លោកដូណាល់ត្រាំចង់ឲ្យគ្រូបង្រៀនកាន់កាំភ្លើងដើម្បីទប់ស្កាត់ការបាញ់ប្រហារនៅសាលារៀន
ក្រោយពីមានហេតុការណ៍បាញ់ប្រហារជាបន្តបន្ទាប់នៅអាមេរិក ជាពិសេស ហេតុការណ៍បាញ់ប្រហារលើកចុងក្រោយ នៅសាលារៀន ក្នុងរដ្ឋ Florida សម្ពាធពីសំណាក់សាធារណជនអាមេរិកមានកាន់តែខ្លាំងឲ្យលោកដូណាល់ត្រាំដាក់ចេញនូវនយោបាយ ដើម្បីរឹតបន្តឹងសិទ្ធិកាន់កាប់អាវុធ។ ក៏ប៉ុន្តែ លោកប្រធានាធិបតីអាមេរិកលើកឡើងនូវដំណោះស្រាយផ្សេងមួយទៀត ដើម្បីឆ្លើយតបនឹងការបាញ់ប្រហារនៅសាលារៀន គឺលោកចង់បំពាក់អាវុធដល់គ្រូបង្រៀន។
ចុះផ្សាយនៅថ្ងៃ៖
“ប្រសិនបើគ្រូបង្រៀនមាន និងចេះប្រើកាំភ្លើងស្ទាត់ ពួកគេអាចនឹងទប់ស្កាត់ហេតុការណ៍បាញ់ប្រហារបានភ្លាមៗ” នេះគឺជាការលើកឡើងរបស់លោកដូណាល់ត្រាំ កាលពីថ្ងៃពុធម្សិលមិញ នៅក្នុងអំឡុងពេលដែលលោកទទួលជួបសិស្ស និងមាតាបិតាសិស្ស ដែលរងគ្រោះ ក្នុងហេតុការណ៍បាញ់ប្រហារនៅរដ្ឋ Florida បណ្តាលឲ្យមនុស្សស្លាប់ ១៧នាក់ កាលពីថ្ងៃទី១៤កុម្ភៈកន្លងទៅ។
សំណើនេះរបស់លោកដូណាល់ត្រាំ គឺស្របទៅនឹងអ្វីដែលសមាគមការពារសិទ្ធិកាន់កាំភ្លើងរបស់អាមេរិក (NRA) ធ្លាប់បានស្នើឡើង ហើយវាស្របទៅនឹងមនោគមវិជ្ជាទូទៅរបស់ក្រុមអ្នកនិយមកាំភ្លើងរបស់អាមេរិក ដែលតែងតែនាំគ្នាលើកឡើងថា ប្រជាពលរដ្ឋគ្រប់រូបត្រូវតែមានសិទ្ធិកាន់កាំភ្លើង ដើម្បីអាចការពារខ្លួនទល់នឹងកាំភ្លើងរបស់អ្នកដទៃ។
គ្រូបង្រៀនមួយចំនួនបានបញ្ចេញប្រតិកម្មតបទៅនឹងសំណើរបស់លោកដូណាល់ត្រាំនេះ ថា គ្រូបង្រៀនមានមុខងារបង្រៀនសិស្ស មិនមានមុខងារការពារសន្តិសុខនោះទេ ហើយបានទាំងចោទសំណួរបន្ថែមទៀតថា តើគ្រូបង្រៀន ក្រៅពីត្រូវរៀនមុខវិជ្ជា ដើម្បីបង្រៀនសិស្សហើយ ត្រូវទទួលការហ្វឹកហ្វឺនពីការប្រើកាំភ្លើងថែមទៀតឬក៏យ៉ាងណា ?
ទោះជាយ៉ាងណា លោកដូណាល់ត្រាំបានបញ្ជាក់ថា សំណើរបស់លោក មិនមែនឲ្យគ្រូបង្រៀនកាន់កាំភ្លើងគ្រប់ដៃនោះទេ គឺឲ្យតែគ្រូបង្រៀន ឬបុគ្គលិកសិក្សាណា ដែលចេះប្រើកាំភ្លើងស្ទាត់ជំនាញហើយតែប៉ុណ្ណោះ ហើយលោកបានធ្វើការប៉ាន់ស្មានថា គិតជាសរុបទៅ នឹងមានគ្រូបង្រៀន ឬបុគ្គលិកសិក្សាតែប្រមាណជា ២០%ប៉ុណ្ណោះ ក្នុងគ្រឹះស្ថានសិក្សានីមួយៗ ដែលត្រូវកាន់កាំភ្លើង។
គួរបញ្ជាក់ថា មកទល់នឹងពេលនេះ នៅតាមរដ្ឋខ្លះនៅសហរដ្ឋអាមេរិក មានច្បាប់អនុញ្ញាតរួចទៅហើយឲ្យគ្រូបង្រៀនមានសិទ្ធិកាន់កាំភ្លើងទៅក្នុងសាលារៀន។ ក៏ប៉ុន្តែ ច្បាប់បែបនេះគ្មានទេនៅរដ្ឋ Florida ទីដែលមានហេតុការណ៍បាញ់ប្រហារនៅសាលារៀន កាលពីសប្តាហ៍មុន ហើយអ្វីដែលជនរងគ្រោះក្នុងហេតុការណ៍បាញ់ប្រហារនេះកំពុងទាមទារចង់បាននៅពេលនេះ គឺមិនមែនឲ្យបង្កើតច្បាប់អនុញ្ញាតឲ្យគ្រូកាន់កាំភ្លើងទៅសាលារៀននោះទេ ផ្ទុយទៅវិញ ពួកគេចង់ឲ្យមានការបង្កើតច្បាប់ ដើម្បីគ្រប់គ្រងសិទ្ធិកាន់កាំភ្លើងឲ្យបានតឹងរ៉ឹងជាងពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ