នាយករដ្ឋមន្ត្រីអង់គ្លេសទៅលួងលោមជប៉ុនកុំអោយបារម្ភពីផលវិបាកBrexit
នាយករដ្ឋមន្ត្រីអង់គ្លេស លោកស្រី Theresa May បានទៅដល់ជប៉ុន ថ្ងៃពុធនេះ ជួបពិភាក្សាជាមួយលោកស្ហ៊ីនហ្សូ អាបេ។ លោកស្រី Theresa May ចង់លួងលោមកុំអោយជប៉ុនបារម្ភពីផលវិបាកក្រោយអង់គ្លេសលែងជាសមាជិកសហភាពអឺរ៉ុបទៀត។ នាយករដ្ឋមន្ត្រីអង់គ្លេសក៏ព្យាយាមបង្ហាញការគាំទ្រអោយមានកិច្ចព្រមព្រៀងផ្តោះប្តូរទ្វេភាគីជាមួយជប៉ុនដែរ។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមហ៊ុនសហគ្រាសជប៉ុនរាប់ពាន់មានវត្តមានក្នុងទឹកដីអង់គ្លេស កំពុងបារម្ភពីផលប៉ះពាល់នៃប្រិចស៊ីត ចំពោះសកម្មភាពរកស៊ីរបស់ពួកគេ។ ទស្សនកិច្ចលោកស្រីតេរេសា មេ នៅជប៉ុនថ្ងៃនេះ គឺដើម្បីធានាលួងលោមជប៉ុនកុំអោយបារម្ភពីបញ្ហានេះ។
លោកស្រីមេ បានបង្ហាញទៅជប៉ុនថា អង់គ្លេសគ្រោងនឹងកត់ចម្លងកិច្ចព្រមព្រៀងពាណិជ្ជកម្មដែលសហភាពអឺរ៉ុប បានធ្វើជាមួយប្រទេសផ្សេងៗកន្លងមក យកគំរូនៃកិច្ចព្រមព្រៀងទាំងនោះ ទៅអនុវត្តក្រោយពេលអង់គ្លេសលែងមានឈ្មោះជាសមាជិកអឺរ៉ុប នៅខែមិនា ឆ្នាំ២០១៩។ កន្លងមក សហភាពអឺរ៉ុបបានសម្រេចកិច្ចព្រមព្រៀងពាណិជ្ជកម្មជាច្រើនជាមួយប្រទេសដូចជាស្វ៊ីស កូរ៉េខាងត្បូង ហើយបច្ចុប្បន្នកំពុងធ្វើយ៉ាងណាសម្រេចអោយចេញសន្ធិសញ្ញាពាណិជ្ជកម្មសេរីជាមួយជប៉ុន។ កន្លងមក អឺរ៉ុបនិងជប៉ុនបានសម្រេចបានកិច្ចព្រមព្រៀងជាគោលលើពាណិជ្ជកម្មទ្វេភាគីរួចហើយ។ អង់គ្លេសចង់យកគំរូបែបនេះ មកអនុវត្តជាមួយជប៉ុន បែបទ្វេភាគីអង់គ្លេស-ជប៉ុនដែរ ក្នុងដំណាក់កាលដំបូង ក្រោយអង់គ្លេសលែងជាសមាជិកអឺរ៉ុបទៀត។
ប៉ុន្តែ ក្រុមហ៊ុនជប៉ុនមិនបានចាប់អារម្មណ៍ផែនការនេះទេ។ ក្រុមហ៊ុនសហគ្រាសជប៉ុនកំពុងសួរពីផលប៉ះពាល់ជាក់ស្តែង ក្រោយពេលអង់គ្លេសដើរចេញពីអឺរ៉ុបទៅវិញទេ។ ម្យ៉ាងទៀត ដរាបណាអង់គ្លេសមិនទាន់សម្រេចនិតិវិធីប្រិចស៊ីត អង់គ្លេសគ្មានសិទ្ធិចរចាកិច្ចព្រមព្រៀងពាណិជ្ជកម្មថ្មីៗជាមួយប្រទេសណាមួយទេ។ ដូច្នេះ ពេលនេះ នាយករដ្ឋមន្ត្រីអង់គ្លេសតេរេសា មេ ក៏ប្រហែលជាពិបាកនិយាយពីកិច្ចព្រមព្រៀងទ្វេភាគីអង់គ្លេស-ជប៉ុន ជាមួយរដ្ឋាភិបាលជប៉ុនដែរ ព្រោះអង់គ្លេសកំពុងចរចានិតិវិធីប្រិចស៊ីតជាមួយអឺរ៉ុបជុំទី៣ អង់គ្លេសនៅមិនទាន់ផ្តាច់ខ្លួនពីអឺរ៉ុបទេ។
ដោយឡែក ក្រុមនយោបាយប្រឆាំងនៅអង់គ្លេសបានរិះគន់នយោបាយកត់ចម្លងកិច្ចព្រមព្រៀងរបស់លោកស្រីមេ និងបានទាមទារអោយរដ្ឋាភិបាលអង់គ្លេស ស្មោះត្រង់ជាមួយអឺរ៉ុប ក្រោយពេលអង់គ្លេសលែងជាសមាជិកអឺរ៉ុបទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ