ហេតុអ្វីចិនត្រូវឈឺក្បាលខ្លាំងជាងគេដោយសារទង្វើរបស់កូរ៉េខាងជើង?
ចុះផ្សាយនៅថ្ងៃ៖
ស្តាប់ - ០៤:២០
ការសាកល្បងអាវុធនុយក្លេអ៊ែរ និងមីស៊ីលបាលីស្ទិក ដែលកូរ៉េខាងជើងបានធ្វើឡើងផ្ទួនៗគ្នា កាលពីពេលថ្មីៗនេះ បានធ្វើឲ្យមានប្រតិកម្មយ៉ាងធ្ងន់ៗពីសំណាក់សហគមន៍អន្តរជាតិ ហើយគេសង្កេតឃើញថា អ្នកដែលបញ្ចេញប្រតិកម្មថ្កោលទោសដោយកំហឹងខ្លាំងៗជាងគេ គឺបណ្តាប្រទេសជាគូសត្រូវរបស់កូរ៉េខាងជើង រួមមាន សហរដ្ឋអាមេរិក កូរ៉េខាងត្បូង និងជប៉ុន។ ក៏ប៉ុន្តែ តាមការពិតទៅ អ្នកដែលត្រូវប្រឈមមុខនឹងបញ្ហាឈឺក្បាលខ្លាំងជាងគេ ដោយសារទង្វើរបស់កូរ៉េខាងជើងនេះ គឺចិនឯណោះទៅវិញ។ តើមកពីហេតុអ្វី?
គេគួរតែអាចនិយាយបានថា ចិនមិនមានអ្វីត្រូវបារម្ភនឹងអាវុធនុយក្លេអ៊ែរ និងមីស៊ីលបាលីស្ទិក ដែលកូរ៉េខាងជើងបានសាកល្បងនៅពេលនេះទេ ពីព្រោះ ចិនគឺជាសម្ព័ន្ធមិត្តរបស់កូរ៉េខាងជើង។ ក៏ប៉ុន្តែ តាមការពិតទៅ គឺទំនាក់ទំនងជាសម្ព័ន្ធមិត្តជាមួយនឹងកូរ៉េខាងជើងនេះហើយ ដែលកំពុងតែបង្កជាបញ្ហាឈឺក្បាលដល់ចិន។
នៅចំពោះសហគមន៍អន្តរជាតិ ជាពិសេស ចំពោះសហរដ្ឋអាមេរិក និងសម្ព័ន្ធមិត្ត ចិនគឺជាខ្នងបង្អែកដ៏ធំជាងគេរបស់កូរ៉េខាងជើង ដូច្នេះ ចិនគួរជាប្រទេសដែលមានឥទ្ធិពលខ្លាំងជាងគេ ហើយមានការទទួលខុសត្រូវច្រើនជាងគេ ក្នុងការណែនាំតម្រែតម្រង់ផ្លូវកូរ៉េខាងជើង គឺប្រៀបដូចជាឪពុកម្តាយ ដែលមានការទទួលខុសត្រូវចំពោះទង្វើរបស់កូន។
លើសពីនេះទៅទៀត ក្រៅពីការទទួលខុសត្រូវ និងមុខមាត់នៅលើឆាកអន្តរជាតិ ចិនក៏ត្រូវប្រឈមមុខនឹងបញ្ហាសន្តិសុខ និងយុទ្ធសាស្រ្តយ៉ាងច្រើនផងដែរ ដោយសារតែទង្វើរបស់កូរ៉េខាងជើង ពីព្រោះថា ទាំងការសាកល្បងអាវុធនុយក្លេអ៊ែរ និងការសាកល្បងមីស៊ីលបាលីស្ទិករបស់កូរ៉េខាងជើង ដែលសុទ្ធសឹងជាទង្វើហាមឃាត់ដោយក្រុមប្រឹក្សាសន្តិសុខអ.ស.ប អាចនឹងត្រូវគូប្រជែងរបស់ចិន ជាពិសេស អាមេរិក និងជប៉ុន យកមកធ្វើជាហេតុផល ឬជាលេស ដើម្បីបង្កើនកម្លាំងទ័ពនៅក្នុងតំបន់ ជុំវិញប្រទេសចិន។
ជាក់ស្តែង គេឃើញថា កាលពីថ្ងៃអាទិត្យ តែប៉ុន្មានម៉ោងប៉ុណ្ណោះ ក្រោយពីកូរ៉េខាងជើងបានបាញ់សាកល្បងមីស៊ីលបាលីស្ទិក កូរ៉េខាងត្បូង និងអាមេរិកបានប្រកាសឲ្យដឹងភ្លាមៗ អំពីគម្រោងចរចាឈានទៅដាក់ពង្រាយប្រព័ន្ធខែលការពារមីស៊ីលអាមេរិក នៅក្នុងប្រទេសកូរ៉េខាងត្បូង។
សម្រាប់ចិន ការដាក់ពង្រាយប្រព័ន្ធខែលការពារមីស៊ីលរបស់អាមេរិកនៅក្នុងទឹកដីកូរ៉េខាងត្បូង ដែលស្ថិតនៅក្បែរប្រទេសចិន គឺជាការប៉ះពាល់ដ៏ធ្ងន់ធ្ងរទៅដល់សន្តិសុខជាតិរបស់ចិន ជាពិសេស ប៉ះពាល់ទៅដល់ប្រសិទ្ធភាពនៃអាវុធនុយក្លេអ៊ែររបស់ចិន ពីព្រោះថា ប្រព័ន្ធខែលការពារមីស៊ីលដ៏ទំនើបនេះ មិនត្រឹមតែអាចស្ទាក់បាញ់មីស៊ីលរបស់កូរ៉េខាងជើងប៉ុណ្ណោះទេ ក៏ប៉ុន្តែ ក៏អាចស្ទាក់បាញ់ទម្លាក់មីស៊ីលបាលីស្ទិករបស់ចិនបានផងដែរ។ ហេតុដូច្នេះហើយបានជាតាំងពីដើមរៀងមក ចិនតែងតែជំទាស់ដាច់ខាតនឹងការដាក់ពង្រាយប្រព័ន្ធខែលការពារមីស៊ីលរបស់អាមេរិក នៅក្នុងប្រទេសកូរ៉េខាងត្បូង។
កាលពីថ្ងៃអាទិត្យ ក្រោយពីកូរ៉េខាងត្បូង និងអាមេរិក ប្រកាសឲ្យដឹងពីគម្រោងដាក់ពង្រាយប្រព័ន្ធខែលការពារមីស៊ីលនេះ ចិនក៏បានចេញមុខប្រកាសជំទាស់ភ្លាមៗដែរ ដោយលើកឡើងថា ការដាក់ពង្រាយប្រព័ន្ធខែលការពារមីស៊ីលនេះនឹងធ្វើឲ្យប៉ះពាល់ទៅដល់សន្តិសុខជាតិរបស់ចិន ហើយអាចនឹងធ្វើឲ្យភាពតានតឹងនៅក្នុងតំបន់កើនឡើងកាន់តែខ្លាំងថែមទៀត។
ក៏ប៉ុន្តែ គ្រប់គ្នាសុទ្ធតែដឹងថា ទឡ្ហីករណ៍របស់ចិនក្នុងការប្រឆាំងនឹងគម្រោងដាក់ពង្រាយប្រព័ន្ធខែលការពារមីស៊ីលរបស់អាមេរិកមានកាន់តែតិចទៅ នៅក្រោយពេលដែលកូរ៉េខាងជើងធ្វើការសាកល្បងផ្ទួនៗគ្នាទាំងអាវុធនុយក្លេអ៊ែរ និងទាំងមីស៊ីលបាលីស្ទិក ដែលជាប្រភេទមីស៊ីលចម្ងាយឆ្ងាយអាចបាញ់រហូតទៅដល់ទឹកដីរបស់សហរដ្ឋអាមេរិក។
ជាការពិតណាស់ថា ស្ទើរតែគ្រប់អ្នកជំនាញទាំងអស់ រាប់ទាំងអ្នកជំនាញរបស់អាមេរិកផងដែរ សុទ្ធតែយល់ថា កូរ៉េខាងជើងនៅមិនទាន់មានសមត្ថភាពគ្រប់គ្រាន់ ក្នុងការផលិតមីស៊ីអន្តរទ្វីបផ្ទុកក្បាលគ្រាប់នុយក្លេអ៊ែរដែលអាចដំណើរការបាននៅឡើយទេ ក៏ប៉ុន្តែ ទោះជាយ៉ាងណា គ្រាន់តែការបាញ់សាកល្បងមីស៊ីលនេះក៏អាចជាទឡ្ហីករណ៍ដ៏ធ្ងន់មួយ សម្រាប់អាមេរិក ដើម្បីប្រាប់ទៅចិនថា ការដាក់ពង្រាយប្រព័ន្ធខែលការពារមីស៊ីលនៅកូរ៉េខាងត្បូង វាគឺជារឿងចាំបាច់ មិនត្រឹមតែដើម្បីការពារកូរ៉េខាងត្បូង និងជប៉ុន ដែលជាសម្ព័ន្ធមិត្តនោះទេ តែចាំបាច់ក្នុងការការពារទឹកដីរបស់អាមេរិកផ្ទាល់ ពីមីស៊ីលរបស់កូរ៉េខាងជើង។
ក្រៅពីវត្តមានប្រព័ន្ធខែលការពារមីស៊ីលរបស់អាមេរិក ចិនអាចនឹងត្រូវប្រឈមមុខនឹងបញ្ហាមួយទៀត គឺជប៉ុន។ នៅក្នុងពេលបច្ចុប្បន្ននេះ លោកស្ហ៊ីនហ្សូ អាបេ កំពុងតែព្យាយាមធ្វើកំណែទម្រង់រដ្ឋធម្មនុញ្ញសន្តិភាពនិយម។ ទង្វើបង្កហេតុម្តងហើយម្តងទៀតរបស់កូរ៉េខាងជើង អាចនឹងធ្វើឲ្យលោកស្ហ៊ីនហ្សូ អាបេ មានទឡ្ហីករណ៍កាន់តែល្អ ក្នុងការជំរុញឲ្យមានកំណែទម្រង់កងទ័ពរបស់ជប៉ុន។ គេមិនត្រូវភ្លេចទេថា ជប៉ុនមានសមត្ថភាពគ្រប់គ្រាន់ ទាំងខាងផ្នែកបច្ចេកវិទ្យា និងហិរញ្ញវត្ថុ ក្នុងការផលិតអាវុធនុយក្លេអ៊ែរ ហើយបើសិនជាជប៉ុនក្លាយជាមហាអំណាចនុយក្លេអ៊ែរ អ្នកដែលត្រូវបាត់ប្រយោជន៍ធំ គឺចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ