បារាំងរបូតជនសង្ស័យជីហាតពីដៃ ពេលកំពុងមានគ្រោះភ័យគំរាមភេរវកម្មខ្លាំង
ក្នុងខណៈដែលការគំរាមកំហែងជីហាតអង្គការរដ្ឋអ៊ីស្លាម មានសន្ធឹកគួរឱ្យព្រួយបារម្ភ ជោគវាសនាចំណាប់ខ្មាំងបារាំងចាប់ខ្លួនកាលពីថ្ងៃអាទិត្យ ក៏មិនជាក់លាក់ ព្រោះផុតកំណត់ឱសានវាទមិនដឹងមានជោគវាសសនាយ៉ាងណានេះ ស្រាប់តែមានដំណឹងធ្លាក់មក ជនសង្ស័យជីហាតបារាំងបីនាក់ ធ្វើដំណើរត្រលប់ពីមកពីស៊ីរី ចូលមកដល់ទឹកដីបារាំងហើយ តែអាជ្ញាធរបារាំងចាប់ខ្លួនមិនបាន។ ជនសង្ស័យបានចូលទៅបង្ហាញខ្លួននៅទីស្នាក់ការប៉ូលិសក្នុងភូមិតួចមួយដោយខ្លួនឯង ដើម្បី ឱ្យភ្នាក់ងារសន្តិសុខឃាត់សួរចម្លើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
មានឈ្មោះក្នុងបញ្ជីភ្នាក់ងារសម្ងាត់ ជនសង្ស័យជីហាតបារាំងទាំងបី បានចុះចតចូលទឹកដីបារាំងវិញ ដោយគ្មានប៉ូលិស ឬភ្នាក់ងារប្រឆាំងនឹងភេរវកម្មណារង់ចាំទទួលសោះ ! សម្រាប់ភាសាប៉ូលិស នេះជាបរាជ័យដ៏ធំមួយ ព្រោះបានបណ្តោយឱ្យជនសង្ស័យរបូតពីភ្នែកបាន។ ហេតុអ្វីបានជាជនសង្ស័យជីហាតទាំងបីអាចរួចរបូតចេញពីដៃ បានក្នុងខណៈដែលក្រុម ប្រទេសបស្ចឹមលោក រាប់ទាំងបារាំងផង កំពុងរងការគំរាមកំហែងភេរវនិយមពីសំណាក់ក្រុមជីហាតអង្គការរដ្ឋអ៊ីស្លាមដូច្នេះ? !
ជនសង្ស័យទាំងបី មានពាក់ព័ន្ធនឹងចលនាអ្នកអ៊ីស្លាមជ្រុលនិយមដាច់ខាត ព្រមទាំងមានទំនាក់ទំនងចំណងគ្រួសារជាមួយ ម៉ូហាមេដ មេរ៉ា ដែលបានបង្កភេរវកម្មបាញ់ប្រហារសាលារៀនជីហ្វនៅខេត្តទូលូ កាលពីខែឧសភាឆ្នាំ២០១២ទៀត។ ធ្វើដំណើរត្រលប់ពីស៊ីរី ទាំងបីនាក់បានត្រូវប៉ូលិសតួកគីឃាត់ខ្លួន រួចបណ្តេញចេញពីទឹកដី នៅថ្ងៃអង្គារទី ២៣កញ្ញា ម្សិលមិញ តាមជើងយន្តហោះ អ៊ីស្តង់ប៊ូល-ប៉ារីស។ ប៉ុន្តែអ្នកបើកបរយន្តហោះបដិសេធមិនព្រមដឹកជនជីហាត ទើបភ្នាក់ងារតួកគីបញ្ជូនជនសង្ស័យជីហាតមកប្រទេសបារាំង តាមជើងហោះហើរផ្សេងដែលត្រូវចុះនៅក្រុងម៉ាកសី ភាគខាងត្បូងប្រទេសវិញ ! ទើបបង្កជាបញ្ហាធំដូច្នេះ ! ព្រោះបើតាមក្រសួងមហាផ្ទៃបារាំង បារាំងបានទទួលព័ត៌មានប្តូរផ្លាស់យន្តហោះ ក្រោយពេលជនជីហាតបានជាន់ដីបារាំង។
សម្រាប់អ្នកសង្កេតការណ៍ នេះជាបរាជ័យដ៏គួរឱ្យព្រួយបារម្ភ ឬអាចជាការបិទបាំងបន្លំផង ព្រោះប៉ុន្មានថ្ងៃចុងក្រោយនេះ ការគំរាមកំហែងភេរវនិយម កើនឡើងខ្ពស់នៅស្ទើរពេញពិភពលោក។ ពួកអង្គការរដ្ឋអ៊ីស្លាមអំពាវនាវឱ្យសម្លាប់ពលរដ្ឋបស្ចឹមលោក ជាពិសេសបារាំង តាមគ្រប់វិធី។ ម្យ៉ាងទៀត ជនជាតិបារាំងម្នាក់ ដែលពួកចលនាអ៊ីស្លាមចាប់ជំរិតទៅ មិនដឹងស្លាប់ឬរស់ ព្រោះឱសានវាទកំណត់ដោយអង្គការរដ្ឋអ៊ីស្លាម ទុកពេលឱ្យបារាំង៤៨ម៉ោង សម្រេចឈប់វាយប្រហារផ្លូវអាកាសនៅអ៊ីរ៉ាក់ ជាថ្នូរនឹងជីវិតចំណាប់ខ្មាំង បានផុតនៅល្ងាចមិញ។ ជោគវាសនាចំណាប់ខ្មាំងបារាំង Hervé Gourdel ស្ថិតក្នុងភាពមិនជាក់លាក់ ដោះស្រាយមិនទាន់ចេញផង ការគំរាមកំហែងប្រហារជីវិតបានធ្លាយចេញមួយទៀត នៅហ្វីលីពីន ! ពួកអ៊ីស្លាមជ្រុលនិយម អាប៊ូសៃយាហ្វ បានគំរាមដែរប្រហារជីវិតចំណាប់ខ្មាំងជនជាតិអាល្លឺម៉ង់ ដែលចាប់ខ្លួនបានកាលពីខែមេសា ប្រសិនបើអាល្លឺម៉ង់បន្តគាំទ្រសម្ព័ន្ធអន្តរជាតិកម្ចាត់ពួកអង្គការរដ្ឋអ៊ីស្លាមដឹកនាំដោយសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ