កងទ័ពថៃរងការចោទប្រកាន់ពីបទធ្វើទារុណកម្មនៅខេត្តប៉ែកខាងត្បូងដែលមានជម្លោះផ្តាច់ទឹកដី
អង្គការសិទ្ធិមនុស្សបានចោទកងទ័ពថៃថាបានប្រព្រឹត្តទារុណកម្មជាលក្ខណៈប្រព័ន្ធ នៅតាមបណ្តាខេត្តប៉ែកខាងត្បូងប្រទេស ដែលកំពុងជាប់ជម្លោះជាមួយក្រុមឧទ្ទាមអ៊ីស្លាមផ្តាច់ទឹកដី។ សកម្មភាពធ្វើទារុណកម្មនេះត្រូវបានគេរកឃើញ នៅក្នុងការស៊ើបអង្កេត ដែលគេចងក្រងជារបាយការណ៍ ហើយដែលនឹងត្រូវចេញផ្សាយជាសាធារណៈនៅថ្ងៃពុធស្អែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ការស៊ើបអង្កេតរបស់អង្គការសិទ្ធិមនុស្ស នៅតំបន់ប៉ែកខាងត្បូងប្រទេសថៃ គឺជារឿងដ៏កម្រមួយ ចាប់តាំងពីតំបន់នេះត្រូវប្រឈមមុខនឹងចលនាបះបោរអ៊ីស្លាមទាមទារផ្តាច់ទឹកដី ហើយត្រូវបានរដ្ឋាភិបាលក្រុងបាងកក ប្រកាសដាក់ឲ្យស្ថិតក្រោមច្បាប់អាជ្ញាសឹក។
ការស៊ើបអង្កេតនេះបានបង្ហាញថា នៅក្រោមច្បាប់អាជ្ញាសឹក ជនសង្ស័យថាជាប់ពាក់ព័ន្ធនឹងក្រុមឧទ្ទាមផ្តាច់ទឹកដី អាចត្រូវចាប់ឃុំខ្លួនរយៈពេល ៦សប្តាហ៍ ដោយគ្មានការចោទប្រកាន់ ហើយជាទូទៅ នៅក្នុងអំឡុងពេលជាប់ឃុំនេះ ជនសង្ស័យត្រូវទទួលរងនូវការធ្វើទារុណកម្មទាំងខាងផ្លូវកាយ ទាំងខាងផ្លូវចិត្ត ហើយការធ្វើទារុណកម្មទាំងនេះ ភាគច្រើនកើតឡើង នៅក្នុងបន្ទាយកងទ័ព។។
អង្គការ Cross Cultureal Foundation ដែលចូលរួមស៊ើបអង្កេតនេះបានឲ្យដឹងនៅថ្ងៃអង្គារនេះថា គេបានរកឃើញករណីធ្វើទារុណកម្មនេះ ចំនួន ៥៤ករណី នៅក្នុងចន្លោះពីឆ្នាំ២០១៤ ដល់ឆ្នាំ២០១៥ ហើយថា នេះគ្រាន់តែជាផ្នែកតូចមួយដែលគេបានរកឃើញប៉ុណ្ណោះ ដោយគេសង្កេតឃើញថា ករណីរំលោភសិទ្ធិមនុស្សអស់ទាំងនេះបានកើនឡើងខ្លាំង ចាប់តាំងពីប្រទេសថៃត្រូវស្ថិតក្រោមការដឹកនាំដោយរបបសឹក នៅក្រោយរដ្ឋប្រហារឆ្នាំ២០១៤។
ក៏ប៉ុន្តែ មន្រ្តីអ្នកនាំពាក្យកងទ័ពថៃបានប្រាប់ទីភ្នាក់ងារព័ត៌មានបារាំងអាអែហ្វប៉េថា ការចោទប្រកាន់អំពីការធ្វើទារុណកម្មនេះមិនឆ្លុះបញ្ចាំងពីភាពពិតជាក់ស្តែងនោះទេ ហើយថា រាល់ការចាប់ខ្លួនជនសង្ស័យទាំងអស់តែងតែត្រូវធ្វើឡើងនៅចំពោះមុខសាក្សី ហើយនៅក្នុងពេលឃុំខ្លួន ជនសង្ស័យត្រូវបានអនុញ្ញាតឲ្យមានការសួរសុខទុក្ខពីក្រុមគ្រួសាររបស់គេ។
គួររំឭកឡើងវិញថា អស់រយៈពេលប្រមាណជា ១២ឆ្នាំមកហើយ ដែលចលនាបះបោររបស់ក្រុមឧទ្ទាមអ៊ីស្លាមបានកើតមានឡើង នៅតាមបណ្តាខេត្តប៉ែកខាងត្បូងប្រទេសថៃ ដែលជា ប្រជាជនភាគច្រើនជាអ្នកកាន់សាសនាអ៊ីស្លាម ហើយដែលមានព្រំដែនជាប់ជាមួយនឹងប្រទេសម៉ាឡេស៊ី។ គេបានប៉ាន់ស្មានថា ជម្លោះផ្តាច់ទឹកដីក្នុងរយៈពេល ១២ឆ្នាំនេះ បានបណ្តាលឲ្យមនុស្សយ៉ាងតិច ៦ពាន់៥រយនាក់ត្រូវបាត់បង់ជីវិត ក្នុងនោះភាគច្រើន គឺជាជនស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ