មេបញ្ជាការទ័ពនៃចលនាអេស្បូឡាលីបង់មូស្តាហ្វា បាដដ្រឺឌីនស្លាប់ក្នុងទឹកដីស៊ីរី
នៅថ្ងៃសុក្រ ទី១៣ ឧសភានេះ ចលនាអេស្បូឡាលីបង់បានប្រកាសឲ្យដឹងពីការស្លាប់មេបញ្ជាការរបស់ខ្លួនមូស្តាហ្វា បាដដ្រឺឌីនក្នុងទឹកដីស៊ីរី។ ផ្អែកតាមសេចក្តីជូនដំណឹងរបស់ចលនាអេស្បូឡាលីបង់ មូស្តាហ្វា បាដដ្រឺឌីនបានស្លាប់នៅក្នុងការវាយប្រហារមួយស្ថិតក្បែរអាកាសយានដ្ឋានក្នុងទីក្រុងដាម៉ាស់។ គួររម្លឹកជូនថា តាំងពីស៊ីរីធ្លាក់ក្នុងវិបត្តិហែកហួរផ្ទែក្នុងជាង ៥ឆ្នាំកន្លងមក ចលនាអេស្បូឡាលីបង់បានបញ្ជូនទ័ពទៅជួយគាំទ្រកម្លាំងរដ្ឋាភិបាលស៊ីរីរបស់លោកប្រធានាធិបតីស៊ីរីអាសាដក្នុងការប្រឆាំងនឹងក្រុមបះបោរ។
ចុះផ្សាយនៅថ្ងៃ៖
ស្តាប់ - ០២:០៧
ក្រៅពីការស្លាប់មេបញ្ជាការមូស្តាហ្វា បាដដ្រឺឌីន ចលនាអេស្បូឡាលីបង់ក៏បានប្រាប់ឲ្យដឹងពីទ័ពអេស្បូឡារងរបួសជាច្រើននាក់នៅក្នុងព្រឹត្តិការណ៍ផ្ទុះមួយស្ថិតក្បែរអាកាសយានដ្ឋានក្នុងទីក្រុងដាម៉ាស់។ តែនៅក្នុងសេចក្តីជូនដំណឹងដដែល ចលនាអេស្បូឡាលីបង់មិនបានបញ្ជាក់ពីថ្ងៃខែ និងដើមហេតុនៃព្រឹត្តិការណ៍ផ្ទុះនោះទេ។ នៅក្នុងន័យនេះ ចលនាអេស្បូឡាបានប្រកាសពីការបើកការស៊ើបអង្កេតដើម្បីស្វែងរកការពិត ពិសេសចង់ដឹងឲ្យច្បាស់ថា តើការផ្ទុះនោះបង្កឡើងដោយគ្រាប់មីស៊ីល ដោយគ្រាប់ប្លោង ឬមួយដោយការទម្លាក់គ្រាប់បែកពីលើយន្តហោះ។
សូមជម្រាបជូនថា ចលនាអេស្បូឡាលីបង់ដែលជាចលនាប្រដាប់អាវុធនិកាយឈីអ៊ីតដ៏មានឥទ្ធិពលនៅក្នុងប្រទេសលីបង់ គឺជាសត្រូវស៊ីសាច់ហុតឈាមនឹងប្រទេសអ៊ីស្រាអែល និងដែលសហរដ្ឋអាមេរិកចាត់ទុកជាអង្គការភេរវនិយម។ ចលនានេះហើយដែលបានធ្វើសង្រ្គាមប្រឆាំងនឹងអ៊ីស្រាអែលក្នុងឆ្នាំ ២០០៦ និងតែងតែចោទអ៊ីសា្រអែលពីបទធ្វើឃាតសម្លាប់មន្រ្តីខ្លួន។ តែនៅក្នុងការស្លាប់មេបញ្ជាការមូស្តាហ្វា បាដដ្រឺឌីនក្នុងទឹកដីស៊ីរីពេលនេះ ចលនាអេស្បូឡានៅមិនទាន់ទម្លាក់កំហុសដាក់អ្នកណាមួយនៅឡើយទេ។
មានអាយុប្រមាណជា ៥៥ឆ្នាំ មូស្តាហ្វា បាដដ្រឺឌីន ជាអ្នកទទួលខុសត្រូវសំណុំរឿងស៊ីរី ដោយបានដឹកនាំកងពលទ័ពអេស្បូឡាមានគ្នាពី ៧ ០០០ ទៅ ១០ ០០០នាក់ទៅជួយច្បាំងទ័ពរដ្ឋាភិបាលស៊ីរីប្រឆាំងនឹងក្រុមបះបោរ។ បើគិតតាំងពីថ្ងៃផ្តើមចូលអន្តរាគមន៍នៅស៊ីរីក្នុងឆ្នាំ ២០១៣ មក មានទ័ពអេស្បូឡាស្លាប់ក្នុងទឹកដីស៊ីរីប្រមាណជា ១ ៣០០នាក់ ក្នុងនោះមានមេទ័ពសំខាន់ៗយ៉ាងតិច ៥នាក់ និងរបួសជិត ៥០០នាក់ផ្សេងទៀត។
គួររម្លឹកជូនថា មូស្តាហ្វា បាដដ្រឺឌីនធ្លាប់បានជាប់ចោទពីបទបានរៀបចំភេរវកម្មសម្លាប់លោកនាយករដ្ឋមន្រ្តីលីបង់រ៉ាហ្វិក ហារីរីក្នុងទីក្រុងបៃរូតក្នុងឆ្នាំ ២០០៥។ តែចលនាអេស្បូឡាតែងតែបានចាត់ទុកការចោទប្រកាន់នេះថាជារឿងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ