គ្រាប់បែកជាច្រើនគ្រាប់បានផ្ទុះនៅបាងកកក្នុងអំឡុងពេលកិច្ចប្រជុំកំពូលអាស៊ាន
គ្រាប់បែកតូចៗជាច្រើនគ្រាប់ បានផ្ទុះឡើងនៅទីតាំងផ្សេងៗគ្នាយ៉ាងតិចចំនួន ៣ កន្លែង ក្នុងទីក្រុងបាងកកប្រទេសថៃ នាថ្ងៃសុក្រ ទី២ សីហានេះ។ ហេតុការណ៍ផ្ទុះគ្រាប់បែកនេះ បានកើតឡើងជួនចាំពេលដែលប្រទេសថៃទទួលធ្វើជាម្ចាស់ផ្ទះ រៀបចំកិច្ចប្រជុំកំពូលប្រចាំតំបន់ និងចំថ្ងៃ ដែលរដ្ឋមន្រ្តីការបរទេសអាមេរិកលោក ម៉ៃក៏ ប៉ុមប៉េអូ ត្រូវចូលរួមក្នុងកិច្ចប្រជុំផងដែរ។ ហេតុការណ៍នេះ បានបណ្តាលឲ្យមនុស្សចំនួន ៤ នាក់រងរបួស ក៏ប៉ុន្តែវាមិនបានរំខានដល់កិច្ចប្រជុំកំពូលប្រចាំតំបន់អាស៊ានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ការបំផ្ទុះគ្រាប់បែក បានកើតឡើងតែបន្តិចប៉ុណ្ណោះ មុនពេលដែលលោកប្រមុខការបរទេសអាមេរិកម៉ៃក៏ ប៉ុមប៉េអូ ឡើងធ្វើសុន្ទរកថា។ ក្រោយហេតុការណ៍ផ្ទុះ រហូតមកទល់នឹងពេលនេះ គេនៅមិនទាន់ដឹងអំពីអត្តសញ្ញាណអ្នកដែលបានប្រព្រឹត្តអំពីនេះឡើយ ហើយអាជ្ញាធរថៃកំពុងតែស៊ើបអង្កេត ពីមូលហេតុនៅពីក្រោយការបំផ្ទុះគ្រាប់បែកនេះផងដែរ។ នេះបើយោងតាមសម្តីរបស់មន្ត្រីរដ្ឋាភិបាលថៃ។
បន្ថែមលើនេះ រដ្ឋាភិបាលថៃ ក៏បានអំពាវនាវផងដែរ ឱ្យប្រព័ន្ធផ្សព្វផ្សាយនានា ចៀសវាងធ្វើបុរេវិនិច្ឆ័យ លើហេតុផលនៃការបំផ្ទុះគ្រាប់បែកឲ្យសោះ មុនពេលដែលសមត្ថកិច្ចស្វែងរកការពិតឃើញ។
ទាក់ទងរឿងនេះដែរ នាយករដ្ឋមន្រ្តីថៃលោកប្រាយុទ្ធ ចាន់អូចា បានលើកឡើងថា ជនដែលនៅពីក្រោយហេតុការណ៍បំផ្ទុះគ្រាប់បែកនេះ ពិតជាមានបំណងអុជអាលញុះញង់ឱ្យមានអំពើហិង្សា ដើម្បីបំផ្លាញសន្តិភាព និងមុខមាត់ប្រទេសថៃ។ លោកប្រាយុទ្ធ យល់ឃើញដូចនេះ ពីព្រោះថា ការផ្ទុះ កើតឡើងខណៈពេលដែល អ្នកការទូតកំពូលៗនៃប្រជាជាតិអាស៊ីអាគ្នេយ៍ និងសហរដ្ឋអាមេរិក បូករួមទាំងប្រទេសចិនផងនោះ កំពុងមានវត្ថមាននៅក្នុងទីក្រុងបាងកក។
ជាមួយគ្នានេះ លោកប្រយុទ្ធ ចាន់អូចា ក៏បានអំពាវនាវផងដែរ ឲ្យប្រជាពលរដ្ឋថៃកុំឲ្យភ័យបារម្ភឲ្យសោះ ពីព្រោះថាអាជ្ញាធរថៃ បានបង្កើននូវការរឹតបន្តឹងសន្តិសុខ នៅទូទាំងទីក្រុងបាងកកហើយ។
ស្រដៀងគ្នានេះដែរ ការបំផ្ទុះគ្រាប់បែក ត្រូវគេជឿថា ធ្វើឡើងដើម្បីបំបាក់មុខរដ្ឋាភិបាលថាថៃក្នុងអំឡុងពេលកិច្ចប្រជុំកំពូលមែន ដោយសារម្យ៉ាង ប្រភេទគ្រាប់បែកតូចៗ ដែលគេឲ្យឈ្មោះថា គ្រាប់បែកប៉េងប៉ុង "ping pong bombs" មិនសមត្ថភាពផ្ទុះខ្លាំងត្រូវបានគេយកទៅបំផ្ទុះ។ ម្យ៉ាងវិញទៀត គ្រាប់បែកទាំងអស់ប្រមាណ៦ គ្រាប់ ត្រូវគេបំផ្ទុះ នៅឆ្ងាយពីតាំងប្រជុំទាំងអស់។
គួរជម្រាបជូនដែរថា ហេតុការណ៍ផ្ទុះគ្រាប់បែកក្នុងទីក្រុងបាងកកនាថ្ងៃសុក្រនេះ បានកើតឡើងតែប៉ុន្មានសប្តាហ៍ប៉ុណ្ណោះ បន្ទាប់ពីអតីតមេដឹកនាំយោធាលោកប្រាយុទ្ធ ចាន់អូចា ឡើងកាន់តំណែងជានាយករដ្ឋមន្រ្តីស៊ីវិលវិញ។
ព្រឹត្តិការណ៍នេះ បានញាំងឲ្យមានការស្រែកតវ៉ាយ៉ាងខ្លាំង ពីសំណាក់ក្រុមអ្នកគាំទ្រគាំទ្រលទ្ធិប្រជាធិបតេយ្យជាច្រើននាក់។ មិនតែប៉ុណ្ណោះ វាក៏បានធ្វើឲ្យមានការបែកបាក់ផ្ទៃក្នុងចំណោមអ្នកនយោបាយថៃក្នុងស្រុកមិនតិចនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ