មនុស្សជំនិតអតីតប្រធានាធិបតីបារាំងជាប់ចោទធ្វើវិក្ក័យប័ត្រក្លែងក្លាយ
មន្ត្រីជាន់ខ្ពស់បីនាក់នៃគណបក្សUMP និងជាជំនិតរបស់អតីតប្រធានាធិបតីបារាំងលោកនីកូឡា សាកូហ្ស៊ី ត្រូវតុលាការចោទប្រកាន់នៅថ្ងៃសៅរ៍ទី ៤ តុលា នេះពីបទធ្វើវិក្ក័យប័ត្រក្លែងបន្លំ ក្នុងអំឡុងពេលឃោសនាបោះឆ្នោតប្រធានាធិបតី ឆ្នាំ២០១២ ដែលលោកនីកូឡា សាកូហ្ស៊ី បានជាបេក្ខជនប្រធានាធិបតីសម្រាប់អាណត្តិទីពីរ។ តើសំណុំរឿងបន្លំ វិក្ក័យប័ត្រ ដែលតុលាការដាក់ឈ្មោះថា សំណុំរឿងប៊ីម៉ាលីយ៉ុង (Bygmalion) មានដំណើរដើមទងយ៉ាងណា ? លោកនីកូឡា សាកូហ្ស៊ី អាចពាក់ព័ន្ធប្រលាក់ប្រលូសយ៉ាងណា ?
ចុះផ្សាយនៅថ្ងៃ៖
ស្តាប់ - ០២:១៩
ដំណើរការតុលាការក្នុងសំណុំរឿងBygmalion ហាក់បង្កើនល្បឿនយ៉ាងខ្លាំង នារយៈពេលចុងក្រោយនេះ។ ក្រោយពីបានឃាត់ខ្លួនសួរចម្លើយអស់ពេលបីថ្ងៃ នៅទីបំផុត តុលាការបារាំងបានសម្រេចចោទប្រកាន់ជាផ្លូវការអតីតមន្ត្រីជាន់ខ្ពស់បក្សUMP (បក្សស្តាំនិយម ដែលលោកនីកូឡាសាកូហ្ស៊ី កំពុងត្រៀមប្រកួតប្រជែងដណ្តើមយកតួនាទីប្រធានបក្ស) បីនាក់ ក្នុងសំណុំរឿងអង្កេតធ្វើវិក្ក័យប័ត្រក្លែងក្លាយ។ ជាមនុស្សជំនិត ជាភ្នែកជាច្រមុះរបស់អតីតប្រធានាធិបតីបារាំង -ជាអតីតនាយកផ្នែកហិរញ្ញវត្ថុ -និងជាអតីតនាយកផ្នែកទំនាក់ទំនង -ទាំងបីនាក់ត្រូវជាប់ចោទពីបទលួចបន្លំ ក្លែង និងរំលោភច្បាប់ ព្រមទាំងត្រូវស្ថិតក្រោមការតាមដាននៃច្បាប់ ដោយជាប់បម្រាមមិនឱ្យទាក់ទងនឹងជនជាប់ចោទពាក់ព័ន្ធផ្សេងទៀតក្នុងសំណុំរឿងនេះ។
មូលហេតុនៃការស្រាវជ្រាវធ្វើអង្កេតសំណុំរឿងBygmalionនេះ គឺមកពីតុលាការសង្ស័យថា មានការលួចបន្លំធ្វើវិក្ក័យប័ត្រក្លែងក្លាយ នៅក្នុងពេលឃោសនាបោះឆ្នោតប្រធានាធិបតីឆ្នាំ២០១២។ ដោយមានការព្រមព្រៀងស៊ុំគ្រលំគ្នា ក្រុមហ៊ុន Bygmalion ដែលជាក្រុមហ៊ុនឯកជន បង្កើតឡើងនៅឆ្នាំ២០០៨ បានទទួលរៀបចំគម្រោងកម្មវិធីនិងមិទ្ទិញផ្សេងៗឱ្យលោក សាកូហ្ស៊ី តែដល់ពេលធ្វើវិក្ក័យប័ត្រទារលុយក្នុងទំហំទឹកប្រាក់ ប្រមាណជា ១៨,៥លានអឺរ៉ូ ស្រាប់តែទៅយកពីគណបក្សUMP មិនមែនទារពីហិបឃោសនារបស់បេក្ខជនសាកូហ្ស៊ីទេ។ ការធ្វើវិក្ក័យប័ត្របន្លំឈ្មោះដូច្នេះ គឺដើម្បីបិទបាំងចំណាយពិតៗរបស់បេក្ខជនប្រធានាធិបតី នីកូឡា សាកូហ្ស៊ី។ តាមច្បាប់ ដើម្បីមានសមភាព បេក្ខជនម្នាក់ៗមានសិទ្ធិប្រើប្រាស់ថវិកាសម្រាប់ឃោសនា ត្រឹមតែ២២,៥លានអឺរ៉ូប៉ុណ្ណោះ។ ក៏ប៉ុន្តែលោកនីកូឡា សាកូហ្ស៊ី ទំនងជាបានចាយហួសច្បាប់កំណត់ ដល់ទៅជិតពីរដង នៅពេលឃោសនាសម្រាប់បោះឆ្នោតជុំទីពីរ។
សំណុំរឿងវិក្ក័យប័ត្រក្លែងក្លាយ អាចជាឧបសគ្គរាំងស្ទះមហិច្ឆតានយោបាយរបស់លោកអតីតប្រធានាធិបតី នីកូឡា សាកូហ្ស៊ី ព្រោះកាលពីដើមសប្តាហ៍មនុស្សបីនាក់ជាអតីតប្រធានក្រុមហ៊ុនBygmalion ត្រូវបានតុលាការចោទប្រកាន់ដែរ។ រូបលោកនីកូឡា សាកូហ្ស៊ី ផ្ទាល់ក៏មានជាប់ឈ្មោះក្នុងសំណុំរឿងតុលាការផ្សេងៗជាច្រើនទៀត មានជាអាទិ៍បទចោទប្រកាន់ប្រព្រឹត្តអំពើពុករលួយនិងរំលោភការសម្ងាត់វិជ្ជាជីវៈកាលពីខែកក្កដា។ ពីរឆ្នាំកន្លះក្រោយពីបរាជ័យនៅចំពោះមុខលោក ហ្វ្រង់ស័រ ហូឡង់ លោកនីកូឡាសាកូហ្ស៊ី ទើបបានប្រកាសចូលប្រលូកនយោបាយជាថ្មី កាលពីពីរសប្តាហ៍មុន តាមរយៈការឈរឈ្មោះប្រកួតប្រជែងដណ្តើមតួនាទី ជាប្រធានគណបក្សUMP៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ