អឺរ៉ុបចង់ចាត់វិធានការដោះស្រាយវិបត្តិអន្តោប្រវេសន៍ តាំងពីទឹកដីអាហ្វ្រិកទៅ
មេដឺកនាំអឺរ៉ុបនិងអាហ្វ្រិកចំនួន៧ប្រទេសមាន បារាំង អាល្លឺម៉ង់ អ៊ីតាលី អេស្ប៉ាញ នីហ្សេ ឆាដ និងលីប៊ី បានពិភាក្សាគ្នានៅទីក្រុងប៉ារីស ថ្ងៃចន្ទម្សិលមិញ ស្វែងរកដំណោះស្រាយបញ្ហាអន្តោប្រវេសន៍។ អឺរ៉ុបបានស្នើទៅអាហ្វ្រិកអោយកំណត់អត្តសញ្ញាណជនភៀសខ្លួនតាំងតែពីដំបូងទីនៅអាហ្វ្រិក។ មេដឺកនាំអាហ្វ្រិកវិញទាមទារអោយមានជំនួយហិរញ្ញវត្ថុបន្ថែមសម្រាប់អាហ្វ្រិក។
ចុះផ្សាយនៅថ្ងៃ៖ កែប្រែថ្ងៃទី៖
មេដឺកនាំអឺរ៉ុបនិងអាហ្វ្រិក៧ប្រទេស មានប្រធានាធិបតីឆាដ លោកដេប៊ី អ៊ីតណូ ប្រធានាធិបតីនីហ្សេ លោកម៉ាាហាម៉ាឌូ អ៊ីស៊ូហ្វ៊ូ នាយករដ្ឋមន្ត្រីបង្រួបបង្រួមជាតិលីប៊ី លោកអាល់ សារ៉ា លោកស្រីមែរគែល មេដឺកនាំអេស្ប៉ាញលោកហ្សង់ទីលីណូ និងលោកម៉ារីយ៉ាណូ រ៉ាហយ ហើយក៏មានទាំងតំណាងការទូតអឺរ៉ុប លោកស្រីម៉ុកហេរីនីផងដែរ បាននាំគ្នាពិភាក្សាដោះស្រាយបញ្ហាជនភៀសខ្លួន នៅទីក្រុងប៉ារីស។ ប្រទេសអឺរ៉ុបនិងអាហ្វ្រិកទាំងនេះ បានចេញសេចក្តីប្រកាសរួមមួយ បង្ហាញទិសដៅពង្រឹងការគាំទ្រដល់ប្រទេសដែលជនភៀសខ្លួនឆ្លងកាត់ នៅអាហ្វ្រិក និងពង្រឹងយុទ្ធនាការប្រឆាំងការជួញដូរជនអន្តោប្រវេសន៍។
អឺរ៉ុបបានស្នើអោយពិនិត្យអត្តសញ្ញាណជនភៀសខ្លួនតាំងតែពីក្នុងដែនដីអាហ្វ្រិកទៅ។ ការពិនិត្យអត្តសញ្ញាណតាំងតែពីក្នុងដែនដីអាហ្វ្រិក ពីដំបូងទីទៅនេះ ដើមឡើយជាគំនិតផ្តួចផ្តើមរបស់ប្រធានាធិបតី បារាំង លោកអេម៉ានុយអែល ម៉ាក្រុងតាំងតែពីខែកក្កដាមក ដែលគេហៅថា Hot spots។ Hot spotsជាផែនការបង្កើតអោយមានមជ្ឈមណ្ឌលកត់ត្រាអត្តសញ្ញាណជនអន្តោប្រវេសន៍ ដើម្បីបែងចែកអោយច្បាស់រវាងជនភៀសខ្លួននយោបាយ និងជនភៀសខ្លួនសេដ្ឋកិច្ច។ ដើមឡើយ លោកម៉ាក្រុង ចង់អោយHot spotsអនុវត្តធ្វើនៅលីប៊ី។ ប៉ុន្តែ អង្គការក្រៅរដ្ឋាភិបាលជាច្រើនបានជំទាស់ ព្រោះថា លីប៊ីគ្មានស្ថិរភាពសន្តិសុខ ពិបាកនឹងសម្រេចផែនការHot spotsមួយនេះ។
ឥឡូវនេះ បារាំងចង់អោយប្រទេសនីហ្សេ និងឆាដ អនុវត្តវិញ។ ប៉ុន្តែ ប្រទេសឆាដ និងនីហ្សេ ជំទាស់តាំងពីដំបូងទី កម្មវិធីHot spotsនេះ ព្រោះបារម្ភថា ជនភៀសខ្លួនអាចសម្រុកទៅសុំសិទ្ធិជ្រកកោនតាមព្រំដែនឆាដនិងលីប៊ី។ ពេលនេះ បារាំងបានប្តូរឈ្មោះផែនការនេះ ដោយប្រើពាក្យថា បេសកកម្មការពារវិញ។ ប៉ុន្តែ វាមិនខុសគ្នានឹងHot spotsទេ គឺត្រូវតែចុះអត្តសញ្ញាណជនភៀសខ្លួន ប៉ុន្តែ ក៏មានការត្រួតពិនិត្យពីអង្គការUNHCRដែរ ថាតើជនរូបណាមានសិទ្ធិសុំសិទ្ធិជ្រកកោន។
ប្រឈមនឹងលំហូជនភៀសខ្លួនមកអឺរ៉ុប អឺរ៉ុបរកវិធីកាត់ផ្តាច់ការភៀសខ្លួនខុសច្បាប់ តាមផ្លូវទឹកនៅសមុទ្រមេឌីទែររ៉ាណេ។ កិច្ចព្រមព្រៀងជាមួយតួកគីឆ្នាំ២០១៦ បានជួយកាត់បន្ថយជនភៀសខ្លួនមួយចំណែកដែរ។ ប៉ុន្តែ ជនអន្តោប្រវេសន៍ច្រើនទៀតបានឆ្លងមកអឺរ៉ុបតាមឆ្នេរម៉ារ៉ុក និងអេស្ប៉ាញវិញ។ គិតតាំងពីឆ្នាំ២០១៤ មក ជនភៀសខ្លួន១៤០០០នាក់បានស្លាប់ក្នុងគ្រោះថ្នាក់លិចទូក នៅសមុទ្រមេឌីទែររ៉ាណេ។
ក្នុងជំនួបម្សិលមិញ មេដឺកនាំអាហ្វ្រិកសុំអោយមានជំនួយហិរញ្ញវត្ថុបន្ថែមសម្រាប់ការអភិវឌ្ឈអាហ្វ្រិក ដើម្បីចូលរួមកាត់បន្ថយមិនអោយមានមនុស្សភៀសខ្លួនទៅក្រៅស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ