ប៉ាឡេស្ទីនគ្រោងធ្វើបាតុកម្មប្រឆាំងនឹងទស្សនកិច្ចរបស់អនុប្រធានាធិបតីអាមេរិកនៅហ្ស៊េរុយសាឡិម
ក្រុមFatahរបស់ប្រធានាធិបតីប៉ាឡេស្ទីនលោកMahmud Abbas បានប្រកាសកាលពីថ្ងៃសៅរ៍ម្សិលមិញនេះឲ្យមានការធ្វើបាតុកម្មប្រឆាំងតវ៉ានាសប្ដាហ៍ក្រោយ នៅពេលដែលអនុប្រធានាធិបតីអាមេរិកលោកMike Penceធ្វើទស្សនៈកិច្ចនៅទីក្រុងហ្ស៊េរុយសាឡិម បន្ទាប់ពីលោកដូណាល់ត្រាំបានប្រកាសទទួលស្គាល់ហ្ស៊េរុយសាឡិមជារដ្ឋធានីរបស់អ៊ីស្រាអែល។
ចុះផ្សាយនៅថ្ងៃ៖
អស់រយៈពេលជាង១សប្តាហ៍មកហើយ ដែលប៉ាឡេស្ទីន បានធ្វើការតវ៉ាប្រឆាំងទៅនឹងការសម្រេចចិត្តរបស់អាមេរិកក្នុងការផ្លាស់ប្តូរនូវគោលនយោបាយរបស់ខ្លួនដោយងាកទៅរកអ៊ីស្រាអែលចំពោះបញ្ហាទីក្រុងហ្ស៊េរុយសាឡិម។ ហើយក្រុមFatah របស់លោកប្រធានាធីបតី Mahmud Abbas គ្រោងនឹងធ្វើបាតុកម្មប្រឆាំងតវ៉ាក្នុងពេលដែលអនុប្រធានាធិបតីអាមេរិកលោកMike Penceធ្វើដំណើរទស្សនៈកិច្ចនៅហ្ស៊េរុយសាឡិមនាសប្តាហ៍ក្រោយ។
គួររំលឹកដែរថា កាលពីថ្ងៃពុធសប្ដាហ៍មុន ប្រធានាធិបតីអាមេរិកលោកដូណាល់ត្រាំ បានប្រកាសការសម្រេចចិត្តរបស់លោកក្នុងការទទួលស្គាល់ហ្ស៊េរុយសាឡិមជារដ្ឋធានីរបស់អ៊ីស្រាអែល ហើយនេះបានធ្វើអោយមានកំហឹងនិងប្រតិកម្មមិនពេញចិត្តយ៉ាងខ្លាំងពីសំណាក់ក្រុមប្រទេសអារ៉ាប់និងសហគមន៍អន្តរជាតិ។
បាតុកម្មដែលក្រុម Fatah បានគ្រោងទុកនេះ នឹងត្រូវធ្វើឡើងនៅថ្ងៃពុធសប្តាហ៍ក្រោយ នៅតាមបណ្តាច្រកចូលទៅកាន់ទីក្រុងហ្ស៊េរុយសាឡិម ក្នុងគោលបំណងប្រឆាំងនឹងការធ្វើទស្សនៈកិច្ចរបស់លោកPence និងប្រឆាំងនឹងការសម្រេចចិត្តរបស់លោកត្រាំផងដែរ។ ការប្រកាសឲ្យធ្វើបាតុកម្មនេះ គឺធ្វើឡើងស្របពេលដែលប្រជាជនប៉ាឡេស្ទីនរាប់ពាន់នាក់កំពុងចូលរួមប្រារព្ធពិធីបុណ្យសពរបស់សកម្មជន៤នាក់ ដែលបានស្លាប់ដោយការប៉ះទង្កិចគ្នាជាមួយកងកំលាំងអ៊ីស្រាអែលក្នុងកំឡុងពេលធ្វើបាតុកម្មកាលពីថ្ងៃសុក្រ។
ក្រៅពីការគ្រោងធ្វើបាតុកម្មនេះ ប៉ាឡេស្ទីនក៏បានលុបចោលនូវគម្រោងជួបប្រជុំរវាងប្រធានាធិបតីរបស់ខ្លូនជាមួយលោក Penceផងដែរ។ កន្លងមក ប៉ាឡេស្ទីនធ្លាប់បានព្រមានរួចមកហើយថា ការសម្រេចរបស់លោកដូណាល់ត្រាំចំពោះទីក្រុងហ្ស៊េរុយសាឡិម ធ្វើឲ្យអាមេរិកលែងមានតួនាទីក្នុងការសម្របសម្រួលដោះស្រាយវិបត្តិរវាងរវាងប៉ាឡេស្ទីននិងអ៊ីស្រាអែលទៀតហើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ