លោកប្រធានាធិបតីបារាំងបំពេញទស្សនកិច្ចនៅអូស្រ្តាលី
លោកប្រធានាធិបតីបារាំង អេម៉ានុយអែល ម៉ាក្រុង បានចាប់ផ្តើមដំណើរទស្សនកិច្ចនៅក្នុងតំបន់ប៉ាស៊ីហ្វិក នៅថ្ងៃអង្គារ ដោយចាប់ផ្តើមដំបូងពីប្រទេសអូស្រ្តាលី។ ដំណើរទស្សនកិច្ចរបស់លោកម៉ាក្រុងនៅពេលនេះ ធ្វើឡើង នៅក្នុងពេលដែល បារាំង និងអូស្រ្តាលី កំពុងតែមានទំនាក់ទំនងយ៉ាងជិតស្និទ្ធនឹងគ្នា ទាំងខាងផ្នែកនយោបាយ សន្តិសុខ និងសេដ្ឋកិច្ច។
ចុះផ្សាយនៅថ្ងៃ៖
ជាការពិតណាស់ថា ដំណើរទស្សនកិច្ចរបស់ប្រធានាធិបតីបារាំង ទៅកាន់ប្រទេសអូស្រ្តាលី មិនសូវជាកើតមានញឹកញាប់ប៉ុន្មាននោះទេ។ ដំណើរទស្សនកិច្ចលើកចុងក្រោយរបស់ប្រធានាធិបតីបារាំងនៅអូស្រ្តាលី គឺកើតឡើង តាំងពី ៤ឆ្នាំមុន គឺដំណើរទស្សនកិច្ចរបស់លោកហ្វ្រង់ស័រ ហូឡង់ ដើម្បីចូលរួមក្នុងជំនួបកំពូលក្រុមប្រទេស G20។
ក៏ប៉ុន្តែ បើទោះបីជាយ៉ាងនេះក៏ដោយ តាមការសង្កេតជារួម នៅក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនង រវាងបារាំង និងអូស្រ្តាលី បានស្គាល់នូវភាពល្អូកល្អឺននឹងគ្នាខ្លាំង ហើយប្រមុខដឹកនាំប្រទេសទាំងពីរសុទ្ធតែបង្ហាញពីឆន្ទៈចង់បង្កើនកិច្ចសហប្រតិបត្តិការនឹងគ្នាឲ្យកាន់តែជិតស្និទ្ធជាងនេះទៅទៀត។
ថ្លែងនៅចំពោះមុខអ្នកសារព័ត៌មាន នៅថ្ងៃអង្គារ លោកអេម៉ានុយអែល ម៉ាក្រុង បានអះអាងថា លោកមានបំណងចង់បង្កើនទំនាក់ទំនងទ្វេភាគី បារាំង-អូស្រ្តាលី ទាំងខាងផ្នែកយុទ្ធសាស្រ្ត និងសេដ្ឋកិច្ច ក៏ដូចជា ខាងផ្នែកវិទ្យាសាស្រ្ត វប្បធម៌ និងភាសា ដោយលោកបានរំឭកផងដែរ ពីចំណងទាក់ទងជាប្រវត្តិសាស្រ្ត រវាងប្រទេសទាំងពីរ ដែលមានតាំងពីសម័យសង្រ្គាមលោកលើកទី២ ដែលអូស្រ្តាលីបានបញ្ជូនទាហានឲ្យទៅជួយរំដោះប្រទេសបារាំង ពីកណ្តាប់ដៃរបស់អាល្លឺម៉ង់ហ៊ីត្លែរ។
នៅក្នុងពេលបច្ចុប្បន្ននេះ មានកត្តាដ៏សំខាន់ពីរទៀត ដែលកំពុងជាកម្លាំងចលករដ៏សំខាន់ ក្នុងការជំរុញកិច្ចសហប្រតិបត្តិការ រវាងបារាំង និងអូស្រ្តាលី គឺទីមួយ ភាពតានតឹងខាងផ្នែកពាណិជ្ជកម្មជាមួយនឹងលោកដូណាល់ត្រាំ និងទីពីរ ភាពតានតឹងជាមួយចិន នៅក្នុងតំបន់សមុទ្រចិនខាងត្បូង។
គេនៅចាំបានថា កាលពីឆ្នាំ២០១៦កន្លងទៅ អូស្រ្តាលីបានចុះកិច្ចសន្យាទិញនាវាមុជទឹកទំនើបៗជាច្រើនគ្រឿងពីបារាំង នៅក្នុងទំហំជាទឹកប្រាក់រហូតដល់ទៅជិត ៤០ពាន់លានដុល្លារអាមេរិក។ នៅថ្ងៃពុធនេះ លោកអេម៉ានុយអែល ម៉ាក្រុង គ្រោងនឹងចុះកិច្ចព្រមព្រៀង ដើម្បីពង្រឹងកិច្ចសហប្រតិបត្តិការជាមួយអូស្រ្តាលី នៅក្នុងវិស័យបច្ចេកវិទ្យាយោធា ក៏ដូចជាវិស័យមួយចំនួនទៀត រួមមាន វិស័យសុខាភិបាល អប់រំនិងស្រាវជ្រាវ អវកាស និងការប្រយុទ្ធប្រឆាំងនឹងភេរវកម្ម។
លោកអេម៉ានុយអែល ម៉ាក្រុងបានឲ្យដឹងថា លោកមានចក្ខុវិស័យចង់ឲ្យមានការពង្រឹងទំនាក់ទំនងជាដៃគូយុទ្ធសាស្រ្ត រវាងបារាំង និងប្រទេសសំខាន់ចំនួនពីរ នៅក្នុងតំបន់ឥណ្ឌូប៉ាស៊ីហ្វិក គឺអូស្រ្តាលី និងឥណ្ឌា។ ក៏ប៉ុន្តែ ក្នុងពេលជាមួយគ្នា ឯកអគ្គរដ្ឋទូតបារាំងប្រចាំនៅអូស្រ្តាលីក៏បានធ្វើការពន្យល់ផងដែរថា ការបង្កើនវត្តមានរបស់បារាំង នៅក្នុងតំបន់ឥណ្ឌូប៉ាស៊ីហ្វិកនេះ គឺមិនមានគោលដៅមកប្រកួតប្រជែងជាមួយនឹងចិននោះទេ តែជាការបង្រ្គប់គ្នាទៅវិញទៅមក និងដើម្បីឲ្យបណ្តាប្រទេសនៅក្នុងតំបន់អាចមានជម្រើសច្រើនងាយស្រួលក្នុងការជ្រើសរើស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ