ប្រមុខចលនាអេបូឡាលីបង់ចោទអារ៉ាប៊ីសាអូឌីតពីបទចិញ្ចឹមវិបត្តិនៅស៊ីរី និងយេម៉ែន
នៅថ្ងៃសុក្រ ទី៦ ឧសភា ប្រមុខចលនាអេបូឡាលីបង់លោកហាសាន ណាស្រាឡាបានចោទប្រទេសអារ៉ាប៊ីសាអូឌីតពីបទដឹកមុខប្រឆាំងប្រទេសអ៊ីរ៉ង់ និងសម្ព័ន្ធមិត្តរបស់អ៊ីរ៉ង់នៅក្នុងតំបន់ ដោយបានទៅរួមសហការណ៍ជាមួយប្រទេសអ៊ីស្រាអែល។ ទន្ទឹមគ្នានេះ ប្រមុខចលនាអេបូឡាលីបង់អ្នកកាន់សាសនាអ៊ីស្លាមនិកាយឈីអ៊ីតក៏បានទម្លាក់កំហុសដាក់ប្រទេសអារ៉ាប៊ីសាអូឌីតថាជាអ្នកបន្តចិញ្ចឹមសង្រ្គាមនៅក្នុងប្រទេសយេម៉ែន និងជាអ្នកបំផ្លាញបទឈប់បាញ់នៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
សម្រាប់ប្រមុខចលនាអេបូឡាលីបង់ហាសាន ណាស្រាឡាគឺច្បាស់ណាស់ អារ៉ាប៊ីសាអូឌីតជាអ្នកទទួលខុសត្រូវនៅគ្រប់សង្រ្គាមដែលកំពុងហែកហួរនៅក្នុងតំបន់មជ្ឈិមបូព៌ា។ នៅក្នុងសុន្ទរកថាថ្លែងនាថ្ងៃសុក្រ ទី៦ ឧសភា លោកហាសាន ណាស្រាឡាបានចង្អុលចំមុខទីក្រុងរីយ៉ាដថាជាអ្នកបំផ្លាញបទឈប់បាញ់នៅស៊ីរី ដោយបានជួយគាំទ្រ និងលើកទឹកចិត្តក្រុមឧទ្ទាមឲ្យបន្តវាយប្រហារនៅក្នុងទីក្រុងអាឡិប។
យោងតាមលោកហាសាន ណាស្រាឡា អារ៉ាប៊ីសាអូឌីតពិតជាមានឆន្ទៈចង់ឲ្យកិច្ចចរចាសន្តិភាពរវាងភាគីផ្ទៃក្នុងស៊ីរីរៀបចំក្នុងទីក្រុងហ្សឺណែវ ប្រទេសស្វ៊ីស និងកិច្ចចរចាសន្តិភាពរវាងភាគីផ្ទៃក្នុងយេម៉ែនរៀបចំក្នុងប្រទេសកូវ៉ែតទទួលបរាជ័យ។ ប្រមុខចលនាអេបូឡាលីបង់បានបន្ថែមដោយអះអាងថា ការលូកដៃជ្រៅរបស់អារ៉ាប៊ីសាអូឌីតនៅក្នុងកិច្ចចរចាស្វែងរកសន្តិភាពឲ្យស៊ីរី និងយេម៉ែននឹងមិនអាចទទួលបានលទ្ធផលវិជ្ជមានឡើយ ព្រោះលក្ខខណ្ឌដែលស្នើឡើងដោយទីក្រុងរីយ៉ាដ ជាលក្ខខណ្ឌដើម្បីញុះញង់ ពោលមិនមែនលក្ខខណ្ឌដើម្បីសម្របសម្រួលទេ។
នៅក្នុងន័យនេះ លោកហាសាន ណាស្រាឡាបានទាយទុកជាមុនពីស្ថានការណ៍យ៉ាប់យឺន និងអូសបន្លាយនៅស៊ីរី ក៏ដូចជានៅយេម៉ែនដែលអារ៉ាប៊ីសាអូឌីតចង់បានរហូតដល់ថ្ងៃបោះឆ្នោតជ្រើសរើសប្រធានាធិបតីថ្មីនៅអាមេរិក។ អ្វីដែលទីក្រុងរីយ៉ាដសង្ឃឹមនោះ គឺប្រធានាធិបតីថ្មីនៅអាមេរិកដែលប្រកាន់ជំហរតឹងតែងជាងលោកអូបាម៉ាបច្ចុប្បន្ន ពិសេសនៅក្នុងទំនាក់ទំនងជាមួយអ៊ីរ៉ង់។
យ៉ាងណាក៏ដោយ សាររបស់ប្រមុខចលនាអេបូឡាលីបង់ដែលមានទំនោរកអ៊ីរ៉ង់រូបនេះជាសក្ខីកម្មមួយដែលបញ្ជាក់ពីសង្រ្គាមដណ្តើមឥទ្ធិពលគ្នាកាន់តែខ្លាំងនៅក្នុងតំបន់រវាងអារ៉ាប៊ីសាអូឌីតនិកាយស៊ុយនីត និងអ៊ីរ៉ង់និកាយឈីអ៊ីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ