ភាពក្រីក្រគំរាមកំហែងប្រជាជនចំនួន ២០០ លាននាក់នៅទ្វីបអាមេរិកខាងត្បូង
ចុះផ្សាយនៅថ្ងៃ៖
ស្តាប់ - ០៣:៥៤
បច្ចុប្បន្ននេះភាពក្រីក្រកំពុងប៉ះពាល់ដល់ប្រជាជនប្រមាណ ១៤៤ លាននៅទ្វីបអាមេរិកខាងត្បូង។ តួលេខនេះអាចកើនដល់ ២០០ លាននាក់ស្មើនឹងមួយភាគបីនៃចំនួនប្រជាជនសរុបក្នុងតំបន់ ខណពេលដែលសេដ្ឋកិច្ចរបស់បណ្តាប្រទេសនៅទ្វីបអាមេរិកខាងត្បូងពុំសូវកើនឡើងខ្លាំង។ កម្មវិធីសហប្រជាជាតិសម្រាប់ការអភិវឌ្ឈន៍បានប្រកាសភាពអាសន្នបែបនេះនៅក្នុងរបាយការណ៍មួយដែលបានចេញផ្សាយកាលពីចុងខែសីហាកន្លងមកនេះ។ របាយការណ៍នោះមានចំណងជើងថា «ទំរង់រូបភាពនៃស្រទាប់សង្គមនៅទ្វីបអាមេរិចកខាងត្បូង÷ អ្នកក្រីក្រ អ្នកទន់ខ្សោយ និងអ្នកវណ្ណៈកណ្តាល»។
កាលពីឆ្នាំ ២០០០ ក្រុមប្រជាជនដែលត្រូវបានគេចាត់ទុកថាជាអ្នកទន់ខ្សោយ ដែលមានប្រាក់ចំណូលចាប់ពី៤ទៅ១០ដុល្លារក្នុងមួយថ្ងៃមានអត្រាចំនួន ៣៥% ប៉ុន្តែ អត្រានេះបានកើនឡើងដល់ ៣៨% កាលពីឆ្នាំ២០១២។ការសិក្សារបស់កម្មវិធីសហប្រជាជាតិសម្រាប់ការអភិវឌ្ឈន៍បានបង្ហាញអោយដឹងថា មានប្រជាជនតិចតួចប៉ុណ្ណោះនៅទ្វីបអាមេរិកខាងត្បូង ដែលមានជីវភាពអាចឡើងដល់លំដាប់អ្នកវណ្ណៈថ្នាក់កណ្តាល។គេអាចចាត់ទុកមនុស្សម្នាក់ថាមានជីវភាពថ្នាក់កណ្តាលបាន ប្រសិនបើបុគ្គលនោះអាចរកបា្រក់ចំណូលបានចំន្លោះពី ១០ ទៅ ៥០ ដុល្លារក្នុងមួយថ្ងៃ។
ទោះបីជាប្រជាជននៅទ្វីបអាមេរិកខាងត្បូងរាប់លាននាក់ ដែលស្ថិតក្នុងស្ថានភាពទន់ខ្សោយអាចធ្លាក់ចូលក្នុងស្ថានភាពក្រីក្រក៏ដោយ ក៏របាយការណ៍នេះបានបង្ហាញពីចំនុចវិជ្ជមានមួយផងដែរ។ ពោលគឺចំនួនអ្នកក្រីក្រ ដែលមានប្រាក់ចំណូលទាបជាង ៤ ដុល្លារក្នុងមួយថ្ងៃបានថយចុះពី ១៨៩ លាននាក់មកនៅត្រឹមតែចំនួន ១៣៣ លាននាក់ចន្លោះគិតចាប់ពីឆ្នាំ ២០០០ដល់ឆ្នាំ ២០១២។
បើតាមការវិភាគរបស់លោក William Pleitez អ្នកជំនាញសេដ្ឋកិច្ចរបស់កម្មវិធីសហប្រជាជាតិសម្រាប់ការអភិវឌ្ឈន៍បានបញ្ជាក់អោយដឹងថា នាពេលបច្ចុប្បន្ននេះ សន្ទុះនៃការលូតលាស់សង្គម និងសេដ្ឋកិច្ចនៅតាមបណ្តាប្រទេសអាមេរិចឡាទីនមានភាពយឺតយ៉ាវដោយសារវិបត្តិសេដ្ឋកិច្ច និងមហន្តរាយគ្រោះធម្មជាតិ។ លើសពីនេះមានកត្តាមួយចំនួនទៀតដូចជា គម្លាតរវាងអ្នកក្រនិងអ្នកមាន ចំណាកស្រុក អំពើរហឹង្សា វិសមភាពរវាងស្រ្តី និងបុរសជាដើម។ នយោបាយសេដ្ឋកិច្ចនៅតាមបណ្តាប្រទេសទាំងនោះកំពុងត្រូវបានគេស្តីបន្ទោស ដោយសារបញ្ហាក្នុងការគ្រប់គ្រងថវិការ និងបូរិយវត្ថុក្នុងស្រុក។
នៅទ្វីបអាមេរិកខាងត្បូង ទសវត្សរុងរឿងក្នុងឆ្នាំ ១៩៨០ និង១៩៩០លែងមានទៀតហើយ ដែលកាលនោះសន្ទុះសេដ្ឋកិច្ចក្នុងតំបន់មានចន្លោះពី ៥ ទៅ ៦ %។ សំរាប់ឆ្នាំ២០១៤នេះ អ្នកជំនាញសេដ្ឋកិច្ចបានប៉ាន់ប្រមាណថា កំណើនសេដ្ឋកិច្ចនៅតាមបណ្តាប្រទេសទាំងនោះមានត្រឹមតែ ២ % ប៉ុណ្ណោះ។
បច្ចុប្បន្ននេះ សេដ្ឋកិច្ចប្រទេសប្រេស៊ីលកំពុងលូតលាស់យឺត ខណពេលដែលប្រទេសអាហ្សង់ទីនកំពុងជួបបញ្ហាក្នុងការសងបំណុលពុំបានទៀងទាត់។ គេរំពឹងទុកថា មានតែប្រទេសស៊ីលី ប្រទេសកូឡំប៊ី និងប្រទេសប៉េរូប៉ុណ្ណោះដែលអាចបន្តកំណើនបានខ្ពស់ពោលគឺ ៣% នៅឆ្នាំ ២០១៤នេះ និង ៤% នៅឆ្នាំ២០១៥ខាងមុខ។
ទោះបីជាសេដ្ឋកិច្ចរបស់ប្រទេសប្រេស៊ីលកំពុងដើរយឺតក៏ដោយ ក៏ប៉ុន្តែ ប្រទេសនេះត្រូវបានគេចាត់ទុកថាជាប្រទេសមានសេដ្ឋកិច្ចគំរូក្នុងតំបន់ ព្រោះគ្រាន់តែរយៈពេល ៥ ឆ្នាំប៉ុណ្ណោះ (ពីឆ្នាំ ២០០៥ ដល់ឆ្នាំ ២០១០) ប្រទេសនេះបានជួយមនុស្សចំនួន ៣០ លាននាក់អោយចេញពីភាពក្រីក្រ។ ប៉ុន្តែ សំរាប់ឆមាសទីមួយនៃឆ្នាំ ២០១៤នេះ កំណើនសេដ្ឋកិច្ចរបស់ប្រទេសនេះបានថយចុះ។ អ្វីដែលគួរអោយបារម្ភនោះគឺ ការសំរេចចិត្តរបស់រដ្ឋាភិបាលប្រេស៊ីលក្នុងពេលមានវិបត្តិ ដោយសារគេចំណាយលុយច្រើនលើកម្មវិធីសង្គមកិច្ចជាជាងសន្សំសំចៃលុយកាក់ដោយវិនិយោគលើហេដ្ឋារចនាសម្ព័ន្ធដូចជា ផ្លូវថ្នល់ និងស្ពានជាដើម។ ការចំណាយច្រើនលើផែ្នកសង្គមកិច្ចបែបនេះធ្វើអោយរដ្ឋមានបន្ទុកកាន់តែធ្ងន់ហើយអាចបង្ករអោយរដ្ឋក្ស័យធនទៀតផង។
ចំណែកប្រទេសអាហ្សង់ទីន ដែលកំពុងជួបបញ្ហាសេដ្ឋកិច្ចដាំក្បាលថយចុះ និងអតិផរណាត្រូវបានបណ្តាភ្នាក់ងារវាយតម្លៃហានិភ័យបំណុលចាត់ទុកថា ជាប្រទេសកំពុងខកខានពុំបានសងបំណុលអោយបានទៀងទាត់ ដោយសារប្រទេសអាហ្សង់ទីនកំពុងមានជំលោះជាមួយសហរដ្ឋអាមេរិកជុំវិញមូលនិធិទិញលក់កេងយកចំណេញ(hedge funds)។បច្ចុប្បន្ន ជំលោះនេះត្រូវបានអាហ្សង់ទីនកំពុងដាក់ពាក្យបណ្តឹងទៅតុលាការយុត្តិធម៌អន្តរជាតិប្រចាំនៅទីក្រុងឡាអេ ប្រទេសហូឡង់។
បើតាមការវិភាគរបស់លោក Augusto de la Torre អ្នកវិភាគសេដ្ឋកិច្ចរបស់ធនាគារពិភពលោកបានអោយដឹងថា បើតាមបទពិសោធន៍កន្លងមក នៅពេលណាដែលវិបត្តិសេដ្ឋកិច្ច និងវិបត្តិហិរញ្ញវត្ថុបែបនេះកើតឡើង បណ្តាប្រទេសនៅទ្វីបអាមេរិកខាងត្បូងតែងជួបបញ្ហាសង្គមស្មុគស្មាញពិបាកដោះស្រាយ។
ដូចនេះ វាជាការចាំបាច់ដែលត្រូវអោយប្រជាជនដែលស្ថិតនៅក្នុងកំរិតទន់ខ្សោយអាចមានជីវភាពកាន់តែធូរធារជាងនេះ ដើម្បីអោយពួកគេអាចឈានចូលទៅក្នុងកំរិតជីវភាពវណ្ណៈកណ្តាល។ ប្រសិនបើនិន្នាការវិបត្តិសេដ្ឋកិច្ច និងវិបត្តិហិរញ្ញវត្ថុនៅតែបន្តក្នុងរយៈពេលប៉ុន្មានឆ្នាំខាងមុខនេះ ប្រជាជននៅតាមបណ្តាប្រទេសអាមេរិកខាងត្បូងកាន់តែច្រើនឡើងអាចនឹងធ្លាក់ខ្លួនពីស្ថានភាពទន់ខ្សោយចូលទៅក្នុងភាពក្រីក្រលំបាក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ