំនួន ២គ្រឿង ដែលកំពុងដំណើរការផលិតអគ្គិសនី ក៏ស្ថិតនៅក្នុងតំបន់ក្បែរចំណុចរញ្ជួយផងដែរ ក៏ប៉ុន្តែ ក្រុមហ៊ុនដែលជាម្ចាស់មជ្ឈមណ្ឌលនុយក្លេអ៊ែរនេះបានអះអាងថា រហូតមកទល់នឹងពេលនេះ ម៉ាស៊ីនប្រតិករនុយក្លេអ៊ែរទាំងពីរនៅតែមានដំណើរការធម្មតា ដោយមិនឃើញមានភាពមិនប្រក្រតីណាមួយ ដែលគួរឲ្យបារម្ភនោះទេ។
គួរបញ្ជាក់ថា ជប៉ុន ដែលមានទីតាំងភូមិសាស្រ្តស្ថិតនៅត្រង់ចំណុចប្រសព្វនៃផ្លាកតិចតូនិកធំៗចំនួន ៤ គឺជាប្រទេសដែលទទួលរងនូវគ្រោះរញ្ជួយដីច្រើនជាងគេ។ គិតជាមធ្យម ក្នុងមួយឆ្នាំៗ ក្នុងចំណោមគ្រោះរញ្ជួយដីធំៗ ដែលកើតឡើងនៅលើភពផែនដី មានប្រមាណជា ២០% កើតឡើងនៅក្នុងប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ