ហេតុអ្វីបារាំងចេញមុខចេញមាត់ខ្លាំងក្នុងវិបត្តិអ៊ីរ៉ាក់ ?
ចុះផ្សាយនៅថ្ងៃ៖
ស្តាប់ - ០៧:២៩
សន្និសីទអន្តរជាតិស្តីអំពីសន្តិភាពនិងសន្តិសុខអ៊ីរ៉ាក់ កំពុងប្រព្រឹត្តទៅនៅទីក្រុងប៉ារីស ក្រោមអធិបតីភាពប្រធានាធិបតីបារាំង លោក ហ្វ្រង់ស័រ ហូឡង់ និងសមភាគីអ៊ីរ៉ាក់ លោក លោក ហ្វូអាត ម៉ាស៊ូម។ សន្និសីទដែលអាចនឹងមានសន្ទុះខ្លាំង តែក៏អាចអួរអាប់បន្តិច ដោយហេតុតែប្រធានាធិបតីអាមេរិក បារ៉ាក់អូបាម៉ា បានចោទដោយចំៗប្រទេសបារាំង ថាបានលួចបង់លុយទៅឲ្យក្រុមអ៊ីស្លាមជ្រុលនិយមដើម្បីរំដោះចំណាប់ខ្មាំង។ ក្នុងពេលជាមួយគ្នានេះ នៅលើសមរភូមិ រដ្ឋមន្ត្រីក្រសួងការពារជាតិបារាំង បានប្រកាស នៅ ព្រឹកថ្ងៃចន្ទទី ១៥ កញ្ញាដដែលនេះថា យន្តហោះចម្បាំងបារាំងប្រភេទរ៉ាហ្វាល់ (Rafale) អមដោយយន្តហោះស៊ើបការណ៍ផង បានទទួលបញ្ជាចេញធ្វើបេសកកម្មហោះហើរសម្គាល់ទីតាំង និងប្រមូលព័ត៌មាន មុននឹងផ្តើមធ្វើការវាយប្រហារផ្លូវអាកាសលើពួកជីហាតរដ្ឋអ៊ីស្លាម។
សន្និសីទអន្តរជាតិក្រុងប៉ារីស ដើម្បីកម្ទេចពួកជីហាតរដ្ឋអ៊ីស្លាម
២៦ប្រទេស មានជាអាទិ៍សមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិទាំង៥ ក្រុមប្រទេសក្នុងតំបន់ដើមបូព៌ា មជ្ឈឹមបូព៌ា ក្រុមប្រទេសក្នុងតំបន់ឈូងសមុទ្ទពែរ្ស និងប្រទេសជិតខាងជាប់របងអ៊ីរ៉ាក់ លីបង់និងអេហ្ស៊ីប អាល្លឺម៉ង់ ជប៉ុន អង្គការសហប្រជាជាតិ សហភាពអឺរ៉ុបនិងសម្ព័ន្ធអារ៉ាប់ បានមកជួបជុំគ្នាក្នុងសន្និសីទអន្តរជាតិស្តីពីសន្តិភាពនិងសន្តិសុខអ៊ីរ៉ាក់ នៅទីក្រុងប៉ារីស។
ប្រទេសដែលអវត្តមាន គឺស៊ីរី និងអ៊ីរ៉ង់។ ស៊ីរី ត្រូវបានគេដាក់ម្តុំមិនរាប់រក ប៉ុន្តែឈ្មោះប្រធានាធិបតី លោក បាស្ហាអាល់អាសាដ ត្រូវបានគេលើកយកនិយាយកាន់តែច្រើនឡើងៗ។ ចំណែកអ៊ីរ៉ង់វិញ បារាំងចង់ហៅមកក្រុងប៉ារីសថ្ងៃនេះដែរ ប៉ុន្តែអាមេរិក និងអារ៉ាប៊ីសាអ៊ូឌីតប្រឆាំង។ សន្និសីទមិនទាន់ទាំងចប់ផង អ៊ីរ៉ង់បានរិះគន់រួចជាស្រេចថា អន្តរាគមន៍យោធាមិនអាចយកឈ្នះពួកជីហាតរដ្ឋអ៊ីស្លាមបានទេ គឺមានតែការពង្រឹងរដ្ឋាភិបាលរបស់អ៊ីរ៉ាក់ និងស៊ីរី ទើបជាមធ្យោបាយល្អ។
កម្មវត្ថុនៃសន្និសីទថ្ងៃនេះ គឺដើម្បីកំណត់អំពីមធ្យោបាយបញ្ចេញសកម្មភាពប្រយុទ្ធប្រឆាំងប្រភពផ្តល់ហិរញ្ញវត្ថុដល់ក្រុមអ៊ីស្លាមជីហាត ការជ្រើសរើសយុវជនឱ្យចូលជាជីហាត និងពិសេសអំពីការកំណត់តួនាទីប្រទេសជាសមាជិកក្នុងសម្ព័ន្ធអន្តរជាតិប្រឆាំងនឹងរដ្ឋអ៊ីស្លាម។
ជាលទ្ធផល សន្និសីទនឹងចេញសេចក្តីថ្លែងការណ៍ជាសាធារណៈ ចំនួន១០ចំណុច ទាក់ទងនឹង ផែនការធ្វើយុទ្ធនាការ ផែនទីចង្អុលផ្លូវនាំទៅដល់ការកម្ទេចរដ្ឋអ៊ីស្លាម ប៉ុន្តែគ្មានទេខ្លឹមសារលម្អិតនៃការបញ្ចេញសកម្មភាព ឬកាលបរិច្ឆេទ នៃអន្តរាគមន៍យោធាផ្លូវអាកាស។ អ្វីដែលលំបាកបំផុត និងត្រូវការការសម្រេចក្នុងសន្និសីទ គឺការពន្លាតយុទ្ធនាការផ្លូវអាកាសពីអ៊ីរ៉ាក់ទៅស៊ីរី ព្រោះក្រុងដាម៉ាសរបស់លោក បាស្ហារ អាល់អាសាដ ប្រឆាំងជានិច្ចនឹងប្រតិបត្តិការបរទេសលើទឹកដីខ្លួន។
ហេតុអ្វីបានជាបារាំងហាក់ដូចប្រឹងប្រែងខ្លាំង? បារាំងនឹងមានតួនាទីយ៉ាងណា ក្នុងការប្រយុទ្ធប្រឆាំងនឹងរដ្ឋអ៊ីស្លាម ?
គឺរដ្ឋមន្ត្រីក្រសួងការពារជាតិបារាំង តែម្តង ដែលកំពុងស្ថិតនៅក្នុងមូលដ្ឋានទ័ពបារាំងប្រចាំក្រុង អាប៊ូដាប៊ី ប្រទេសអេមីរ៉ាតអារ៉ាប់រួម ជាអ្នកប្រកាសដំណឹងថា យន្តហោះចម្បាំង Rafale និងយន្តហោះស៊ើបការណ៍ (គ្មានទេយន្តហោះដ្រូន) បានហោះចេញទៅប្រមូលព័ត៌មាននិងដៅទីតាំងផ្សេងៗមុននឹងឈានដល់ដំណាក់កាលវាយប្រហារ។ ការវាយប្រហារផ្លូវអាកាសនេះ ដែលស្ថិតក្នុងក្របខ័ណ្ឌនៃអន្តរាគមន៍យោធាដឹកនាំដោយសហរដ្ឋអាមេរិក។
បារាំងថ្វីបើព្រមចូលដៃជាមួយអាមេរិកមែន ប៉ុន្តែបារាំងត្រូវការរក្សាស្វយ័តភាពរបស់ខ្លួន ក្នុងផ្នែកស៊ើបការណ៍ និងរក្សាសិទ្ធិសេរីភាពនៃការជ្រើសចំណុចវាយប្រហារ។ មានន័យថាបារាំងព្រមកៀកស្មាជាមួយអាមេរិកក្នុងសំណុំរឿងអ៊ីរ៉ាក់នេះ មានសិទ្ធសម្រេចចិត្តខ្លះ មិនមែនរង់ចាំឱ្យអាមេរិកដឹកមុខរហូតទេ ព្រោះបារាំងមិនទាន់ភ្លេចទង្វើអាមេរិកដែលក្រឡាស់ដៃក្នុងសំណុំរឿងអន្តរាគមន៍យោធានៅស៊ិរីនៅឡើយទេ។
បារាំងត្រូវតែខិតខំចេញមុខមាត់ខ្លាំង ព្រោះក្នុងនាមជាមហាអំណាចមួយ បារាំងដឹងថាខ្លួនត្រូវមានភារកិច្ចការពារក្រុមអ្នកកាន់សាសនាកាតូលិកនៅអ៊ីរ៉ាក់ផង ត្រូវការរក្សាមុខមាត់លើឆាកអន្តរជាតិផង និងម្យ៉ាងទៀត បារាំងហាក់ដូចជាមានពាក់ព័ន្ធខ្លាំង ក្នុងបញ្ហាប្រយុទ្ធប្រឆាំងនឹងពួកជីហាតនេះ ព្រោះយុវជនបារាំងច្រើនបានលង់ខ្លួនចូលធ្វើជាជីហាត។
បារាំងលេចមុខខ្លាំង តែក៏រងការបន្ទោសខ្លាំង ក្នុងសំណុំរឿងចំណាប់ថ្នូរ
ថ្វីបើអាមេរិករីករាយនឹងការចូលរួមយ៉ាងសកម្មរបស់បារាំងក្នុងយុទ្ធនាការកម្ទេចពួកជីហាតរដ្ឋអ៊ីស្លាមមែន ប៉ុន្តែនេះមិនមែនមានន័យថាបារាំងនិងអាមេរិកមាននយោបាយដូចគ្នាទាំងស្រុងឡើយ។
ក្នុងនយោបាយអាមេរិក គឺកម្រមានណាស់ការចរចាបង់ប្រាក់លួសយកចំណាប់ថ្នូរ ! ក្នុងករណីជនជាតិអាមេរិក ដែលពួកជីហាតបានអារ-ក កាលពីខែមុន និងដែលជំរុញឱ្យអាមេរិកសម្រេចធ្វើប្រតិបត្តិការវាយប្រហារផ្លូវអាកាសនៅអ៊ីរ៉ាក់នោះ តាមការពិតអាមេរិកប្រើកម្លាំងទៅរំដោះដែរ តែត្រូវបរាជ័យ ! រដ្ឋបាលអាមេរិកហាមប្រាមគ្រួសារមិនឱ្យប្រើលុយជាដំណោះស្រាយទេ ពុំនោះទេនឹងត្រូវទទួលទោសព្រហ្មទណ្ឌនៅតុលាការ។
អង់គ្លេសក៏ដូចគ្នា មិនងាយប្រើលុយសម្រាប់ដោះដូរជីវិតមនុស្សទេ។ ចំណាប់ថ្នូរជនជាតិអ៊ីតាលីម្នាក់ ដែលបានធ្លាក់ក្នុងដៃពួកជីហាតដូចអង់គ្លេសនិងអាមេរិកដែរ ទើបនឹងត្រូវបានដោះស្រាយមុននេះប៉ុន្មានថ្ងៃ ដោយសាររដ្ឋាភិបាលបានទៅចរចាបង់លុយ ដោះដូរ។
ដូច្នេះនេះជាប្រការធម្មតាទេ ដែលវីដេអូ អារ-ក សម្លាប់ជនជាតិអង់គ្លេស កាលពីថ្ងៃសៅរ៍ បានធ្វើឱ្យសំណុំរឿងចំណាប់ខ្មាំង ត្រដែតឡើង និងនាំ លោកអូបាម៉ា ឱ្យបន្ទោសសម្ព័ន្ធមិត្ត នាពេលនេះ ព្រោះចង់ឬមិនចង់ អ្នកបង់លុយបានរួចជីវិត ឯអ្នកមិនបានបង់ត្រូវរងគ្រោះ គួរឱ្យឈឺចាប់។ លោកអូបាម៉ាត្រូវឆ្លៀតឱកាសនេះបន្ទោសសម្ព័ន្ធខ្លះ ព្រោះបើតាមលោកប្រធានាធិបតី ពួកអ៊ីស្លាមដែលមានកម្លាំង រហូតមកទល់ពេលនេះ គឺដោយសារតែក្រុមប្រទេសបស្ចឹមជាអ្នកចិញ្ចឹម តាមរយៈការផ្តល់លុយជាថ្នូរនឹងការដោះលែងចំណាប់ខ្មាំង ក្នុងនោះគឺមានបារាំងដែរ។ សេរីភាពរបស់ចំណាប់ខ្មាំងបារាំង ត្រូវបានរដ្ឋាភិបាលប្រកាស ជាផ្លូវការថាមិនបានប្រើលុយទេ តែតាមពិតគឺបានចំណាយរាប់លានអឺរ៉ូ។ បើតាមកាសែតញូវយ៉កថែមស៍ បារាំងបានចំណាយអស់ជាង៥៨លានអឺរ៉ូ នៅឆ្នាំនេះ សម្រាប់រំដោះពលរដ្ឋបារាំងឱ្យផុតពីកណ្តាប់ដៃពួកអាល់កៃដានៅតំបន់ម៉ាហ្ក្រេប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ