ការបោះឆ្នោតសភាថៃនឹងប្រព្រឹត្តទៅនៅថ្ងៃទី២៤ខែមីនាឆ្នាំ២០១៩
ព្រះមហាក្សត្រថៃ ព្រះបាទ មហា វជ្ជរាឡុងកន បានឡាយព្រះហស្តលេខា នៅថ្ងៃពុធនេះ លើព្រះរាជក្រឹត្យ ដើម្បីកំណត់ជាផ្លូវការ ឲ្យមានការរៀបចំបោះឆ្នោតសភាជាលើកទីមួយ ចាប់តាំងពីរដ្ឋប្រហារឆ្នាំ២០១៤មក។ ក៏ប៉ុន្តែ ការបោះឆ្នោតនេះ នឹងមិនត្រូវប្រព្រឹត្តទៅ នៅថ្ងៃទី២៤កុម្ភៈ ដូចការគ្រោងទុកពីមុននោះទេ ដោយត្រូវលើកទៅធ្វើ នៅថ្ងៃទី២៤ខែមីនាវិញ។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមរដ្ឋធម្មនុញ្ញថ្មី ការបោះឆ្នោតសភាថៃត្រូវរៀបចំធ្វើក្នុងរយៈពេលយ៉ាងយូរបំផុត ១៥០ថ្ងៃ ចាប់ពីថ្ងៃរដ្ឋធម្មនុញ្ញចូលជាធរមាន ពោលគឺ យ៉ាងយូរបំផុតត្រឹមថ្ងៃទី៩ ខែឧសភា ឆ្នាំ២០១៩។
កាលពីពេលកន្លងមក របបសឹកថៃធ្លាប់បានប្រកាសសន្យាថានឹងរៀបចំការបោះឆ្នោតទៅតាមការកំណត់របស់រដ្ឋធម្មនុញ្ញ ហើយគ្រោងបោះឆ្នោត នៅថ្ងៃទី២៤ខែកុម្ភៈឆ្នាំ២០១៩។ ក៏ប៉ុន្តែ នេះគ្រាន់តែជាការសន្យាក្រៅផ្លូវការតែប៉ុណ្ណោះ។ ព្រះរាជក្រឹត្យ ដែលព្រះមហាក្សត្រទើបនឹងចុះហត្ថលេខា នៅថ្ងៃពុធនេះ ទើបជាការកំណត់ជាផ្លូវការឲ្យមានការបោះឆ្នោត ដោយឲ្យគណៈកម្មាធិការជាតិរៀបចំការបោះឆ្នោត ជាអ្នកទទួលបន្ទុកកំណត់កាលបរិច្ឆេទ និងជាអ្នកទទួលខុសត្រូវក្នុងការរៀបចំបោះឆ្នោតនេះ។
ប៉ុន្មានម៉ោង ក្រោយព្រះមហាក្សត្រចេញព្រះរាជក្រឹត្យ គណៈកម្មាធិការជាតិរៀបចំការបោះឆ្នោត បានប្រកាសឲ្យដឹងថា ការបោះឆ្នោតសភានឹងត្រូវប្រព្រឹត្តទៅ នៅថ្ងៃទី២៤ខែមីនាឆ្នាំ២០១៩ ពោលគឺ ១ខែក្រោយកាលបរិច្ឆេទ ដែលគេគ្រោងទុក កាលពីពេលកន្លងមក និងជាង១ខែមុនពិធីឡើងគ្រងរាជ្យជាផ្លូវការរបស់ព្រះបាទ មហា វជ្ជរាឡុងកន ដែលនឹងគ្រោងធ្វើ ពីថ្ងៃទី៤ ដល់ថ្ងៃទី៦ ខែឧសភា។
គួររំឭកឡើងវិញថា ថៃបានចាប់ផ្តើមធ្លាក់ចូលក្នុងវិបត្តិនយោបាយ កាលពីឆ្នាំ២០០៦ ក្រោយពីមានរដ្ឋប្រហារទម្លាក់លោកនាយករដ្ឋមន្ត្រី ថាក់ស៊ីន ស៊ីណាវ៉ាត់។ ចាប់តាំងពីពេលនោះមក ឆាកនយោបាយថៃត្រូវប្រឈមនឹងបញ្ហាជាប់ជាប្រចាំ ដោយលាយឡំរវាង ការបោះឆ្នោត បាតុកម្មអាវលឿង និងអាវក្រហម អំពើហិង្សា និងចុងក្រោយ រដ្ឋប្រហារសាជាថ្មី នៅឆ្នាំ២០១៤ ដើម្បីទម្លាក់លោកស្រីយីងឡាក់ចេញពីតំណែង។ ចាប់តាំងពីពេលនោះ ថៃត្រូវស្ថិតក្រោមការគ្រប់គ្រោងដោយរបបសឹក ដោយមានអតីតអគ្គមេបញ្ជាការកងទ័ព គឺលោកប្រាយុទ្ធ ចាន់អូចា ជានាយករដ្ឋមន្រ្តី។
នៅក្នុងរយៈពេលប៉ុន្មានខែចុងក្រោយនេះ គេសង្កេតឃើញមានគណបក្សនយោបាយជាច្រើន ក្នុងនោះរួមមានទាំងគណបក្សស្និទ្ធនឹងក្រុមរបស់លោកថាក់ស៊ីនផង និងគណបក្សដែលស្និទ្ធនឹងមេដឹកនាំយោធាផង បាននាំគ្នាធ្វើសកម្មភាព ដើម្បីឈានទៅចូលរួមប្រកួតប្រជែង នៅក្នុងការបោះឆ្នោតសភានាពេលខាងមុខ។ ក៏ប៉ុន្តែ ដំណើរការចុះឈ្មោះជាបេក្ខជនឈរឈ្មោះបោះឆ្នោតជាផ្លូវការ នៅមិនទាន់ត្រូវបានចាប់ផ្តើមធ្វើនៅឡើយនោះទេ។ ប្រធានគណៈកម្មាធិការរៀបចំការបោះឆ្នោតបានប្រកាសឲ្យដឹងថា ដំណើរការចុះឈ្មោះបេក្ខជននឹងត្រូវបើកធ្វើ ចាប់ពីថ្ងៃទី៤ ដល់ថ្ងៃទី៨ខែកុម្ភៈ ហើយឈ្មោះបេក្ខជននឹងត្រូវប្រកាសជាផ្លូវការ នៅថ្ងៃទី១៥កុម្ភៈខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ