យន្តហោះប៊ូអ៊ីង 737 ចុះហួសផ្លូវជ្រុលធ្លាក់ទៅក្នុងទឹកទន្លេនៅអាមេរិក
យន្តហោះដឹកអ្នកដំណើរមួយគ្រឿង ធុនប៊ូអ៊ីង 737 បានចុះហួសផ្លូវ ហើយជ្រុលធ្លាក់ទៅក្នុងទឹកទន្លេ ក្នុងរដ្ឋហ្វ្លរីដា សហរដ្ឋអាមេរិក កាលពីយប់ថ្ងៃសុក្រ ក៏ប៉ុន្តែ គ្រោះថ្នាក់នេះមិនបានបណ្តាលឲ្យមានអ្នកស្លាប់នោះទេ ដោយអ្នកដំណើរទាំងអស់ត្រូវបានគេសង្រ្គោះចេញពីក្នុងទន្លេ។ នេះគឺជាគ្រោះថ្នាក់យន្តហោះមួយទៀតរបស់ក្រុមហ៊ុនប៊ូអ៊ីង ក្នុងពេលដែលយន្តហោះធុន 737 MAX ត្រូវបានគេហាមឃាត់មិនឲ្យហោះហើរនៅទូទាំងពិភពលោក ដោយសារតែជួបនឹងគ្រោះថ្នាក់ផ្ទួនៗគ្នា កាលពីពេលកន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
យន្តហោះប៊ូអ៊ីង ដែលជួបនឹងគ្រោះថ្នាក់ កាលពីយប់ថ្ងៃសុក្រនេះ មានដឹកអ្នកដំណើរ រួមទាំងអ្នកបើកបរ និងបុគ្គលិកយន្តហោះ សរុបទាំងអស់ ១៤៣នាក់ ធ្វើដំណើរចេញពីហ្គ័នតាណាម៉ូ ក្នុងប្រទេសគុយបា សំដៅមកមូលដ្ឋានទ័ពជើងទឹកអាមេរិក នៅក្នុងទីក្រុងជែកសុនវីល រដ្ឋហ្វ្លរីដា (Jacksonville, Florida)។
រហូតមកទល់នឹងពេលនេះ គេនៅមិនទាន់ដឹងលម្អិតច្បាស់ អំពីហេតុការណ៍ជុំវិញគ្រោះថ្នាក់យន្តហោះនេះនៅឡើយទេ គេគ្រាន់តែដឹងថា នៅពេលកើតហេតុ មេឃកំពុងភ្លៀងខ្លាំង ដោយមានទាំងផ្គរ និងរន្ទះផង ហើយយន្តហោះនេះបានចុះយ៉ាងគំហុក រហូតជ្រុលហួសផ្លូវ រួចហើយធ្លាក់ទៅក្នុងទឹកទន្លេ ដែលនៅក្បែរនោះ។
ដោយសារតែទឹកទន្លេនោះមិនសូវជ្រៅ ដូច្នេះហើយបានជាតួយន្តហោះមិនបានលិចបាត់ទៅក្នុងទឹកនោះទេ ហើយមន្រ្តីនៃមូលដ្ឋានទ័ពជើងទឹក ក៏ដូចជាមន្រ្តីប៉ូលិសក្រុងជែកសុនវីលបានឲ្យដឹងថា មនុស្សទាំងអស់ដែលជិះនៅលើយន្តហោះ ត្រូវបានគេសង្រ្គោះចេញពីទន្លេ ដោយមានអ្នករងរបួសតែ ២១នាក់ប៉ុណ្ណោះ ហើយក្នុងចំណោមនោះក៏មិនមានអ្នកដែលរងរបួសធ្ងន់ធ្ងរនោះដែរ។
National Transportation Safety Board ដែលជាការិយាល័យស៊ើបអង្កេតករណីធ្លាក់យន្តហោះរបស់អាមេរិក បានឲ្យដឹងថា ខ្លួនបានបញ្ជូនអ្នកស៊ើបអង្កេតមួយក្រុមឲ្យទៅកន្លែងកើតហេតុ ដើម្បីចាប់ផ្តើមបើកការស៊ើបអង្កេតលើករណីគ្រោះថ្នាក់យន្តហោះនេះ។
គួរបញ្ជាក់ថា យន្តហោះដែលជួបនឹងគ្រោះថ្នាក់នៅយប់ថ្ងៃសុក្រនេះ ត្រូវបានគេដាក់ឲ្យដំណើរការ ១៨ឆ្នាំមកហើយ គឺជាយន្តហោះធុនប៊ូអ៊ីង 737 ម៉ូដែលចាស់ មុនម៉ូដែល 737 MAX ដែលធ្លាក់នៅឥណ្ឌូណេស៊ីកាលពីខែតុលាឆ្នាំទៅមិញ និងនៅអេត្យូពីកាលពីខែមីនាកន្លងទៅថ្មីៗនេះ។
ក៏ប៉ុន្តែ បើទោះបីជាវាជាម៉ូដែលផ្សេងគ្នាក៏ដោយ គ្រោះថ្នាក់យន្តហោះធុន 737 នេះ វាជាបញ្ហាផ្ទួនៗគ្នា ដែលក្រុមហ៊ុនប៊ូអ៊ីងត្រូវប្រឈម ក្នុងពេលដែលបញ្ហាទាក់ទងនឹងការធ្លាក់យន្តហោះកាលពី២លើកមុននៅមិនទាន់មានដំណោះស្រាយនៅឡើយ ហើយយន្តហោះធុន 737 MAX ដែលត្រូវបានគេហាមឃាត់នៅទូទាំងពិភពលោកនោះ ក៏នៅមិនទាន់អាចទទួលបានការអនុញ្ញាតឲ្យហោះហើរវិញនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ