មនុស្ស៣៧ម៉ឺននាក់ភៀសខ្លួន ដោយសាខ្យល់ព្យុះស៊ីក្លូននៅឥណ្ឌា
ដូចតាមការស្មានទុក របស់ក្រុមព្យាករណ៍ឧត្តុនិយមឥណ្ឌា ខ្យល់ព្យុះស៊ីក្លូនដែលមានឈ្មោះថា ហ៊ុដហ៊ុដ បានបោកបក់ដល់ភាគខាងកើតប្រទេសឥណ្ឌា នៅព្រឹកថ្ងៃអាទិត្យនេះ។ ប្រជាជននៅក្នុងរដ្ឋឥន្ទ្រាប្រាដេហ្ស ចំនួនប្រមាណជា៣៧ម៉ឺននាក់ ត្រូវបានជម្លាសចេញ ពីតំបន់មាត់សមុទ្រ។ រហូតមកដល់ពេលនេះ អាជ្ញាធរឥណ្ឌាបានរាយការណ៍ថាមានអ្នកស្លាប់បីនាក់ហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ខ្យល់ព្យុះស៊ីក្លូន ហ៊ុដហ៊ុដ ដែលគេចាត់ទុកថា ជាខ្យល់ព្យុះកំរឹតខ្លាំង បានបោកបក់ទៅលើតំបន់ឆ្នេរសមុទ្រ ភាគខាងកើតប្រទេសឥណ្ឌា ក្នុងល្បឿន២០០គីឡូម៉ែត្រ ក្នុងមួយម៉ោង។ ប្រជាជនមិនតិចជាង៣៧ម៉ឺននាក់ទេ នៅក្នុងក្រុងវិសាខាប៉ាថាណាំ ក្នុងរដ្ឋឥន្ទ្រាប្រាដេហ្ស ត្រូវអាជ្ញាធរតម្រូវឲ្យជម្លៀសចេញពីតំបន់នេះ ដើម្បីគេចចេញពីគ្រោះថា្នក់។
យោងតាមភ្នាក់ងារជាតិគ្រប់គ្រងគ្រោះមហន្តរាយឥណ្ឌា បានឲ្យដឹងថា ខ្យល់ព្យុះ បានបំផ្លាញ ផ្ទះសម្បែង និងបានផ្តួលរំលំដើមឈើ និងបង្គោលអគ្គីសនី ជាច្រើនរយដើម ហើយបានកាត់ផ្តាច់ផ្លូវថ្នល់សំខាន់ៗក្នុងតំបន់នេះ។ អ្វីដែលត្រូវធ្វើបន្ទាន់នាពេលនេះ គឺត្រូវសម្អាតផ្លូវទាំងនោះ ដោយត្រូវរើដើមឈើ និងបង្គោលភ្លើងដែលដួលរលំ ដើម្បីឲ្យក្រុមសង្គ្រោះ អាចធ្វើដំណើរទៅជួយប្រជាជនដែលរងគ្រោះ។ កងទាហានម៉ារីនឥណ្ឌា បានត្រៀមខ្លួនជាស្រេច ដោយមានក្រុមគ្រូពេទ្យ សម្ភារៈចាំបាច់ ដូចជាអាវពោង ទូកសង្រ្គោះ នឹងស្បៀងអាហារ ដើម្បីជួយដល់ជនរងគ្រោះ។ លោកនាយករដ្ឋមន្រ្តីឥណ្ឌា នរិន្ទ្រម៉ូឌី បានកោះប្រជុំបន្ទាន់ ជាមួយរដ្ឋមន្រ្តីពាក់ព័ន្ធ កាលពីល្ងាចថ្ងៃសៅរ៍ ដើម្បីធានាឲ្យបាន នូវការត្រៀមរៀបចំទុកជាមុនរបស់អាជ្ញាធរ ដើម្បីស្រោចស្រង់ប្រជាជនរងគ្រោះ។
ចាប់តាំងពីម៉ោង១១ ៣០នាទីព្រឹក ម៉ោងនៅឥណ្ឌា ជាពេលដែលខ្យល់ព្យុះ ហ៊ុដហ៊ុដបានបក់ទៅដល់ រហូតមកទល់ពេលនេះ មានមនុស្សស្លាប់បីនាក់ហើយ។ ចំនួនអ្នកស្លាប់ អាចនឹងកើនឡើងតទៅទៀត ព្រោះថាក្រុមសង្គ្រោះនៅមិនទាន់ទៅដល់គ្រប់ទីកន្លែងនៅឡើយ ហើយខ្យល់ព្យុះ ក៏ពុំទាន់អស់ឥទ្ធិពលដែរ។ តាមការព្យាករណ៍ ខ្យល់ព្យុះនេះ និងបន្តដំណើរទៅភាគខាងជើងទៀត ហើយរដ្ឋមួយទៀត ដែលនៅក្បែរនោះ ក៏កំពុងតែត្រៀមខ្លួនដែរ។
សូមបញ្ជាក់ថា តំបន់ភាគខាងកើតឥណ្ឌា ដែលនៅជាប់ឈូងសមុទ្របង់ហ្គាល់ ជាតំបន់ដែលរងការបំផ្លេចបំផ្លាញ ដោយសាខ្យល់ព្យុះស៊ីក្លូនជាញឹកញាប់ ក្នុងចន្លោះពីខែ មេសា ដល់ខែវិច្ឆិកា។ តំបន់នេះ កាលពីឆ្នាំទៅ ក៏ត្រូវបាន ខ្យល់ព្យុះផៃលីន បោកបក់បំផ្លេចបំផ្លាញ បង្កមហន្តរាយយ៉ាងសន្ធឹកសន្ធាប់ដែរ។ សូមរំលឹកដែរ ថាគ្រោះមហន្តរាយដែលធ្ងន់ធ្ងរជាងគេនោះ គឺនៅឆ្នាំ១៩៩៩ ដែលខ្យល់ព្យុះប្រភេទនេះ បានសម្លាប់មនុស្សជាង ៨ពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ