ធ្លាក់យន្តហោះម៉ាឡេស៊ី៖គ្រួសារជនរងគ្រោះអាល្លឺម៉ង់ចង់ប្តឹងអ៊ុយក្រែនពីបទធ្វេសប្រហែល
ក្រុមគ្រួសាររបស់ជនរងគ្រោះអាល្លឺម៉ង់ដែលស្លាប់នៅក្នុងគ្រោះថ្នាក់ធ្លាក់យន្តហោះម៉ាឡេស៊ី MH ១៧ នៅភាគខាងកើតអ៊ុយក្រែនគ្រោងនឹងប្តឹងប្រទសអ៊ុយក្រែនទៅតុលាការសិទ្ធិមនុស្សរបស់អឺរ៉ុប ដែលមានទីតាំងនៅទីក្រុងស្រ្តាសប៊ួ ប្រទេសបារាំង។ តាមមេធាវីរបស់ក្រុមគ្រួសារអាល្លឺម៉ង់ទាំងនោះ អ៊ុយក្រែនត្រូវបានបន្ទោសដោយសារមិនបានបិទដែនអាកាសរបស់ខ្លួន និងបណ្តោយទុកឲ្យយន្តហោះស៊ីវិល ហោះនៅពីលើតំបន់ដែលកំពុងមានការប្រយុទ្ធគ្នាជាមួយពួកឧទ្ទាមអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
តាំងពីមានគ្រោះថ្នាក់ធ្លាក់យន្តហោះម៉ាឡេស៊ី ដែលសម្លាប់អ្នកដំណើរ និងបុគ្គលិកយន្តហោះទាំង២៩៨នាក់ នេះជាលើកទីមួយ ដែលគេលឺការបន្ទោសពីក្រុមគ្រួសារជនរងគ្រោះទៅលើរដ្ឋាភិបាលអ៊ុយក្រែន។
លទ្ធផលស៊ើបអង្កេតបឋមរបស់អ្នកជំនាញហូឡង់បានបង្ហាញថា យន្តហោះដឹកអ្នកដំណើរម៉ាឡេស៊ី MH ១៧ បានធ្លាក់នៅភាគខាងកើតអ៊ុយក្រែន ដោយសាររងវត្ថុបុកមកពីខាងក្រៅ ប៉ុន្តែ គេនៅមិនទាន់អះអាងថា វត្ថុនោះជាមីស៊ីល ឬអ្វីផ្សេងនោះទេ។ នៅក្រោយថ្ងៃធ្លាក់យន្តហោះម៉ាឡេស៊ី អាជ្ញាធរអ៊ុយក្រែន និងពួកឧទ្ទាម បំបែកទឹកដីបានទម្លាក់កំហុសគ្នាទៅវិញ ទៅមក ថា ជាអ្នកបាញ់គ្រាប់មីស៊ីលបំផ្លាញយន្តហោះអាកាសចរណ៍ម៉ាឡេស៊ី។
សម្រាប់ក្រុមគ្រួសាររបស់អ្នកដំណើរអាល្លឺម៉ង់ ទាំងបួននាក់ ដែលស្លាប់នៅក្នុងគ្រោះថា្នក់ធ្លាក់យន្តហោះ ប្រទេសនីមួយៗទទួលខុសត្រូវលើសន្តិសុខក្នុងដែនអាកាសរបស់ខ្លួន។ នេះ បើតាម សេចក្តីប្រកាសព័ត៌មានរបស់មេធាវីតំណាងឲ្យក្រុមគ្រួសាររបស់អ្នកធ្វើដំណើរអាល្លឺម៉ង់។ មេធាវីដដែលបានអះអាង ថា ដោយបណ្តោយទុកឲ្យយន្តហោះស៊ីវិលបើកចូលក្នុងដែនអាកាសរបស់ខ្លួន ប្រទេសម្ចាស់ផ្ទះត្រូវទទួលខុសត្រូវធានាសន្តិសុខឲ្យយន្តហោះទាំងនោះ។ បើសិនជាសន្តិសុខនៅក្នុងដែនអាកាសមិនសូវធានា នោះ គេគួរបិទវាតែម្តង។
ព្រឹត្តិការណ៍យន្តហោះម៉ាឡេស៊ីត្រូវគេបាញ់ធ្លាក់នៅភាគខាងកើតអ៊ុយក្រែន បានបង្កឲ្យមានការចោទសួរយ៉ាងច្រើនទៅលើការទទួលខុសត្រូវរបស់ក្រុមហ៊ុនហោះហើរម៉ាឡេស៊ី និងរដ្ឋាភិបាលអ៊ុយក្រែន។ នៅពេលជម្លោះប្រដាប់អាវុធជាមួយក្រុមឧទ្ទាមនៅភាគខាងកើត អាជ្ញាធរអ៊ុយក្រែនបានណែនាំកុំឲ្យយន្តហោះអាកាសចរណ៍ហោះហើរនៅក្រោមកំពស់៨០០០ម៉ែត្រ។ ប៉ុន្តែ សម្រាប់អ្នកជំនាញ វិធានការរក្សាសន្តិសុខដែនអាកាសរបស់អាជ្ញាធរអ៊ុយក្រែនមិន គ្រប់គ្រាន់ ព្រោះយន្តហោះម៉ាឡេស៊ីដែលធ្លាក់នៅថ្ងៃទី ១៧កក្កដា ត្រូវរងការវាយប្រហារ នៅក្នុងរយៈកំពស់ ១ម៉ឺនម៉ែត្រ។
តាមមេធាវីរបស់ក្រុមគ្រួសារជនរងគ្រោះ គេគ្រោងនឹងដាក់ពាក្យប្តឹងអ៊ុយក្រែន នៅដើមខែតុលាខាងមុខ ដោយចោទពីបទធ្វេសប្រហែស និងទាមទារសំណងជម្ងឺចិត្តមួយលានអឺរ៉ូ សម្រាប់គ្រួសារអ្នកធ្វើដំណើរម្នាក់ៗ។ មេធាវីរបស់គ្រួសារអាល្លឺម៉ង់ពន្លយឲ្យដឹងដែរថា គេនឹងរុស្ស៊ី ទៅថ្ងៃអនាគត ពោលគឺនៅពេលណាគេអាចស៊ើបអង្កេតប្រមូលបានភស្តុតាងច្រើនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ