បុរសម្នាក់បើករថយន្តបុកស្លាប់មនុស្សយ៉ាងតិច១០នាក់នៅកាណាដា
កាលពីថ្ងៃច័ន្ទម្សិលមិញ បុរសវ័យ២៥ឆ្នាំម្នាក់បានបើករថយន្តបុកសំដៅទៅលើក្រុមអ្នកថ្មើរជើងនៅតាមដងផ្លូវក្នុងទីក្រុងតូរ៉ុនតូ ប្រទេសកាណាដា ដែលបានសម្លាប់ជីវិតមនុស្សយ៉ាងតិច១០នាក់ និងរបួស១៥នាក់។ រហូតមកដល់ថ្ងៃអង្គារនេះ ពុំទាន់មានភស្តុតាងណា ដែលបញ្ជាក់ថានេះជាការវាយប្រហារបែបភេរវកម្មនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
កាលពីថ្ងៃច័ន្ទម្សិលមិញ បុរសម្នាក់ឈ្មោះ Alek Minassian បានបើករថយន្តជួលពណ៌សមួយសំដៅទៅក្រុមអ្នកថ្មើរជើង ដែលកំពុងធ្វើដំណើរនៅតាមដងផ្លូវក្នុងក្រុងតូរ៉ុនតូ។ ហេតុការណ៍នេះ បានបណ្ដាលអោយមនុស្សចំនួន៩នាក់ស្លាប់នៅនឹងកន្លែង ម្នាក់ផ្សេងទៀតស្លាប់ពេលនៅមន្ទីរពេទ្យដោយសាររបួសធ្ងន់ធ្ងរខ្លាំងពេក។ មនុស្ស១៥នាក់ផ្សេងទៀតរងរបួសស្រាលនិងធ្ងន់ ហើយបច្ចុប្បន្នកំពុងសម្រាកព្យាបាលក្នុងមន្ទីរពេទ្យ។
តាមការអោយដឹងរបស់រដ្ឋមន្ត្រីការបរទេសកូរ៉េខាងត្បូង ក្នុងចំណោមអ្នករងគ្រោះក្នុងហេតុការណ៍នេះ មានជនជាតិកូរ៉េខាងត្បូងចំនួន២នាក់ដែលបានស្លាប់ និងម្នាក់ទៀតរងរបួសធ្ងន់។
ជនបង្កហេតុក្នុងរឿងនេះ ត្រូវបានមន្ត្រីប៉ូលីសប្រចាំតំបន់ក្នុងក្រុងតូរ៉ុងតូចាប់ខ្លួនភ្លាមៗនៅនឹងកន្លែង។
យោងតាមការអោយដឹងរបស់សាក្សី ជនបង្កហេតុរូបនោះបានបើករថយន្តក្នុងទិសដៅភាគខាងត្បូង សំដៅទៅកណ្ដាលទីក្រុង ចំងាយប្រមាណ១៦គីឡូម៉ែត្រពីទីតាំងដែលរដ្ឋមន្ត្រីក្រសួងហិរញ្ញវត្ថុនៃបណ្ដាប្រទេសមហាអំណាចសេដ្ឋកិច្ចទាំង៧ (G7) កំពុងជួបប្រជុំនៅក្នុងថ្ងៃច័ន្ទនោះ។
យ៉ាងណាមិញ មន្រ្តីអាជ្ញាធរកាណាដាបានគូសបញ្ជាក់អោយដឹងថា រហូតមកដល់ពេលបច្ចុប្បន្ន ពុំមានភស្តុតាងណាដែលបញ្ជាក់ថា ហេតុការណ៍រថយន្តបុកមនុស្សនេះមានទាក់ទងទៅនឹងការប្រជុំ G7 ឬជាការធ្វើភេរវកម្មនោះទេ។
មេបញ្ជាការប៉ូលីសប្រចាំក្រុងតូរ៉ុនតូ បានប្រាប់ទៅកាន់អ្នកសារព័ត៌ថា ហេតុការណ៍នេះមើលទៅមិនមែនកើតឡើងដោយចៃដន្យនោះទេ តែជាទង្វើដែលធ្វើឡើងដោយចេតនា។ តែកន្លងមក បុរសបង្កហេតុនេះ ពុំធ្លាប់មានប្រវត្តិប្រព្រឹត្តអំពើបទល្មើសនោះទេ។
សូមរំលឹកថា ករណីវាយប្រហារដោយប្រើរថយន្តបុកសម្លាប់មនុស្ស ភាគច្រើនធ្វើឡើងដោយបុគ្គលជ្រុលនិយម ហើយតែងកើតឡើងក្នុងរាជធានីនិងក្រុងសំខាន់ៗដូចជា ទីក្រុងឡុងដ៏ ញ៉ូយ៉ក ប៉ារីស និងទីក្រុងនីស ប្រទេសបារាំងជាដើម។
ទោះបីជាប្រទេសកាណាដាកម្រមានហេតុការណ៍រថយន្តបុកសម្លាប់មនុស្សក៏ដោយ ហេតុការណ៍ស្រដៀងនេះធ្លាប់កើតឡើងយ៉ាងតិច២ដងរួចមកហើយ។ ក្នុងនោះមានករណីវាយប្រហារមន្រ្តីប៉ូលីស រួចបើករថយន្តបុកអ្នកថ្មើរជើងបណ្ដាលអោយរបួស៤នាក់ កាលពីខែតុលាឆ្នាំ២០១៧ និងករណីបើករថយន្តបុកមន្រ្តីប៉ូលីស២នាក់ បណ្ដាលអោយស្លាប់ម្នាក់ ក្នុងខែតុលាឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ