ហ្វីលីពីនចុះកិច្ចព្រមព្រៀងការពារជាតិជាមួយបារាំងក្នុងពេលកំពុងជាប់ជម្លោះជាមួយចិន
នៅក្នុងសប្តាហ៍នេះ ហ្វីលីពីននិងបារាំងទើបនឹងបានចុះកិច្ចព្រមព្រៀងនឹងគ្នា ស្តីពីសហប្រតិបត្តិការក្នុងវិស័យការពារជាតិ។ នេះបើតាមការប្រកាសឲ្យដឹងរបស់ស្ថានទូតបារាំងប្រចាំទីក្រុងម៉ានីល នៅថ្ងៃសៅរ៍នេះ ដោយបានបញ្ជាក់បន្ថែមថា តាមរយៈកិច្ចព្រមព្រៀងនេះបារាំងនឹងជួយហ្វីលីពីន នៅក្នុងការធ្វើទំនើបកម្មវិស័យកងទ័ពរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
កិច្ចព្រមព្រៀងការពារជាតិ រវាងបារាំង និងហ្វីលីពីន ត្រូវបានចុះហត្ថលេខា កាលពីថ្ងៃពុធ ពោលគឺ ២ថ្ងៃ ក្រោយពីជោគជ័យរបស់លោក រ៉ូឌ្រីហ្គោ ឌូទែរតេ (Rodrigo Duterte) ក្នុងការបោះឆ្នោតប្រធានាធិបតីហ្វីលីពីន។
នៅក្នុងសេចក្តីប្រកាសព័ត៌មានចេញផ្សាយនៅថ្ងៃសៅរ៍នេះ ស្ថានទូតបារាំងប្រចាំទីក្រុងម៉ានីល បានឲ្យដឹងថា កិច្ចព្រមព្រៀងការពារជាតិនេះ គឺជាក្របខ័ណ្ឌគតិយុត្តមួយ សម្រាប់ឈានទៅពង្រឹងទំនាក់ទំនង រវាងកងទ័ពបារាំង និងកងទ័ពហ្វីលីពីន និងជាងនេះទៅទៀត គឺការបង្កើនកិច្ចសហប្រតិបត្តិការទ្វេភាគី ខាងផ្នែកភស្តុភា គ្រឿងសព្វាវុធ និងឧស្សាហកម្មយោធា ជាពិសេស គឺកិច្ចសហប្រតិបត្តិការក្នុងវិស័យទ័ពជើងទឹក។
ការចុះកិច្ចព្រមព្រៀងក្នុងវិស័យការពារជាតិ រវាងប្រទេសទាំងពីរនៅពេលនេះ ទោះចង់ឬមិនចង់ ប្រាកដជាធ្វើឲ្យគេគិតទៅដល់បរិបទនៃភាពតានតឹង ដែលចេះតែកើនឡើងឥតឈប់ រវាងហ្វីលីពីន និងចិន នៅក្នុងជម្លោះ នៅសមុទ្រចិនខាងត្បូង។
នៅក្នុងបរិបទនេះ គេសង្កេតឃើញថា ហ្វីលីពីនកំពុងតែព្យាយាមពង្រឹងទំនាក់ទំនងជាមួយនឹងបណ្តាប្រទេសដែលជាប់ជម្លោះជាមួយចិនដូចគ្នា ដូចជា វៀតណាម និងជប៉ុន ជាដើម និងជាមួយប្រទេសមហាអំណាចផ្សេងទៀត ដែលអាចជួយជាខ្នងបង្អែកទប់ទល់ជាមួយចិន ឬជួយក្នុងការធ្វើទំនើបកម្មកងទ័ពរបស់ហ្វីលីពីន។ គួរបញ្ជាក់ថា ក្រៅពីចុះកិច្ចព្រមព្រៀងការពារជាតិជាមួយបារាំង ហ្វីលីពីនក៏បានចុះកិច្ចព្រមព្រៀងពង្រឹងសម្ព័ន្ធភាពយោធាជាមួយនឹងសហរដ្ឋអាមេរិកផងដែរ កាលពីពេលថ្មីៗកន្លងទៅនេះ។
ចំណែកឯបារាំងវិញ ក៏កំពុងតែព្យាយាមឆ្លៀតឱកាសទាញយកផលប្រយោជន៍ ពីភាពតានតឹង និងការប្រកួតប្រជែងផ្នែកសព្វាវុធ នៅក្នុងតំបន់អាស៊ីនេះដែរ ពីព្រោះថា បារាំងគឺជាប្រទេសនាំចេញគ្រឿងសព្វាវុធដ៏ធំមួយ ហើយនៅក្នុងពេលដែលសេដ្ឋកិច្ចកំពុងតែស្ថិតក្នុងភាពត្រដាបត្រដួស បារាំងកំពុងតែស្វះស្វែងរកទីផ្សារ ដើម្បីលក់គ្រឿងសព្វាវុធរបស់ខ្លួន។ ជាក់ស្តែង កាលពីពេលថ្មីៗនេះ បារាំងទើបនឹងចុះកិច្ចសន្យាលក់គ្រឿងសព្វាវុធដ៏ធំមួយ នៅអាស៊ី គឺការលក់នាវាមុជទឹកចំនួន ១២គ្រឿង ក្នុងទឹកប្រាក់រហូតដល់ទៅ ៥០ពាន់លានដុល្លារអូស្រ្តាលី (ប្រមាណជា ៣៤ពាន់លានអឺរ៉ូ) ទៅឲ្យប្រទេសអូស្រ្តាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ